Ezra 7 - WEN GBAŊKA

¹ Wieŋa de meena ŋaaŋnyiŋ, diipo ate Persia naawa Artasaset a ta wa naamu la, Ezra kowa a jam ka Seraiya, Seraiya kowa a jam ka Azariya, Azariya kowa a jam ka Yilkia,

² Yilkia kowa a jam ka Sallum, Sallum kowa a jam ka Zadok, Zadok kowa a jam ka Ayitub,

³ Ayitub kowa a jam ka Amariya, Amariya kowa a jam ka Azariya, Azariya kowa a jam ka Meraiot,

⁴ Meraiot kowa a jam ka Zerayia, Zerayia kowa a jam ka Uzzi, Uzzi kowa a jam ka Bukki,

⁵ Bukki kowa a jam ka Abisua, Abisua kowa a jam ka Fineyas, Fineyas kowa a jam ka Eleaza, Eleaza kowa a jam ka Aaron, Aaron a jam ka kaabteerɔ kpioŋ.

⁶ Ezra wade a jam nyini ka Babilon jam. Wa jam ka sagrɔ waai ale seba Moosis Sinsaŋŋa ŋaai ate Naawen, Izirali Wenni a jam te la. Naawa a jam te wa jaabuuri meena ate wa bek la kama, dii nyiŋla Naawen wa Wenni nisa a jam bo wa zuk kama.

⁷ Izirali demma gela ale kaabteerɔma ale Livaima ale yilendisaŋa ale baai ale a nya nansuiŋtaŋa zuk la ale baai ale jam a tom Wen yenni po la, meena a yaa jam Jerusalem po bena ŋayopɔiwa po ate Naab Artasaset a jam dɛ wa naamu la.

⁸ Ezra a jam Jerusalem po ka chiisa sinuwa po bena ŋayopɔiwa po ate naawa a dɛ wa naamu la.

⁹ Wa yaa jam piilim wa chelimu a basi Babilon tɛŋka piilimka chiika da dii ale dɛ niŋka la danni, a yaa paari Jerusalem tɛŋka chiik kaai ale saari sinuwa la ka piilimka danni, wa Wenni ni sii ale a niak la ale bo ale wa la nyiŋ.

¹⁰ Ezra a jam gomsi wadek kama ayen wa zamsi abe wa va Naawen ŋmarisika, abe wa a sak Izirali demma wa wieŋa.

¹¹ Gbaŋ kaai ate Naab Artasaset a ŋmarisi a te Ezra waai ale ka kaabteerɔ ale sagrɔ la, wa ka nuru waai ale zamsi wie a magsi chaab ale Izirali Naawen buusaŋa ale wa wieŋa.

¹² Nalima meena naawa Artasaset a puusi kaabteerɔwa Ezra waai ale ŋman chim sagrɔ a sak wenŋmazuk Wenni wieŋa la mi a puusi fu.

¹³ Yɔgyɔgla de mi a weeni kama ayen Izirali demma ale bo m tɛŋka po la ale kaabteerɔma ale Livaima meena waai a da a yaali ayen wa va cheŋ Jerusalem wa baga a cheŋ kama.

¹⁴ Naawa a tom fu kama ale wa nuruba bayopɔi baai ale a sak wa wie la ayen ni ga kpesi nya Juda ale Jerusalem a ta va ni Wenni wieŋa ale bo fi nisaŋa po la.

¹⁵ Ku abe magsi kama ayen fi pai naawa ale baai ale a sak wa wie la ale jam pai kpanaŋa ale ligmɔniŋka a te Izirali Wenni ale bo Jerusalem po la,

¹⁶ a gum chaab ale kpanaŋa ale ligmɔniŋka meena ate ni nya a nyini Babilon tɛŋka la, ale tiirim tii meena ate nuruma ale kaabteerɔma a te Wen yenni Jerusalem po la.

¹⁷ Pai ligraŋa de a da lalisa ale padaasa ale padabilisa ale ŋandiinta tiirim ale nyuka tiirim a yaa pai ba a nye kaabka Wen yenni po kuŋkuŋku zuk a te ni Wenni ale bo Jerusalem la.

¹⁸ Fi ale fi suataŋa Juuma a baga a pai kpanaŋa ale ligmɔniŋka ale tali la meena a nye nama ale a yaali diila, kama a ta va ni Wenni ale a yaali diila.

¹⁹ Pai ŋanti baai ate ba pai te ni a magsi chaab ale jiam teka Wen yenni po la a te Jerusalem Wenni.

²⁰ Jaabuuri meena ale magsi wa bo Wen yenni po ate ni nya ale baga a nye la ni pai naam ligraŋa a nye.

²¹ Yɔgyɔgla de mi, Naab Artasaset, a weeni baai meena ale a nya ligra zuk ate ba bo Yufiretis Benni Kunkɔŋ Kinkala geŋsa la kama ayen Ezra kaabteerɔwa wenŋmazuk Wen Sinsaŋŋa sagrɔwa a dan bek ni jabuui ate wa a yaali la ni te wa,

²² wa dan poom bek ni ayen ni te wa kpana boorik dobrim kook ale ŋanbie boorisa kook ale daam samɔnsa kook ale kpaam samɔnsa kook ale yesa ale kan ta magsika.

²³ Jaabuuri meena ate wenŋmazuk Wenni a weeni la, basi ate ku abe nye nalimnyiini a magsi chaab ale wenŋmazuk Wen yenni. Ka boa ale a bo naawa ale wa nidoabilisaŋa suŋsuŋŋa?

²⁴ Ku magsi kama ayen fi seba ayen fi ka suik a pai lampoo tunika a ji kaabteerɔma ale Livaima ale yilendisaŋa ale baai ale a limisi nansuiŋtaŋa la ale baai ale a tom Wen yenni po la ale tomteerɔma ba chaama a tom tuima Wen yenni de po.

²⁵ Fi Ezra, a ta magsi chaab ale fi Wenni yammu, buui ate fi ta la, lueri boteerɔba ate ba a biisi wensie a te nuru baai meena ale bo Yufiretis Benni Kunkɔŋ Kinkala zuk geŋka la, baai meena ale seba Wen wieŋa la, abe fi sak waai ale kan sebi ŋa la.

²⁶ Waai ale ka a zuli fi Wenni wieŋa ale naawa nɔi la, ku a magsi wa tu ka kum waalika yaase ba yiak wa a basi yaase ba tuesi wa ŋantaŋa meena yaase ba yik wa a lik.

²⁷ Pimpauk a cheŋ Naawen jigi, tama koma Wenni, waai ale pai nyo naawa suinummu po ayen wa ta zula a jam wa yenni ale bo Jerusalem tɛŋka po la suiku de po,

²⁸ ale waai ale basi ate wa ŋmanteka a jam mi jigi naawa ale wa nisɔmma ale naawa nuru baai meena ale ta pagrim la niŋ. Dii nyiŋla Naawen m Wenni nisaŋa a jam bo m zuk kama, m jam nye ka nyiŋbiiri ale tigsi Izirali tɛŋka niŋdeerɔma meena ayen ba cheŋ ale mu.