Efisos 3 - WEN GBAŊKA

¹ Wieŋa de nyiŋ ale soa ate mi a puusi Wen a te ni. Nuruba yik mi a lik kama, dii nyiŋla mi ale jam a sak nama baai ale kan daa Juuba la ayen ni a va Yeezu Kirisita la nyiŋ.

² Ni seba kama ayen ka Wen ŋmanteka nyiŋ ale soa ate wa pai tuini de a nyo mi nisima po ayen di maari ni. Ku a fɛ ate ni seba.

³ Wen a liŋ pai ka wa le jam a poli diila a suk, alege yaa ŋman pai di a sak mi. Mi be poom a liŋ ŋmarisi nya kude kama a te ni.

⁴ Nama be dan ŋman karim gbaŋ kaai ate mi ŋmarisi a te ni la, ni le baga a miŋ dii ale soa ate mi seba Kirisita wie ŋaai ale suk la, kiri kama.

⁵ A ta nyini dipo a ga paari daaŋa de po, Wen an sak nuru waai wasusuŋŋa de kiri ya, alege yɔgyɔgla de wa basi ate wa Chiika sak wa biisiteerɔma ale wa tuimtomdɔma baai ate wa lueri a te wadek la.

⁶ Ni basi ate m sak ni ŋa kiri. Baai ale kan daa Juuba la a dan ta siaka ale Wen wamaŋsaŋa, bala ale Juuma ale maa chaab chari tiirim buui ate Wen a pɛ ayen wa le te Juuma la. Baai ale kan daa Juuba la ale Yeezu Kirisita ka bunyi. Dila nyiŋla, ba le nya ŋan baai meena ate Wen pɛ ayen wa le te baai ale ta siaka ale Yeezu Kirisita la.

⁷ Wen pai wa pagrimu te mi kama ayen m chim wa tuimtomdɔ abe maa sak nuruba wa wamaŋsaŋa wie. Wa kasim a maari mu ka nna yegayega. Wa le nye diila ka wa ŋmanteka ale la ate wa potim pai te mu.

⁸ Mi jigi ku a nye se mi ka wa nuruma meena po baaŋ la, alege wa lueri mi kama ayen m ga sak baai ale kan daa Juuba la wa wamaŋsaŋa wie. Wen wamaŋsaŋa a sak ti ka Kirisita wamaŋsaŋa yegayega ŋaai ale kan ta kpeglimka la wie.

⁹ Wen be ŋman lueri mi kama ayen mi a sak nuru meena wa wasusugni suiku ale a va diila. Wa le jam piilim nye jaabuuri meena la, wa liŋ jam pai ŋa suk kama dipo meena.

¹⁰ Dii nyiŋ ale soa ate wa nye dila a yaa le ge ŋman pilim ta ŋa nyini peelim yɔgyɔgla de la ale ku sak Kirisita bisaŋa ale a tu chaab la ale chichirik pagrisaŋa ale ŋan baai meena ale ta pagrim a bo wenŋmazuk po la a miŋ wa yammu ale ka tɔgatɔga diila,

¹¹ Wen nye nya kude a ta va ka wa ale poli diila. Be ka ti Nyɔnɔwa Yeezu Kirisita nyiŋ ale soa ate wa nya wa popolaŋa de kiri.

¹² Dila nyiŋla, ti ta siaka ale Yeezu kama, tama ale wa ale ka bunyi la, ti ta popo pagrim kama a baga cheŋ ga a zaani Wen niŋ.

¹³ Mi bo dela jigini a nam ka nama nyiŋ, alege m kan yaali ayen ni suiniima kaasi dila nyiŋŋa. Mi ninammu de le basi ate ni nya ku nyuenta.

¹⁴ Dila nyiŋla, mi a kpi duna tɛŋ a puusi Wen ti Kowa a te ni kama.

¹⁵ Ŋanta meena ale bo wenŋmazuk ale tɛŋzuk de la ka wala ale a te ba yue.

¹⁶ Wen a ta zula ale nalim ka nna yegayega. Ka dila ale soa ate mi a saalim wa ayen wa basi ate wa Chiika a pai wa pagrimu a nyo ni suiniima po,

¹⁷ Ate Kirisita jam bo ŋa po dii nyiŋla ni ta siaka ale wa kama. Wa pagrimu a dan bo ni suiniimaŋa po nalimnyiini, nama le ta yaalika ale wa abe ni ta yaalika mɛ ale chaab a gum du,

¹⁸ ate nama ale Wen nuruma baga seba Kirisita ale a yaali ti dii nna yegayega la.

¹⁹ Mi a yaali kama ayen ni sum seba Kirisita ale a yaali ti diila. Ti an baga a miŋ wa yaalika kiri a nueri meena, alege mi a yaali kama ayen wa yaalika a sueri ni meena, ate ni jam chim nuru maŋsa ase Wen dek ale ka diila.

²⁰ Wen pagrim buui ale bo ti suiniimaŋa po la a baga kama a nye ate ti a tom tuima a te wa a gaam tama ale a poli ayen ti bek wa ate wa maari ti diila.

²¹ Kirisita bisaŋa ale a tu chaab la ale Yeezu Kirisita waai ale ka ba niŋdeerɔ la, le kasim a te Wen zula diipo meena wuu. Ku be nye dila.