Filipai 1 - WEN GBAŊKA

¹ Mi Pɔɔl, ale a ŋmarisi gbaŋka de a te ni. Mi ale Timoti ale chim Yeezu Kirisita tomteerɔba la a puusi nama ale ni kpaŋŋa ale ni maarima baai meena ale ka Wen nuruba a bo Filipai tɛŋka la.

² Ti Kowa Wen ale ti Nyɔnɔwa Yeezu Kirisita le ŋmante ni abe ba te ni suiyɔgni.

³ Mi kasim a poli ni wie kama ale a puusi Wen a te ni.

⁴ Mi dan boro a puusi a te ni, mi sui a nyiem a kasim a peenti kama.

⁵ Dii nyiŋla, a ta nyini diipo ate nama a wom Wen wamaŋsaŋa wie la, ni nyiem a kasim jam a maari mu kama ate mi a weeni nuruba wa wie.

⁶ Mi ta sebchakka kama kude nyiŋ, wa waai ale piilim tuim maŋka ale fu la ale ta di a ga paari nuerika alege ate Yeezu Kirisita danni paari.

⁷ Ku nala kama ate mi kasim ta ni wie m suinum po nnala, dii nyiŋ la mi ta yaalika kama ale ni nalimnyiini. Ba dan yik mu a ta ga lik yaase mi ale za Wen wamaŋsaŋa ŋaaŋ a sak nuruba ayen ŋa ka wensie la, nama meena ale mi a maari chaab nya Wen ŋmanteka kama.

⁸ Wen ka mi seerɔ ayen mi a biisi ka wensie, ase m nin weeni ayen yaali kaai ate m ta ale ni la a nyini ka Yeezu Kirisita suinum po.

⁹ Dila nyiŋla a zaani diipo ate tama wom ni la, ti kasim a puusi Wen a te ni kama ayen yaali kaai ate ni ta ale chaab la, le kasim zuak yegayega. Daa dila nyiini abe ni sebika mɛ a ŋmasi zuak wie meena po,

¹⁰ ate ni nyiem a baga a lueri wa wensie suiku abe ni a va ku. Ni daa nye dila ate Kirisitawa a ŋman pilim jam, ni le baga a tu wa ale weleŋsa ale kan ta kaasuŋŋoa wa jigi ya.

¹¹ Kirisita ale maari ni ate ni chim nuru maŋsa nna yegayega. Nuruba ale nya nama tuima ale ka diila a yaali ayen ba a pak abe ba a te Wen zula.

¹² M suata, mi a yaali kama ayen m weeni a sak ni ayen ba le yik mi a lik diila a basi kama ate Wen wamaŋsaŋa a tagli nuruba yegayega jigi.

¹³ Siiza tugurik tɔŋdɔma ale a limisi mi la ale baai meena ale bo dela la a seba kama ayen ba yik mi a lik ka mi ale a va Kirisita la nyiŋ.

¹⁴ Nya kude nyiŋ, Yeezu ŋaaŋviirɔma ba yega a jam ta suinum pagrik ayen ba a sak nuruba Wen wamaŋsaŋa wie.

¹⁵ Nuruba gela baai ale ta nyuri ale mi la, a sak nuruba kama Kirisita wie, alege baai mɛ ale kan ta nyuri ale mi la a sak nuruba wa wie a maari mu.

¹⁶ Baai ale a maari mu la a yaali mu kama ale seba ayen ka Wen ale pai mi a zaani dela jigini ayen m za wa wamaŋsaŋa wieŋa ŋaaŋ.

¹⁷ Baai mɛ ale ta nyuri ale mi la, a sak nuruma Kirisita wie ale ka ba noa po wie nyiini. Ba ka butueta nyam ale a yaali ayen ba nye ate m ŋmasi a nam yegayega a gum m ninammu de po likka dɔkku de po.

¹⁸ Alege dila a kan kaasi. Ba gela a sak nuruba Kirisita wie kama ale ba popo meena, alege ba gela mɛ a sak ba wa wie ale ba noa po wie nyiini. Ku peenti mi sui kama, dii nyiŋla nuruma de meena buyewa a basi kama ate nuruba wom Kirisita wie.

¹⁹ Ku be ŋman peenti m sui dii nyiŋla, mi seba kama ayen ba le jam a yeeri mi likka dɔkku de po a basi boan nyiŋŋa nama puusaŋa ale Yeezu Kirisita Chiika maarika le basi kama ate ba yeeri mu.

²⁰ M le potim a yaali dii ale m suinum meena ale ta yiila ale di la ale m kan tom m tuimaŋa a kpeeri diipo diipo. Mi a yaali kama diipo meena wuu ayen ale yɔgyɔgla de, m kasim ta nyiŋbiiri nna yegayega a tom ate ku ta zula a jam Kirisita jigi dii meena wuu m kpi yoo mi an kpi yoo.

²¹ Ale ge ate m boro la, ka Kirisitawa nyiŋ, m be dan kpi ku ka nyuenta.

²² Alege mi dan boro nyiŋka de po, kude kiri ale m tuimaŋa le cheŋ nalimnyiini a te mu, mi zɛ mi a nin m lueri di dii dek la.

²³ Wieŋa de ŋayewa a daani mu kama nna yegayega m suinum po. M kasim a yaali kama ayen m kpi a ga bo ale Kirisita. Kula a zunchoŋŋa m tɛŋzuk de boka kama,

²⁴ alege ku ka wamaŋ ate m boro ale ni a zunchoŋŋa gaam m nin kpi.

²⁵ M seba ayen ku a magsi kama ate m bo ale ni ate m baga a maari ni ate ni ta siaka ale Kirisita abe ni sue a peenti nna yegayega.

²⁶ M be dan jam ayen m ŋman bo ale ni, nama ale zak m zuk a zaani abe ni a te Yeezu Kirisita pimpauk mi nyiŋ.

²⁷ Yɔgyɔgla de, wamaŋka ale, ni basi ate ni boka a va ale Kirisitawa sinsaŋŋa ale a weeni diila ate m dan poom a jam ni jigi nwuli a yaase m beni ale ni wie womka, m le seba ayen ni ta nɔiyeŋ kama ale chaab ale kpesi za magsi mɛ. M le ŋman seba mɛ ayen ni nina a muni ka nna yegayega ayen ni a sak nuruba Wen wamaŋsaŋa ŋaai ale basi ate ba a ta siaka ale wa la.

²⁸ Ni kan pooma a chali ni dachaasaŋa yɔgsum ale magadek me la. Nya kude ale sak ba ayen Wen dek ale jam dai yeŋ po a nya ba kaasuŋku abe wa nye ate ba kan ta kiri ya. Ku le sak nama mɛ ayen wa le jam a vari ni ni tuimbaataŋa po a basi kama meena.

²⁹ Boan nyiŋŋa, Wen an basi kama ate ni ta siaka nyiini ale Kirisita alege wa basi kama mɛ ate ni a nam wa nyiŋ.

³⁰ Yɔgyɔgla de ni gum mi po ate ti nye kpaliŋka, kpaliŋ kaai ate nama a wom ale mi a kpaliŋ la. Be ka kala ale la ate mi diem a kpaliŋ.