Ester 5 - WEN GBAŊKA

¹ Daa ŋatawa danni Ester yaa jam jo wa naam gattaŋa a jo za naawa yenni suŋsuŋ a nya naamu dɔkku naawa mɛ a jam bo ka dɔkku po a kala wa naam zukpaglika zuk, a nya tuoku nɔi geŋ.

² Ase naawa ale nya naawa powa Ester a za peelim la, wa jiirim yaa yik wa, ate naawa yaa pai wa naamu doani dak Ester nyiŋ. Ester a yaa forisi paari a tiri doani zukku.

³ Naawa yaa weeni wa, <> Ka fi beŋŋa ale boa? Dan poom ka m naamu kauk m le te fu.

⁴ Ester yaa tulisi, ku dan peenti naawa sui, fi ale Yaman abe jam jinla m nye ka ŋandiinta ayen m te fu.

⁵ Naawa yaa weeni ayen ta Yaman a jam nwuli ase Ester ale weeni diila, naawa ale Yaman yaa jam tigi dii ate Ester a gomsi la.

⁶ Ate naawa yaa weeni Ester diipo ate ba boro a nyu daamu la ka fi yaali ka ale boa? Ku ale nye a te fu. Ka fi beŋŋa ale boa? Dan poom ka m naamu geli m le te fu.

⁷ Ester yaa tulisi ayen, M yaalika ale m beŋŋa ale nna,

⁸ ase mi dan nye ate naawa sui a yɔk alege ate wa sui mɛ a peenti wa nye mi ale a yaali diila a te mu, wa le Yaman chum jam ŋandiintaŋa tigini ate m yaa weeni wa.

⁹ Yaman yaa nyini peelim ale mariŋka ale suipeentik; Alege Yaman ale jam nya Mordekai Naawa yenni tuoku nɔi ate wa an yiti yaase, wa sak zula la, wa sui yaa puuri ale Mordekai nna yegayega.

¹⁰ Yaman yaa jam yik wadek a kuli yeri, wa yaa tom wi wa doama ale Zeres wa powa.

¹¹ Yaman yaa zak wadek zaani wa jigsika nyiŋ, wa bisa ale piisi dii a te wa la, naawa ale te wa kpaŋta zuak dii, wa ale chim nuru dek a gaam naawa kpaŋŋa meena dii.

¹² Yaman a weeni ayen, Ester naawa powa an wi waai ate wa va naawa a jam wa tigini ate wa nye la ka mi dek nyiini chum mi ale ŋman pilim a cheŋ ale Naawa.

¹³ Alege nya kude an chim wari a te mi ase mi ale nya Mordekai Juuwa ale kala naawa tuoku nɔi la.

¹⁴ Zeres wa powa ale wa doama meena yaa weeni wa ayen, basi ate ba ti jaab ate wa wɔŋa ase anamagib kook la, ate saluik fi weeni naawa ate ba pai Mordekai a yik du, abe fi va naawa a cheŋ dɛka jigini ale suipeentik. Yaman yaa nya kude ka popola maŋsa ate wa basi ate ba ti jaamu.