Efisos 4 - WEN GBAŊKA

¹ Mi waai ate ba yik mu a lik ti Naawenni ŋaaŋ vaka nyiŋla, ale a saalim ni ayen ni a va wa a magsi dii ale magsi ayen ni a va wa la. Wen ale wi ni ayen ni a va wa dila.

² Ni kasim a zaab nidek nuruba niŋ, abe ni seba nidek taka, abe ni ta chichiiba diipo meena. Ni a maari chaab, ate nuruba seba ayen ni ta yaalika ale chaab kama.

³ Wen Chiika ale basi ate ni ta nɔiyeŋ ale chaab, ale ŋman basi ate ni boro ale suiyɔgni ale chaab mɛ. Ni nyiem be kasim pii nyiŋ ate ni a nye dila ale chaab.

⁴ Wen Chiika ka kanyi dekki. Baai meena mɛ ale ta siaka ale Yeezu la ka nuru yeŋ. Wen be lueri ni kama me ayen ni ta yiila wa jigi, yiila ŋaai ale chim yiili yena la.

⁵ Ti Naawen ka wanyi dekki, ale tama ale ta siaka ale wa diila mɛ ka bunyi. Ba le pai nyiam a te ni soka diila mɛ ka bunyi.

⁶ Wen, waai ale ka wanyi dekki la, ka nurubiik meena Ko. Wa be ka waai meena Wen. Wa bo ale waai meena kama a pai ba meena a tom tuima.

⁷ Ti wanyi wanyi potim tuesi ŋmanteka kama a magsi chaab ale Kirisitawa tiirimu ale ka diila.

⁸ Dila ale soa ate ku weeni ayen, <> (Yiila 68:18)

⁹ Nama a poli ba le ŋmarisi ayen, <> la kiri ale boa? Ku kiri ale wa liŋ nyini ka dula jigini a siŋ jam tɛŋzuk de a yaa kpi ate ba gu wa.

¹⁰ Dila nyiŋ, waai abe ale siŋ tɛŋzuk de la, ka wala dekdega abe ale ŋman jueli wenŋmazuk niŋniŋka, a gaam taam dula jigini ayen wa sueri tɛŋzuk de meena.

¹¹ Be ka wala ale pai tiirimu a te nurubiik meena a yaa basi ate ba gela tuimtomdɔba, ba gela Wen biisiteerɔba, ba gela baai ale a mooli Wen wamaŋsaŋa wie la, ba gela Kirisita bisaŋa ale a tu chaab la kpaga, ba gela mɛ sagrɔba.

¹² Wa nye nya kude kama ayen wa gomsi baai meena ate Wen soa la a magsi ate ba a tom Kirisita bisa tuima. Ate ku basi ate Kirisita bisaŋa baai ale bo jigi yeŋ ase wa nyiŋka la ta pagrim nalimnyiini.

¹³ Ase ti dan ta siaka ale Wen nidoabinni a gumdu yegayega a jam seba wa nalimnyiini, ti meena le ta nɔiyeŋ ale chaab kama. Ase ti dan a va dila, ti le chim Kirisita biik sii ale pagi magsi ale ta yam yegayega la abe ti ŋman chim ase Kirisita ale kasim ka nuru maŋ meena diila.

¹⁴ Dila abe dan nye, ti kan ŋman a nye ase bisa la ale ti siaka ale wa. Nuru bala a nye se ka ŋaaruŋta ale bo nyiam po ate vioku chiak ti a ta a ga niŋ ale ŋaaŋ la. Sagrɔ baai ale kan seba Wen la, a nyiem kasim a paasi ba kama ale a yaali mɛ ayen ba nye ate ba nyini Wen wensie suiku po a nyini. Sagrɔma de nina a nyiem ale kasim muni ale tuimbaata meena tomka ale a paasi nuruba ba chaab ate ba a gum ba po a tom ŋa.

