Ester 8 - WEN GBAŊKA

¹ Dai dila danni Naab Ayasuerus yaa pai Yaman Juuma dachiaka yenni a te wa powa Ester. Ate Mordekai yaa jan jam naawa niŋ, dii nyiŋla, Ester jam weeni wa wa ale ka waai a te wa la kama.

² Ate naawa yaa jam yeeri wa nifelinni dii ate wa jam tuesi Yaman jigi la a pai te Mordekai. Ester yaa basi ate Mordekai a nya Yaman yenni zuk.

³ Ester yaa ŋman biisi ale naawa ale lo tɛŋ wa naŋsa po a saalim ayen wa nye wari ate ku kpeglim biem buui ate Yaman waai ale nyini Agag buuni po la, dii meena ate wa nye Juuma la.

⁴ Naawa yaa pai wa ligmɔniŋ tachekka a dak Ester nyiŋ ate wa yiti a zaani naawa niŋ.

⁵ Wa yaa weeni ayen, Ku dan peenti naawa sui ate wa ta ŋmanteka ale mu ale poli ayen ku ka wamaŋ a magsi wa nye. Ku be dan peenti wa sui mɛ, wa be ŋmarisi gbaŋ a kaasi Yammedata nidoabinni Yaman, Agag denɔwa ale ŋmarisi dii, ayen ba ko Juuma meena naawa tɛŋsaŋa meena po la.

⁶ Mi ale nye ka sɛ a nya biemu de ate bu jam m nuruma zuwa?>>

⁷ Ate Naab Ayasuerus yaa weeni wa powa Ester ale Mordekai Juuwa ni nya ba pai Yaman a yik ka jaab nyiŋ ate wa kpi wa le nye dii a ta va Juuma jigi la nyiŋ, alege pai wa yenni a te Ester.

⁸ Yɔgyɔgla de ŋmarisi gbaŋ naawa yuenni nyiŋ a magsi chaab ale Juuma, a ta va dii ale nala a te fu la, abe fi lik ka naawa yuenni nyiŋ. Jaabuui ale ŋmarisi naawa yuei nyiŋ, ale ji ale wa nifelinni la a kan chim kinla nyiŋŋa.

⁹ Ate ba yaa jam wi naawa gbaŋ ŋmarisidoama, chiisa sitawa po ale la, ku be jam ka Sivan chiika ka daa pisiye ale ŋata dai ate ba yaa jam ŋmarisi a ta va dii meena ate Mordekai a weeni Juuma ale kpaŋŋa ale nuru kpientaŋa ale baai ale chim niŋdeerɔba a nyini India ale Kus tɛŋsaŋa ale paari kook ale pisiye ale siyopɔiwa la po. Gbaŋsaŋa a jam ŋmarisi kama ate tɛŋ meena ale ka biik ale ba le a ŋmarisi diila, ate Juuma mɛ ale ba tɛŋka biika ale ŋmarisi diila.

¹⁰ Mordekai yaa basi ate gbaŋsaŋa ba ŋmarisi si Naab Ayasuerus yuei nyiŋ ale ji si ale naawa nifelinni. Ba yaa pai gbaŋsaŋa a te tuimtomdisa ate ba cheŋ ale wusuma ŋaai ate ba wuuk a magsi naawa a chari waai meena.

¹¹ Gbaŋsaŋa de yaa basi ate ba jam miŋ chak kama ayen naawa ale te suik tɛŋsaŋa meena po ayen ba gomsi badek a magsi. Ba dan nye kpaliŋ ale ni, ba dan poom nyini tɛŋka kauk kuui meena, nama mɛ a kpaliŋ ale ba. Ni ko ba ale ba pooma le ba bisaŋa abe ni kɔlim ba dachaasaŋa.

¹² Dai dii danni ate naawa a lueri ayen Juuma a nye kpaliŋka Naab Ayasuerus tɛŋka po meena, chiika daa pi ale ŋata dai chiisa pi ale siyewa po, Adar chiika ale la.

¹³ Gbaŋka ate ba ŋmarisi wanni a te tɛŋka meena la a yaa jam paari nuru meena ayen Juuma a gomsi badek a magsi ate ba nye kpaliŋ ale ba dachaasaŋa.

¹⁴ Tuimtomdisaŋa yaa do wusumaŋa a nyini ase naawa ale weeni diila. Gbaŋka a jam te nyini ka Susa tɛŋka.

¹⁵ Mordekai yaa basi naawa ale nyini, wa jam vuk ka naam zutɔk ate ba pai ligmɔniŋ a nye ale jo garuk woŋ ate ku ta sobluk ale peeluk ale ŋmazuk garuk a chim mɔnuŋ. Ate Susa tɛŋka a yaa a nuem ale suipeentik.

¹⁶ Juuma jigi ku jam chim ka suipeentik ale masim ale mariŋka ale zula dai.

¹⁷ A nyini jigi meena, ale tɛŋ kpieŋsa po meena ate naawa gbaŋka a paari la. Suipeentik ale mariŋka ale jam bo Juuma po ate ba yaa jam nye tigi, ate tɛŋsa si chaab a yaa jam chim Juuba, dii nyiŋla ba jam a chali ka Juuma yɔgsum.