Ezra 3 - WEN GBAŊKA

¹ Ase chiisa siyopɔiwa ale paari la ate Izirali demma a jam bo ba tɛŋsaŋa po la, nuruma a jam tigsi ka chaab ase nuru yeŋ la Jerusalem po.

² Ate Jozadak nidoabinni Jesua ale wa kaabteerɔ chaama ale Sealtiel nidoabinni Zerubabel ale wa vaanchaama a yaa piilim a boro a sɛ Izirali Wenni kuŋkuŋku kuui ate ba ale nye juka kaabka ku zuk la, a ta magsi chaab ale dii ale ŋmarisi Moosis Wen nuruwa Sinsaŋŋa po la.

³ Ba a jam a chali yɔgsum ase nuruma ale jam za a gilim ba la, alege ba sɛ kuŋkuŋ, kama nyubini zuk ale nye juka kaabka ku zuk a te Naawen ba jam nye kaabka ka saluik ale junɔi meena.

⁴ A ta vaanchaab ale dii ale ŋmarisi la, ba jam a dɛ Viitaŋa Tigini ale ŋanti baai ale magsi ayen ba pai a nye juka kaabka la dai meena po la.

⁵ Ku la ŋaaŋnyiŋ, ba jam te ba ale magsi ba te dii a magsi juka kaabka, ale Chiik Paalik kaabka ale kaab weleŋ kaai meena ate ba lueri a te Naawen, ale baai meena ate ba ta jam ase tiirim la a te Naawen.

⁶ Chiisa siyopɔiwa po ka dai dii ale dɛ niŋka la ba piilim a nye juka kaabka a te Naawen, alege dila po wa ba an diem a jam sɛ Naawen yenni nyubini.

⁷ Ba yaa jam te seerɔma ale danagrɔba ligra ale te Saidon ale Taaya demma ŋandiinta ale nyuka ale kpaam, dii ale ku basi ate ba ta nyunyoŋ daata a va Lebanon nyakpiemu po a yaa va Jopa, ase Persia naawa Sairus ale weeni diila.

⁸ Chiik kaai ale saari siyewa la bena ŋayewa po ba ale jam ŋman nya nyiŋbiiri Naawen yenni Jerusalem po la ŋaaŋnyiŋ, Sealtiel nidoabinni Zerubabel ale Jozadak nidoabinni Jesua ale ba suataŋa kaabteerɔma ale Livaima ale baai meena ale nyini yɔntini po a cheŋ Jerusalem la a piilim tomka, ba lueri baai ate ba a wi ba ayen Livaima la ate ba bena a paari pisiye ale tali la ate bala a nya Naawen yenni sɛka zuk.

⁹ Jesua ale wa nidoabilisaŋa ale wa suataŋa ale Kadmiel ale wa nidoabilisaŋa baai ale jam ka Yodavia ŋaaŋbisa la, ale Yenadad nidoabilisaŋa ale ba nidoabilisaŋa ale ba suataŋa baai ale jam ka Livaiba la meena a gum chaab a jaa nya baai ale jam boro a tom Naawen yenni tuimaŋa la zuk.

¹⁰ Ase seerɔma ale dueni Naawen yenni nyubini la, kaabteerɔma pai ba gattaŋa ale ba damunsaŋa ale Livaima. Asaf nidoabilisaŋa ale la. Ba ale ba dalinkinkeŋsa, a piilim a pak Naawen ase Izirali Naawa Deevid ale weeni diila.

¹¹ Ba yaa jam lenni yiila a pak Naawen ale weeni ayen, <> Ate nuruma meena a yaa nuemu nna yegayega a pak Naawen, dii nyiŋla ba jam dueni Naawen yenni nyubini kama.

¹² Alege kaabteerɔ kpagsaŋa ale Livaima yeeŋa nyama yega ale ga wom la, Baai ale jam a nya Naawen yekpakka la, a yaa jam kumu ate ku jueli nna yegayega ase ba ale nya ale ba ŋman pilim dueni Naawen yenni nyubini la, alege ba yega mɛ jam kasim a nuem kama ale suipeentik.

¹³ Waai an jam baga a poori suipeentik nuemka ale kumsaŋa dii nyiŋla nuruma a jam a nuem ka nna yegayega. Ate nuemka a jam a wom nna niŋniŋa.