Efisos 5 - WEN GBAŊKA

¹ Yɔgyɔgla de nama ka Wen dek bisa baai ate wa yaali nna yegayega la. Dila nyiŋla ni be pii nyiŋ nna ate ni a tomsi wa.

² Kirisita ale kpi te ti diila a nye se ka Juuma ale jam a pai ŋan masisa ale duŋsa a kaabi a te Wen la. Kirisita nye ate ka Wen sui yaa peenti a sak ti ayen wa a yaali ti kama. Ni basi ate ni yaalika a chim ni niŋ wari ase Kirisitawa yaalika ale tama ale dɛ niŋ diila.

³ Yɔgyɔgla de ni ka Wen nuruba. Kula abe kan ŋman a magsi ayen ni a biisi nipok yaalik ale daŋta tuima ale butuem wie ale chaaba.

⁴ Ku be kan ŋman a magsi mɛ ayen ni a biisi nɔi biem a yaase betta biik a diini, alege ku magsi ka ni nyiem kasim a te Wen jiam.

⁵ Ni seba nalimnyiini kama ayen baai meena ale ka nipok yaalisa ale tuim daŋtisa nyam ale butueta nyam la a kan baga a jo Wen ale wa nidoabinni Kirisita naamu po. Butueta nyam a nye se ka nuru baai ale a kaabi bɔgta la ase ba nin yaali ba ŋantaŋa a gaam Wen.

⁶ Ni kan a wom betta nyam wie ŋaai ale ŋa paasi ni la. Wen sui ale puuri ale bala chaab. Wa le jam te ba ka waalika dai yeŋ po, dii nyiŋla, ba kan zuli wa.

⁷ Dila nyiŋla, ni kan te ni niŋ bo ale baai ale a biisi bi sila chaama la po.

⁸ Ase nama ale jam kan seba Wen diipo la, ni bo ka legi po, alege yɔgyɔgla de nama ka Naawen nuruba, ni yaa bo ka danni kantueŋka po. Ka dila ale soa ate ku a fɛ ayen ni bo danni kantueŋka po la.

⁹ Nuru bala chaab a kasim a tom ka tuimaŋsa a te Wen. Ba be chim ka nuru maŋsa mɛ. Ba chim ka nuru baai mɛ ale a biisi wensie la.

¹⁰ Ni be pii nyiŋ ate ni a tom tuim ŋaai ale a nye ate ti Naawenni sui a peenti la.

¹¹ Ni kan ta wari a nye ale wie ŋaai ale kan ta kiri ate nuruba a tom la. Dii nyiŋla, ka nuru baai ale bo legini po la ale a tom ŋala. Alege, ni ta bala chaab nyini legini po a nyini danni kantueŋka po.

¹² Ku ka chivie ate nuru weeni ba ale suk a nye ŋaai la.

¹³ Ni dan nye ba dila, ku a nye ase ba tuimaŋa a yaa nyini ka kantueŋka po ate waai meena baga a nya ŋa la.

¹⁴ Wenbinni a dan ga pusi legini a kan ŋman a boro. Dila ale soa ate nuru wanyi weeni ayen, <>

¹⁵ Dila nyiŋ, ni be kpesi nidek ale ni boka po ale ka dii ale nuruba la. Ni kan boro ase betta la, alege ni boro ase yam nyam la.

¹⁶ Vaaŋa de po nuruba yegayega ale a tom tuimbaata. Alege nama, ni a gisi suik tii po ate ni ayen ni kasim a tom tuimaŋsa la.

¹⁷ Ni kan a nye se ni ka betta la, alege ni a gisi dii ate Wen a yaali ayen ni a tom a te wa la.

¹⁸ Ni kan pai nidek a te daamoa ate bu kaasi ni, alege ni pai ni dek meena a te Wen Chiika.

¹⁹ Ni kasim a yi yiila ŋaai ate Wen Chiika a te ni ayen ni a yi la abe ni a te ti Naawenni pimpauk ni suiniima po.

²⁰ Ti kowa Wen a tom tuima ka nna yegayega a te ti. Dila nyiŋ la, ni kasim a te ti Kowa Wen jiam ti Nyɔnɔwa Yeezu Kirisita yuenni nyiŋ.

²¹ Ni basi ate ni popolaŋa meena a chim popola yena, ate ni baga a te Kirisita zula.

²² Pooba, ni siak a te ni chorɔba ase ni ale a siak a te ti Naawenni diila.

²³ Chorɔwa ta pagrim kama wa powa zuk ase Kirisita ale ta pagrim Kirisita bisaŋa ale a tu chaab la meena zuk diila. Bala a nye se ka wa nyiŋka la ate wa yaa vari ba ba tuimbaataŋa po a basi.

²⁴ Dila nyiŋla, ku a fɛ kama ayen Kirisita bisaŋa ale a tu chaab la a siak a te Kirisita. Suik kula po me, pooba mɛ a siak meena a te ba chorɔba.

²⁵ Nama baai ale ka chorɔba la, ku a fɛ kama ate ni ta yaalika ale ni pooma ase Kirisita ale a yaali baai meena ale a va wa la. Wa kpi kama a te ba ate ku sak ba wa yaalika ale soa dii ba jigi la.

²⁶ Kirisita nye nya kude ayen ku sak ayen wa pai Kirisita bisaŋa ale a tu chaab la a te ka Wen, wa be pai ka Wen wanni a biisi yaa pai ba te Wen la. Wa be liŋ pai ka nyiam a sugri ba alege nye dila.

²⁷ Kirisita a nye wieŋa de kama, ayen wa baga Kirisita bisaŋa ale a tu chaab la meena ale ba nalimu ale ba weleŋsaŋa ale ba ale chim nuru maŋsa la a te wadek, ate wa kan ŋman nya ba kaasuŋku.

²⁸ Ku a fɛ kama ate chorɔba ta yaalika ale ba pooba ase ba nidoama ale a yaali badek diila. Wa dan ta yaalika ale wa powa, ku a nye se wa a yaali wadek mɛ kama la.

²⁹ Waai an kisi wadek nyiŋŋa, wa a nya ka zuk ale a te ka ŋandiinta kama. Kirisita mɛ abe a nya Kirisita bisaŋa ale a tu chaab la zuk ka dila.

³⁰ Wa ta yaalika ale ba ka nna yegayega, dii nyiŋla ti a nye se ka wa nyiŋka la.

³¹ <> (Piilimka 2:24)

³² Wa susugi ale bo ŋmarisika de po. Mi be ale seba ku kiri ale diila ale, Nipok ale wa chora ale ba chim bunyi diila, a sak ti kama ayen Kirisita ale Kirisita bisaŋa ale a tu chaab la meena mɛ ka bunyi.

³³ Ku be ka dila nama mɛ jigi ayen, ku a fɛ kama ate chorɔba a yaali ba pooba ase ba ale a yaali badek diila abe, pooba mɛ a te ba chorɔma zula.