Ester 9 - WEN GBAŊKA

¹ Yɔgyɔgla de chiisa pi ale siyewa po Adar chiika ale la, ka daa pi ale ŋata dai ate naawa wanni a jam moata ayen di tom tuima la, dai dila danni ale Juuma dachaasaŋa a jam ta yiila ayen ba ale nya pagrim Juuma zuk alege ate Juuma a gɔnti nya pagrim ba zuk.

² Juuma tigsi badek Naab Ayasuerus tɛŋsaŋa po kauk kuui meena ate ba boro la ayen ba nye kpaliŋ ale baai ale a yaali ayen ba ko ba la. Nuru an jam baga a zaani ale ba. Ba yɔgsum a jam jo nuruma meena kama.

³ Ate tɛŋka niŋdeerɔma meena ale kpaŋŋa ale ba nuru kpientaŋa ale naawa nisɔmma a jam maari Juuma. Dii nyiŋla Mordekai ate ba jam a chali yɔgsum.

⁴ Dii nyiŋla Mordekai jam ka nuru kpioŋ naawa yenni po, ate waai meena a sebi wa tɛŋka po. Mordekai pagrimu a kasim jam a gum du kama.

⁵ Juuma a yaa ko ba dachaasaŋa meena ale gebik, a kaasi ba ale nye ba dii ate ba a yaali ayen ba nye baai ale kisi ba la.

⁶ Susa jigi pagrika po Juuma a tɔgri ale kaasi ka nuruba kobsinu.

⁷ Ba jam ko Parsandata ale Dalpon ale Aspata

⁸ ale Porata ale Adalia ale Aridata

⁹ ale Parmasta ale Arisai ale Aridai ale Vaizata mɛ.

¹⁰ Ba jam ko Yammedata nidoabinni Yaman, Juuma dachiaka, nidoabilisa piwa kama, alege ba an pai ba jaaboa.

¹¹ Da dila danni ba jam weeni sak naawa nuruba dii ate ba ko Susa tɛŋka po la kama.

¹² Ate naawa jam weeni wa powa Ester ayen Juuma a ko ale kaasi ka nidoaba kobsinu Susa tɛŋ kpieŋka po ale Yaman nidoabilisa piwa. Ka boa ate ba nye kabi tintila meena naawa tɛŋka po? Yɔgyɔgla de fi a yaali ka boa? Ate mi ale nye a te fu.

¹³ Ester yaa tulisi ayen, Ku dan peenti naawa sui wa te Juuma ale bo Susa tɛŋka po la suik ate ba nye dila dek chum mɛ ate ba pai Yaman nidoabilisa piwa a yik ŋanta nyiŋ.

¹⁴ Ate naawa yaa basi ate ku nye dila dekdega. Ate naawa a yaa te suik Susa po, ate ba pai Yaman nidoabilisa piwa ale kpi la yik jaab nyiŋ.

¹⁵ Juuma ale bo Susa tɛŋka po la yaa jam tigsi badek chaab jigi yeŋ chiika da pi ale ŋanaansiwa danni Adar chiika po, ba yaa tɔgri nidoaba kobsita Susa tɛŋka po, alege ba an pai jaaboa.

¹⁶ Alege Juuma baai ale jam bo naawa tɛŋka po la a yaa tigsi chaab ba nyuvooŋa nyiŋ a yaa ayen ba nya vuusum ba dachaasaŋa jigi. Ba ko ka nuruba tusa pisiyopɔi ale ŋanu (75,000), alege ba an pai nisima a tiri jaaboa.

¹⁷ Kude jam nye ka da pi ale ŋatawa danni Adar chiika po. Ka da pi ale ŋanaansiwa danni ba yaa vuusi ale nye tigi ale ta suipeentik.

¹⁸ Alege Juuma baai ale jam bo Susa tɛŋka po la a tigsi chaab chiika daa pi ale ŋatawa danni ale ka daa pi ale ŋanaansiwa danni. Ka daa pi ale ŋanuwa danni ba vuusi kama ale nye tigi ale suipeentik.

