Ezra 4 - WEN GBAŊKA

¹ Ase Juda ale Benjamin dachaasaŋa ale wom ayen ba boro a sɛ Naawen, Izirali Wen yenni la,

² ba yaa jam Zerubabel ale yeeŋa nyama jigi a weeni ba ayen, <>

³ Alege Zerubabel ale Jesua ale Izirali yeeŋa nyama meena a tulisi ba ayen, <>

⁴ Ate nuru baai ale gilim ba la a yaa jaa a nye ayen Juda demma a jɔk nyiŋbiiri abe ba nye ate ba a chali yɔgsum ate ba kan baga a sɛ.

⁵ Ba yaa da sagrɔba ayen ba tom a kaasi ba ale a poli ba nye dii Persia naawa Sairus naamu daaŋa po a ta ga paari Persia naawa Darius daaŋa po la.

⁶ A ta nyini piilimka diipo ate Ayasuerus a dɛ wa naamu la, ba yaa velim a te Juda ale Jerusalem demma.

⁷ Ate diipo ate Artasaset a chim Persia Naab la, Bislam ale Mitredat ale Tabeel ale ba ŋaaŋviirɔma meena a yaa jam ŋmarisi gbaŋ a te Artasaset. Ba jam ŋmarisi gbaŋka ale ka bi kaai ate ba a wi ayen Araam demma biik la.

⁸ Areyum waai ale jaa a nya ba zuk la ale Simsai gbaŋ ŋmarisidoawa a yaa weeni wie a te Jerusalem ale Naab Artasaset ayen,

⁹ Areyum waai ale jam a nya ba zuk la ale Simsai gbaŋ ŋmarisidoawa a gum chaab ale ba vaanchaama meena baai ale a bo buusa ale baai ale a nya nuruba zuk la ate ba nyini Tiripolis ale Persia ale Erek ale Babilon la, ale Iilam demma ale nyini Susa la,

¹⁰ ale mbala baai ate Osnappar a poori nyini ba po a ga kala Samaria tɛŋka po ale Yufiretis Benni Kunkɔŋ Kinkala la.

¹¹ Gbaŋka ate ba jam a tom a te wa la ale nna. Ka tama fi tomteerɔma, nuru baai ale nyini Yufiretis Benni Kunkɔŋ Kinkala la ale ŋmarisi gbaŋka de a te Naab Artasaset:

¹² Naawa a magsi ayen wa sebi kama ayen Juuma baai ale nyini fi jigi a jam tama jigi la a cheŋ ka Jerusalem a ŋman pilim boro a sɛ tukpari ale gaasa tɛŋka. Ba ŋaan gomsi nyubini ale parisaŋa a magsi kama.

¹³ A ŋman gum du, naawa a magsi ayen wa sebi kama ayen ba dan se tɛŋka ale ka parisaŋa, lampoo a kan ŋman tuni, ate naa yeri wieŋa ale a kan nye nalimnyiini.

¹⁴ Ase tama ale bo ka naab yenni po la ku kan magsi ayen ti ka a te wa zula, ti nya wanni de kama ate tama a yaali ti weeni a sak naawa,

¹⁵ ate dila ale basi ate wa kpesi nya gbaŋ sii po ate fi kokpieŋsaŋa a ŋmarisi la po. Ase fi a dan nye dila, fi ale nya ayen a nyini dila po wa tɛŋka de ka tukpari tɛŋ ale kasim a yaali wie a te nalima ale tɛŋka niŋdeerɔwa. Ka nuruma nyeka a jam toa kama ale fi ale dɛ ba niŋ. Dila ale soa ate tɛŋka a kaasi la.

¹⁶ Ti weeni naawa kama ayen ase ba dan sɛ tɛŋka ale ka parisaŋa, fi kan nya jaaboa a ta nyini Yufiretis Benni Kunkɔŋ Kinkala ŋmana.

¹⁷ Ate Naawa a yaa tom a tulisi ayen: ate fi kpagni ale Simsai gbaŋ ŋmarisidoawa ale mbala meena ale ba vaanchaama ale bo Samaria ale Yufiretis Benni Kunkɔŋ Kinkala geŋsa la: Mi a puusi ni.

¹⁸ Gbaŋ kaai ate fi a tom te ti la ba kariŋ ka kama ale weeni mu dii ale bo ka po la.

¹⁹ Mi te ka suik ate ba gisi, ale nya mɛ ayen tɛŋka de a nyini dila po wa ba gomsi kama ayen ba zɛri nalimaŋa ale ba weeni diila, dula ka tukpari ale baai ale nye ate nuruba a zɛri kpaga nɔi.

²⁰ Jerusalem jam ta ka nalima ŋaai ale pagra ate ba a nya Yufiretis Benni Kunkɔŋ Kinkala zuk ale lampoo ale tiiritaŋa meena ka ba ale jaa a tuesi.

²¹ Yɔgyɔgla de be weeni nuruma de ate ba basi tomka, ate kula ale nye ate ba basi sɛka a ga paari diipo ate m le te ba suik la.

²² Bi kpesi fidek ate fi kan zɛri wanni de. Kan basi ate nyinyigsaŋa de a chim a gum du, a kaasi naamu wie.

²³ Ase ba ale ga kariŋ Naab Artasaset gbaŋka ate wa ŋmarisi la a te Areyum ale Simsai gbaŋ ŋmarisidoawa ale ba vaanchaama a wom la, ba nye nwuli a cheŋ Juuma ale bo Jerusalem la a ga fɛ ba ayen ba basi tuini.

²⁴ Naawen yenni tuini Jerusalem po a jam doa ka dila a ta ga paari bena ŋayewa po ate Persia naawa Darius a dɛ wa naamu la.