Efisos 6 - WEN GBAŊKA

¹ Bisa, ni a zuli ni nyam ale ka dila ale magsi.

² <> (Nyinika 20:12) Ale ka piilimka sinsaga ale pumpuulima ale la.

3 <> (Nyinika 20:12)

⁴ Koba, ni kan nye ate ni bisaŋa sue a puuri. Alege, ni a nya ba zuk abe ni a sak ba, abe ni a kaam ba ase ti Naawenni ale sak ti diila.

⁵ Yɔm, ni a wom ni tɛŋzuk de kpaŋŋa noa ale zula ale yɔgsum chalika, ale wensie a nyini ni suiniima po ase ni ale a zuli Kirisita diila.

⁶ Yɔm gela a kasim a tom ka nna yegayega ba nyama nimbie po, alege ba dan ga basi ba ale cheŋ, ba kan ŋman a tomu. Ku a fɛ kama ayen ba kan a nye dila. Ni be seba ayen ka Kirisita ale soa ni yɔgyɔgla de. Dila nyiŋla ni kasim pii nyiŋ a tom dii ate wa a yaali la a te wa.

⁷ Ni a tom ni tuimaŋa ale suipeentik, dii nyiŋla ni kan tom a te daa nurubisa nyiini, alege ka ti Naawenni maara.

⁸ Ni be seba ayen ni dan poom ka yɔm yaase ni daa yɔmma alege ni a tom tuimaŋsa a te wa, wa le tuni ni ni tuimaŋa nyiŋ.

⁹ Nama baai mɛ ale ka yɔm nyam la, ni a poli ayen nama ale ni yɔmma meena a ta ka nyɔnɔ wanyi waai ale bo wenŋmazuk la. Dila nyiŋla, ku a fɛ ate ni a nya ba zuk nalimnyiini abe ni kaa a nyigsi ba. Buusa boka jigi, Wen daa waai ale a yaali nuruba gela ale a basi gela la.

¹⁰ Dii nyiŋla nama ale ti Naawenni ale ka bunyi la, ni baga kama a tuesi wa pagrimu yegayega gela.

¹¹ Ni dan kasim a nya pagrim buui ate Wen pai a te ni la jigi, jabioku a kan baga a paasi ni diipo diipo.

¹² Boan nyiŋŋa, ti kan yaali Wen pagrimu ayen ti a kpaliŋ ale ka nuruba, alege ti a yaali ayen ti a kpaliŋ ale ka chichirik pagrisaŋa ale pagritaŋa tɔgatɔga ale a tom tuim kaasima a bo wenŋmazuk la.

¹³ Dila nyiŋ, ni kpesi yik Wen pagrimu a tanla nalimnyiini, ate dabioku a dan jam abe ni baga a nak dɛ dachiaka meena.

¹⁴ Dila nyiŋ, ni gomsi nidek giŋgiŋ ale wensie ase chiak gbain ale bobi ni chaasa la, abe ni basi ate weleŋsa lik ni kuusa,

¹⁵ abe ni kasim gomsi magsi ate ni pai Wen wanni ase nuensa la ate ni a sak nuruba Wen wamaŋsaŋa wie. Ni dan sak ba ate ba wom ŋa, Wen ale te ba suiyɔgni.

¹⁶ Diipo meena wuu, ni basi ate ni siaka a chim jachɔgsim ate ni pai lik nidek ate jabioku dan tɔŋ wa piemaŋa abe ŋa kan nye ni wari ya.

¹⁷ Abe ni pai ni varibasika ate ni nya la, a chim zukchin, abe Wen wanni mɛ a chim gebi kpieŋ kaai ate Wen Chiika a te ni la. Ŋala ale basi ate ni nak a dɛ ni dachaasaŋa.

¹⁸ Ni kasim a puusi a te Wen wieŋa de nyiŋ, ate wa baga a maari ni. Ni basi ate wa Chiika a sak ni dii ate ni ayen ni puusi a te wa la. Ni kpesi nidek nalimnyiini abe ni ta suduŋni nna yegayega, abe ni a puusi a te wa ate wa maari wa nuruma meena.

¹⁹ Ni be ŋman a puusi Wen a te mi mɛ, ate wa te mu popo pagrim ate mi a sak nuruba yegayega wa wamaŋsaŋa wie. Wen jam pai wa wamaŋsaŋa a suk kama a ta jam paari jinla, ate wa yaa yeeri ŋa a ta nyini peelim yɔgla.

²⁰ Nuruba ale yik mi a lik Wen wamaŋsaŋa de nyiŋ alege m za ka Yeezu naŋkula po. Ku be magsi kama ayen mi a sak baai meena ale bo dela jigini la Wen wamaŋsaŋa wie meena abe m kan peri dinyi mɛ la yaase m chali yɔgsum.

²¹ M seba nama ale a yaali ayen ni wom mi ale a tom diila kama. Ka dila nyiŋ ale soa ate mi a tom Tikikus ni jigi. Wa ka ti vaanchaama po wanyi waai ate ti ta yaalika ale wa ate wa a tom ti Naawenni tuimaŋa mɛ nalimnyiini la. Ka wala le wa weeni sak ni mi mɛ ale a tom ate ku a cheŋ diila.

²² Ka dila ale soa ate mi a tom wa ni jigi ayen wa weeni ni tama ale a tom diila ate ku te ni nyiŋbiiri ate nama mɛ a tom ni tuimaŋa a cheŋ.

²³ Ti Kowa Wen ale ti Nyɔnɔwa Yeezu Kirisita le basi ate ni meena ale ni vaanchaama meena ate ni ta siaka ale ba nalimnyiini, a boro ale suiyɔgni abe ni ta yaalika ale siaka ale chaab nna yegayega.

²⁴ Wen ŋmanteka le boro ale baai meena ale ta yaalika ale ti Nyɔnɔwa Yeezu Kirisita la, yaali kaai ale kan ta kpeglimka la.