¹⁹ Dila nyiŋ ale soa ate Juuma ale bo tɛŋ fiisaŋa po la, a teeri Adar chiika ka daa pi ale ŋanaansiwa danni ase vuusum ale a nye tigi dai, ale a te chaab tiirita la.

²⁰ Ate Mordekai yaa ŋmarisi wieŋa de a dueni, ale tom gbaŋsa a te Juuma meena ale bo Naab Ayasuerus tɛŋka po la, sii ale bo niŋniŋŋa ale farafara.

²¹ A weeni ayen ba kpesi Adar chiika daa pi ale ŋanaansiwa ale ka daa pi ale ŋanuwa ate ku chim tigi dɛka dai bein meena.

²² Diipo ate Juuma a yaa nya vuusum ba dachaasaŋa jigi, chiik kala po mɛ ate ba niniŋŋa a tulim chim suipeentik, ba kumsaŋa mɛ chim masim ate ba a dɛ. Wa ŋmarisi kama ayen ba basi ate ku chim suipeentik dai a tom ŋandiinta a te chaab ale a te ŋanjaksaŋa mɛ tiirita.

²³ Juuma yaa jam va Mordekai ale weeni diila ate ku yaa chim ba tigi bein meena.

²⁴ Dii nyiŋla Yammedata nidoabinni Yaman, Agag denɔwa ale jam ka Juuma meena dachiak la, yaa jam nak ka gbaŋ a lueri dai ayen ba kaasi Juuma, wa jam gomsi kama ayen wa nueri ba meena.

²⁵ Alege naawa ale ga wom la, wa yaa basi ate ba ŋmarisi gbaŋsa ayen popola baataŋa de ate Yaman a yaali ayen wa ko Juuma la, ku tulim ji wadek zuk, ate wa ale wa nidoabilisaŋa ba pai ba a yik ja woŋ nyiŋ.

²⁶ Dila nyiŋ ale soa ate ba a wi daaŋa de ayen Purim la. Dii nyiŋla ba nak ka gbaŋ a lueri daaŋa de. Dii meena ate ba ŋmarisi gbaŋka de po la nyiŋ, ale dii ate ba nya la nyiŋ, ale dii ale nye ba la nyiŋ.

²⁷ Ate Juuma a yaa basi ate ku chim ŋiak wari doa ayen ba ale ba ŋaaŋbisaŋa ale baai meena ale gum ba po la ayen ba kasim a teeri daaŋa de ŋayewa bein meena a ta va ba le weeni ba ayen ba nye diila ale diipo ale magsi ba nye la.

²⁸ Daaŋa de magsi ka ba a teeri abe ba kpesi nyini ŋaaŋbisa po meena, dɔkdem meena, a nyini tɛŋka meena po ale tɛŋ kpieŋsaŋa po meena. Ate Purim daaŋa de Juuma kasim a teeri ŋa abe ba buuni po a kan baŋ ŋa wari ya.

²⁹ Dila nyiŋla naawa powa Ester, Abiyail liewa, ale Mordekai Juuwa yaa ŋmarisi gbaŋ ale pagrim a siak kaai ale saari siye a weeni Purim wari la.

³⁰ Ate Mordekai tom gbaŋsa a weeni Juuma meena ale bo Naab Ayasuerus tɛŋsa kook ale pisiye ale siyopɔiwa po la ayen ba boro ale suiyɔgni.

³¹ Abe ba basi ate Purim daaŋa de a zaani ase diipo ate Mordekai Juuwa ale naawa powa Ester a weeni ba la. Ba nye dila dek, ase ba ale nye ŋiak wie nŋala a te badek ale ba ŋaaŋbisaŋa a ta va diipo ate ba a bobi noaŋa ale a kum la.

³² Ester ale weeni diila ba yaa maari Purim tigini, ate ba jam ŋmarisi ku a nyo gbaŋ po a dueni.