Efisos 2 - WEN GBAŊKA

¹ Dila powa ni kan jam a zuli Wen ya. Ni jam a nye se ka kpieba la, ni wabaataŋa ale ni ale kan jam zuli Wen la nyiŋ.

² Dila powa, ni kasim jam va ka tɛŋzuk de meena demma wabaataŋa suiku ale chichirik baataŋa naawa. Wala ale soa tɛŋzuk de demma baai ale kan a zuli Wen la meena zuk a nya ba.

³ Wensie, ti meena a jam a va ka suik kula, dii nyiŋla, popola baata tii ale jam bo ti zuimaŋa po la ale ti deksa ŋan yaalika ale jam basi ate ti nyiem a tom tuimbaata. Wen sui ale jam a puuri ale ti ate wa jam yaali ayen wa te ti waalika ase wa ale ayen wa te tɛŋzuk de demma baai ale kan a zuli wa waalika diila.

⁴ Alege Wen a yaali ti ka nna yegayega ale ta jiirim mɛ ale ti a gaam taam,

⁵ sak si Wen jam nya ti ka nna se kpieba la ti ale kan a zuli Wen la nyiŋ. Alege wa jam vari ti ti wabaataŋa po a basi kama ale nak ti kum po a yiti ase wa le jam nak Kirisita yiti kum po la. Nya kude be ka Wen ŋmanteka nyiŋ ate ti nya varibasika.

⁶ Wa nak Yeezu Kirisita a yiti kum po kama ayen wa ŋman pilim jueli wenŋmazukku po. Ku a nye se tama ale wa a poom a deri kala ale chaab kama dula jigini la, dii nyiŋla tama ale wa ka bunyi.

⁷ Wen a nye wieŋa de meena a te ti kama ayen ku sak baai meena ale bo wenŋmazukku po ale baai ale bo tɛŋzuk de la, ayen wa ta ŋmanteka ale ti kama nna yegayega a gaam taam a yaa le tom wa biika Yeezu Kirisita ayen wa jam maari ti. Wa le sak ba diila ale boro kama a ta a cheŋ diipo meena wuu.

⁸ Wen ŋmanteka nyiŋ ale soa ate ni nya varibasika ni siaka nyiŋ, daa ni dek nyiŋŋa, ka Wen tiirimu nyiŋ.

⁹ Ku daa tuima nyiŋŋa ate waai baga a kuulimu.

¹⁰ Wen abe ale nye ate ti chim ti ale ka dii yɔgyɔgla de la. Tama ale Yeezu Kirisita abe ale ka bunyi la, wa nye kama ayen ti a tom tuimaŋsa a te wa. Wa be poom gomsi tuimaŋa de a magsi kama a te ti.

¹¹ Nuruba a biak ni ka baai ale kan daa Juuba la ate Juuma a wi ni ayen ni ka nuru baai ale kan gebi ni yoaŋa la po, alege a wi ba dek ayen ba ka baai ale gebi la po. Ni be poli ni ale jam ka dii dipo la a nya.

¹² Dila powa, ni jam zɛ Yeezu Kirisita wie. Ni jam ka nicham, dii nyiŋla, ni jam maa daa nuru baai ate Wen lueri te wadek la po. Ba an jam a maara a chiini nama a nyo baai ale Wen ale nye nɔiyeŋka pumpuulimaŋa ale chaab la po. Ase nama ale jam boro diila, ni jam zɛ Wen ya. Ni be jam ka yiila wa jigi mɛ.

¹³ Alege yɔgyɔgla de, nama baai ale jam kan moata wa la, yaa moata wa kama Kirisita kummu nyiŋ.

¹⁴ Juuma ale baai ale jam kan daa Juuba la a jam ka wari a nye ale chaaba. Ku jam a nye ase ka siak ale kasi ba a poori ba a basi ate ba chim dachaasa ale chaab la. Kirisita ale kpi a te ti la, a nye se ka wala ale nak siaka a lɔnsi ate Juuma ale baai ale kan daa Juuba la a yaa ta nɔiyeŋ ale chaab.

¹⁵ Wa yaa ŋman yik Sinsak ŋaai ate Wen a te ba la mɛ a tagri, ayen wa baga nye ate Juuma ale baai ale kan daa Juuba la a chim bunyi a te wadek. Wa dan nye dila, ba kan ŋman ta dachaani ale chaaba, ba le boro ale ka suiyɔgni.

¹⁶ Kirisita ale jam kpi jabarimu nyiŋla, wa jam tigsi ba kama, a ta jam jigi yeŋ a basi ate ba ale Wen a yaa ta nɔiyeŋ ale chaab. Dila basi kama mɛ ate ba dachaani ale chaab a ŋman karo.

¹⁷ Kirisita ale jam tɛŋzuk de la, wa jam sak nuruba kama Wen wamaŋsaŋa ŋaai ale basi ate ba a boro ale suiyɔgni ale chaab la. Wa jam sak baai ale kan daa Juuba a zɛ Wen la, ale baai ale ka Juuba a seba Wen la.

¹⁸ Ku be ka Kirisita ale kpi a te ti la nyiŋ ate Wen pai wa chiik yeŋka dekiwa a te tama meena, Juuba ale baai ale kan daa Juuba la. Nya kude abe te ti ka suik ayen ti baga a jam ti Kowa Wen jigi.

¹⁹ Dila nyiŋla, nama baai ale kan daa Juuba la, ni ŋman daa nicham, dii nyiŋla nama ale Wen nuruma a yaa tigsi ka chaab a chim bunyi Wen jigi.

²⁰ Wen nuruma a nye se ka wa yeri ate wa boro a sɛ la. Wa tomteerɔma ale wa biisiteerɔma baai ale liŋ jam sak ni la, bala a nye ase wa diinaŋa nyubaŋa la. Yeezu Kirisita me a nye se ka tintain ate Wen pai dueni wa yenni gugoruku po la. Wen a yaa be pai ka nama a sɛ wa yenni siaka.

²¹ Be ka Kirisita ale yik yenni meena a tara nna giŋgiŋ a yaa nye a te di a chim Wen puusika yeri weleŋ a te ti Naawenni.

²² Wen Chiika ale basi ate nama a gum baai ale Yeezu Kirisita ale ka bunyi la po ayen ni meena a chim yeri dii ate Wen ayen wa boro la.