Ezra 6 - WEN GBAŊKA

¹ Naab Darius a yaa basi ate ba gisi Babilon po dɔkku po ate ba jam a dueni ŋanta du la.

² Ba yaa yaali jabuui ate ba jam ŋmarisi yueŋa a dueni wa zuk la Ekbatana tɛŋka ate ka bo Miidi po la, dii ate ba jam ŋmarisi la abe le nna:

³ Naab Sairus ale dɛ wa naamu bein diila, Naawa a yaa weeni wari ale fifiok a ta va Wen yenni Jerusalem po: Ni pilim a sɛ Wen yenni ase jigi la a magsi kaabka, abe ni dueni nyubini. Ku woglimmu a magsi ku paari ku naŋtuok nɔi pineok,

⁴ abe ni pai tintain kpiema a sɛ paari kaarima ŋata abe le pai tapaga a sɛ kaarinni dinyi a gum du. Pamini ka waai ale a nya ligraŋa zuk naab yeri la ale wa tuni.

⁵ Ligmɔniŋka ale kpanaŋa ale jam bo Wen yenni po la, ŋaai ate Nebukadnezzar a jam pai a ta nyini Wen yenni ale bo Jerusalem po la a ta jam Babilon, a magsi ba ŋman ŋmani kama a cheŋ ba jigini Wen yenni Jerusalem po. Ba magsi ba bo ka Wen yenni po.

⁶ Yɔgyɔgla de, Tattenai, niŋdeerɔ waai ale a nya Yufiretis Benni Kunkɔŋ Kinkala zuk la, ale Setar Bozenai ale fi, ba kpaga ŋaai ale bo tɛŋka po la, a yaa jam bo ba tɔga.

⁷ Ni kan basi ate ni niŋ a bo ale Wen yenni tuimaŋa po. Ni basi ate Juuma niŋdeerɔwa ale Juuma nisɔmma a pilim sɛ Wen yenni de a zaani di jigini.

⁸ Alege m ŋman weeni ni, ni le ni nye dii a te Juuma nisɔmma a magsi chaab ale Wen yenni sɛka la. Nuruma de tuimaŋa ligra meena a tuni a nyini naam ligraŋa po, a nyini Yufiretis Benni Kunkɔŋ Kinkala lampoowa po ate tuini kan wari.

⁹ Jabuui meena ate ba a yaali la, lalik paalisa ale padaasa ale padabilisa a magsi juka tiirim a te wenŋmazuk Wenni ale ŋanbie ale yesa ale daam ale kpaam ase kaabteerɔma ale bo Jerusalem la a nin bek a yaali. Ku a fɛ ate ni te daa meena ni kan zɛri,

¹⁰ ate ba nye kaab sii ale a peenti wenŋmazuk Wenni sui abe ba puusi ate wari meena a nye nalimnyiini a te naawa ale wa nidoabilisaŋa.

¹¹ A ŋman gum du, m weeni kama ayen waai a dan zɛri wanni de ba ale yeeri ka chib wa yenni po a peesi bu a pai chub wa ko ate wa yenni ale chim tampoi ate ba kpiiri yaata a basi du.

¹² Wen, waai ale basi ate wa Yuenni a bo dula la, abe yeeri naab waai yaase nuru waai ale zak nisa ayen wa tagri wanni yaase wa kaasi Wen yenni de Jerusalem po la a basi. Mi Darius a te suik kama ayen ni kpesi a nye kude.

¹³ Alege Naab Darius fifiok wanni nyiŋ ate wa jam tom Tattenai, gomina waai ale a nya Yufiretis Benni Kunkɔŋ Kinkala zuk la ale Setar Bozenai ale ba ŋaaŋviirɔma ate ba ta di a nyini.

¹⁴ Dila nyiŋ Juuma nisɔmma a yaa pii nyiŋ ase ba ale a nya niaka a ta nyini Wen wanni ate biisiteerɔma Aggai ale Iddo ŋaaŋbiika Zakaria a jaa a biisi a te ba la jigi. Ba jam nueri Wen yenni kama a ta va chaab ale Izirali Wenni ale Persia nalimaŋa Sairus ale Darius ale Artasaset ale jam weeni diila.

¹⁵ Ba jam sɛ Wen yenni a nueri ka Adar chiika ka daa ŋata danni, bena ŋayuebiwa po ate Darius a jam de wa naamu la.

¹⁶ Ate Izirali nuruma ale kaabteerɔma ale Livaima ale baai ale ŋman jam la a yaa jam de Wen yenni teka tigini ale suipeentik.

¹⁷ Ba ale jam pai yenni a boro a nyo Wen nisima po la ba teka lalisa kook, padaasa kobsiye ale padabilisa kobsinaansi ayen ba pai a nye biem vɔŋteka kaabka a te Izirali meena, budukta pi ale tiye, ale ba jam te ayen ba pai kunyi kunyi a te Izirali buura pi ale buyewa meena.

¹⁸ Ate ba yaa poori kaabteerɔma ba tɔga Livaima mɛ ba tɔga a magsi chaab ale Wen tuimaŋa Jerusalem po, a ta magsi chaab ale dii ale ŋmarisi Moosis gbaŋka po la.

¹⁹ Chiik kaai ale dɛ niŋka la ka daa pi ale ŋanaansiwa danni baai ale nyini yontini po a kuli la a dɛ Gaambasika Tigini kama.

²⁰ Kaabteerɔma ale Livaima a gomsi badek kama a nala. Livaima a yaa tɔgri Gaambasika pabiika a te baai meena ale nyini yontini po a jam la, ale ba suataŋa kaabteerɔma ale badek.

²¹ Ate Izirali demma baai ale nyini yontini po a jam la a yaa dɛ ale baai meena ale poori badek a ta nyini baai ale kan daa Juuba la daŋta wie po ayen ba gisi Naawen, Izirali Wenni la.

²² Daa ŋayopɔi ba kasim a jam pai a ŋɔbi ka boroborok kuui ate ba an nyo dabinta ku po la tigini, dii nyiŋla Naawen a basi ate ka ba sue a peenti a ta va wa ale tagri Assiria Naawa popolaŋa la, ate wa maari ba ate ba tom Wen yenni Izirali Wenni tuini la.