¹⁵ Alege, ku a fɛ ate ti chim nuru pagrisa, ate sagrɔma de a kan ŋman baga a daani ti. Kirisita ale ti niŋdeerɔ. Ni basi ate ti nyiem a biisi wensie abe ti a yaali chaab, ate ti chim ase wadek la.

¹⁶ Ti a nye se ka wa nyiŋka la. Wala ale waai ale yik ti a tom chaab ase kunaŋa ale yik nyiŋka a tom chaab diila. Nyiŋka kabtaŋa meena abe dan a tom dii ale magsi la ale yaalika, ka a chim kama a ta pagrim.

¹⁷ Ti Naawen yuenni nyiŋ, ate m pai a kaam ni ayen, ku a fɛ ayen ni kan te ni boka nye ase baai ale kan seba Wen la boka. Ba ale a poli diila ka kiri ya,

¹⁸ ba ka popola maŋsa mɛ. Ba tue kpari ka nna yegayega ate ba an baga a miŋ Wen ya. Dila nyiŋ ale soa ate wa an baga a pai wa nyuvuri dii ale kan ta kpeglimka la a te ba.

¹⁹ Ba kasim a tom ka daŋta tuima alege kan chali chivie ale ŋa. Ba kasim a tom ka wabaata tuima. Ba kasim a yaali ayen ba a tom ka ŋala chaab diipo meena.

²⁰ Baai ale sak ni ayen ni a va Kirisita la, an sak ni ayen ni a tom ka ŋala.

²¹ Ba le sak ni wa wie la, ba weeni ni wa wensieŋa wie kama, ate nama wom ale ta siaka ale ŋa a va wa.

²² Yɔgyɔgla de ni pai ni nye kpakka a basi, dii nyiŋla kala ale a basi ate ni a va nidek pimpaasima yaalika ale pai ni a zaani suik kuui po ale ta ni a cheŋ kaasuŋ jigi la.

²³ Ku a fɛ ate ni basi ate Wen tagri ni popola meena abe wa nye ate ŋa chim popola paala.

²⁴ Ni nye paalik kaai ate Wen pai te ni la, le basi ate ni chim ase wadek la. Wen ka wensie dek weleŋsa nyɔnɔ.

²⁵ Ku a nye se ni meena a chim ka Kirisita nyiŋka la. Dila nyiŋla, ni kan ŋman a velim a te chaaba, alege ku a fɛ ate ni kasim a biisi wensie ale ni vaanchaab.

²⁶ Ni sue dan puuri ni kan nye biemmoa. Ni kan te wenni siŋ ale ni sue diem a puuri.

²⁷ Ni kan te jabioku suiwa ayen wa a nye ate ni a tom tuimbaata.

²⁸ Ni dan ka zueba, ni be basi ni zummu, abe ni a dɛ nidek nyiŋ wulum ŋanta. Ni dan a nye dila, ni le baga pai ŋanta bala a maari niwomma.

²⁹ Ni kan a biisi biem wie a te chaaba, alege ni basi ate dii meena ate nama a biisi la a ta ŋmanteka ale nyiŋbiiri, ate ku maari baai ale a wom ni la.

³⁰ Ni kan daani Wen Chiika. Boan nyiŋŋa, Wen Chiika ate Wen te ni la, ku a sak kama ayen wa soa ni kama a ta ga paari diipo ate Wen ayen wa jam da tuesi ni a basi la.

³¹ Ni be pai ni suipuurumu ale ni popo soblimu a basi. Ni basi nuemka ale nuruba leeta. Ni kan kisi chaaba.

³² Ni dan basi ŋala, ni be chim nuru baai ale seba badek taka la abe ni ta jiirim ale chaab. Yeezu Kirisita kummu nyiŋ, ale soa ate Wen a vɔŋ ni wabaataŋa a te ni. Dila nyiŋla, nama mɛ be kasim vɔŋ a te chaab.