Ester 3 - WEN GBAŊKA

¹ Wieŋa de ŋaaŋnyiŋ Naab Ayasuerus yaa gum kpaŋta du a te Yammedata nidoabinni Yaman ate wa nyini Agag buuni po la ate wa jueli kali kalik kaai jigi ale gaam naabisa meena kalisa jiga la.

² Ate naawa tomteerɔma meena, baai ale jam bo naawa tuoku nɔi la koori a zuli Yaman. Ka naawa ale te ba suik ayen ba nye dila. Alege Mordekai an jam koori ya alege ka wa zuli wa.

³ Ate naawa tomteerɔma baai ale jam bo naawa tuoku nɔi la, a weeni Mordekai, ayen ka boa ate fi a zɛri naawa ale weeni diila?

⁴ Ku yaa ale jam taam la, ase ba le jam a biisi ale wa daa meena la, alege wa an jam wom ba la, ate ba yaa weeni Yaman, ayen ba nya ase wa le nye wari ya. Dii nyiŋla, wa weeni ba kama ayen wa ka Juu denɔ.

⁵ Ase Yaman ale jam nya ayen Mordekai an koori alege ka wa zuli wa la Yaman sui yaa jam puuri.

⁶ Alege wa le jam miŋ Mordekai nuruma ale ka baai la, wa an jam a yaali ayen wa ko Mordekai nyiini. Yaman goanti jam a yaali ka suik ayen wa ko Mordekai nuruma Juuma meena Ayasuerus tɛŋka po.

⁷ Piilimka chiika po, Nisan chiika ale la, bena pi ale ŋayewa po ale la ate Naab Ayasuerus a jam de wa naamu la, ba yaa jam a nak gbaŋ Yaman niŋ ayen ba lueri dai ale chiik ate ka yaa jam lo chiisa pi ale siye wa zuk, Adar chiika ale la.

⁸ Yaman yaa weeni Naab Ayasuerus ayen nuruba gela ale waaŋ bo tɛŋka po meena ale sinsaŋŋa ŋa chaab ate ba kisita wieŋa mɛ a chim ŋa tɔga a te nuruma meena, alege kan va fi wieŋa dila nyiŋ ku an magsi ayen naawa a basi ba.

⁹ Ase naawa a dan siak, basi ate fi nisɔmma ŋmarisi a weeni ayen ba kaasi ba. Ate mi ale tuni ba kpana boorik dobrim tusa pi (10,000) a te baai ale ba nya tuini de zuk nisima po ate ba ta cheŋ ga dueni ligra jigini naab yenni po.

¹⁰ Ate naawa a yaa yeeri wa nifelinni a te Yammedata nidoabinni Yaman, Agag denɔwa Juuma dachiaka suik.

¹¹ Naawa yaa weeni Yaman ayen, <>

¹² Ba wi naawa gbaŋ ŋmarisidoama ate ba jam piilimka chiika ka daa pi ale ŋatawa danni, ate ba ŋmarisi a ta va chaab ale dii meena ate Yaman a weeni, naawa kpaŋŋa, ale nuru kpientaŋa ale jam bo tɛŋka meena po la, ale baai ale a nya nuruba zuk jigi meena tɛŋka po a ta va ŋmarisika de la, ate nuru meena ale wa tɛŋ biik ka Naab Ayasuerus yuei nyiŋ. Abe wa ji nifelinni gbaŋsa po.

¹³ Tintomiŋ yaa jam cheŋ naawa tɛŋsaŋa meena po a te nɔi ayen ba kaasi, ba ko, ba basi ate Juuma meena kpi, paalisa ale ŋankpagsa ale bi fiisa ale nipooba meena, chiisa pi ale siyewa po Adar Chiika, ka daa pi ale ŋatawa danni, ba ko ba meena, abe ba kɔlim ba ŋantaŋa.

¹⁴ Gbaŋka ate ba ŋmarisi wa wanni a nyoro a te waai meena tɛŋka po la ate ŋa paari nuru meena, ayen ba gomsi badek a magsi da dila danni.

¹⁵ Tintomiŋka a nyini ka peelim nwuli ale naawa wanni, wanni a jam te nyini ka Susa naawa yenni. Naawa ale Yaman a jam kali ka tɛŋ ayen ba nyu: Ate butimka a jan jam Susa tɛŋka po.