Ester 7 - WEN GBAŊKA

¹ Naawa ale Yaman yaa cheŋ ayen ba dɛ ale Ester.

² Ase ba ale boro a nyu daamu daa ŋayewa danni la, naawa a ŋman bek Ester wa powa ayen ka fi yaalika ale boa? M le nye te fu. Dan poom ka naamu kauk m le te fu.

³ Ate naawa powa yaa tulisi ayen, ase m jiirim a dan jo fu, naaba, ate fi dan mariŋ basi ate m vua, mi ale a yaali diila, ale la abe fi vari m nuruma a basi.

⁴ Mi ale m nuruma ba da kama ayen ba kaasi abe ba tɔgri ti. Ase ba dan da ti kama ase yɔm la, m ti nye ka diki m ti kan daani fu ku nyiŋŋa, alege ba a yaali ba kaasi ti kama.

⁵ Naab Ayasuerus yaa tulisi a weeni wa powa Ester ayen ka wana? Nuruwa bo ka be, waai ale nye wanni de la?

⁶ Ester yaa tulisi ayen jabioku de ale dachiaka ale gaasa nuruwa ale Yaman. Yaman yaa jam a chali yɔgsum naawa ale wa powa niŋ.

⁷ Ate naawa yaa basi daamu nyuka ale suipuurum a yaa ga jo wa yenni kadukka po. Alege Yaman ale miŋ ayen naawa a nye wa popola kama la, a yaa wari ŋaaŋ ayen wa saalim naawa powa Ester.

⁸ Naawa ale jam ŋman nyini wa yenni kadukka po a nyini a jo daamu nyuka jigini la Yaman yaa lo tɛŋ Ester niŋ kauk kuui ate wa kala la, naawa yaa weeni ayen wa a yaali mi powa kama mi niŋ m yenni po? Ase wieŋa ale ga nueri naawa nɔnni po la ba yaa lik Yaman ninaŋa.

⁹ Yarbona, tomteerɔma wanyi yaa weeni naawa ayen Yaman a sɛ jaab ate wa wɔŋa ase anamagib kook la wa yenni ayen wa pai Mordekai a yik du waai ale biisi a maari naawa la, ate naawa yaa weeni ayen ni pai Yaman dek a yik du.

¹⁰ Ba yaa pai Yaman a yik jabuui ate wa ti a magsi Mordekai la. Ate naawa sui yaa yɔk.