Efisos 1 - WEN GBAŊKA

¹ Mi Pɔɔl waai ate Wen va wadek yaalika a lueri mu ayen m chim Yeezu Kirisita tuimtomdɔ la ale a ŋmarisi gbaŋka de a te nama baai ale bo Efisos la. Nama mɛ a va Yeezu Kirisita ka nalimnyiini.

² Ti Kowa Wen ale ti Nyɔnɔwa Yeezu Kirisita le ŋmante ni abe ba te ni suiyɔgni.

³ Pimpauk a cheŋ ti Nyɔnɔwa Yeezu Kirisita Kowa Wen jigi, waai ale niak ti ale Chiika po niauŋ meena wenŋmazukku po Kirisita nyiŋ la.

⁴ Wa liŋ lueri ti a te wadek kama, tama ale Yeezu Kirisita ale ka bunyi la, yaa alege nye tɛŋzuk meena, ayen ti chim nuru weleŋsa baai ale kan ŋman ta kaasuŋ Wen nimbie po la.

⁵ Wen le jam a yaali ti diila ale soa ate wa pai wadek yaalika va ŋala po a basi ate ti chim wa nidoabilisa Yeezu Kirisita yuenni nyiŋ. Nya kude abe jam ka wadek yaalika ale wa popola ate wa nye dila.

⁶ Ni basi ate ti a te wa pimpauk, wa ale ŋmante ti nna yegayega la nyiŋ, ale pai wadek bi yeŋka a te ti tiirim la nyiŋ.

⁷ Kirisita a kpi te ti kama ayen wa baga a da tuesi ti a basi abe wa vɔŋ ti wabaataŋa a te ti. Nya Wen ale maari ti dii nna yegayega,

⁸ a gaam jaabuuri meena la. Wa poli kama dila powa ale wadek yam,

⁹ ayen wa le pai ka Kirisita a tom wa tuimaŋa a nueri. Wen jam va ka wa yaalika a sak ti wa wieŋa de ŋaai ale jam a suk la.

¹⁰ Wa le jam a poli diila meena a dan jam nueri, wa le cheesi ŋan baai meena ate wa nye ate ba bo wenŋmazuk ale tɛŋzuk de la, nyo jigi yeŋ, ate Kirisita yaa chim ba meena naab,

¹¹ Wen nyiem a va ka wa yaalika a tom wie meena. Wa be liŋ lueri ka tama a te wadek a yaa le ge nye tɛŋzuk meena ayen tama ale Yeezu Kirisita a jam chim bunyi.

¹² Ni basi ate tama baai ale liŋ ta yiila Yeezu Kirisita jigi la, a pak Wen dii ale ta zula la nna yegayega.

¹³ Ase nuruba ale jam boro a sak ni Wen wamaŋsaŋa ŋaai ale ta wensie la, wieŋa, ni wom ba sinsaŋŋa kama ate Wen yaa vari ni ni wabaataŋa po a basi ate ni yaa ta siaka ale Kirisita. Ka dila nyiŋ ale soa ate Wen a pai wa Chiika ate wa puulim ayen wa te ni la a te ni ate ku sak ayen wa soa ni kama.

¹⁴ Ti be ale ta Wen Chiika la nyiŋ ale soa ate ti seba chak ayen ti nya Wen ale jam liŋ puulim ayen wa le nye dii te ti la, wa le sum nye kama. Ti ŋman seba mɛ kama ayen Wen le da tuesi ti ate ti soa tidek meena. Ni be basi ate ti te wa pimpauk.

¹⁵ Dila nyiŋla, M wom nama ale ta siaka ale ti Naawenni Yeezu ale ni ale ta yaalika ale Wen nuruma meena diila kama.

¹⁶ Mi kasim a te ka Wen jiam ale a puusi a te ni,

¹⁷ ayen wa waai ale ka ti Nyɔnɔwa Yeezu Kirisita Ko a ta zula nna yegayega la, a pai wa Chiika a te ni ate wa te ni yam abe wa pai Wen a sak ni, ate ni baga a seba wa nalimnyiini.

¹⁸ M be ŋman a puusi a te wa kama ayen wa basi ate ni popola a lagri ate ni nya wa bolimu ate ni nya wa ale wi ni ayen ni ta yiili ŋaai la abe ni seba ayen ŋan baai ate wa puulim ayen wa pai te wa nuruma la a zuak kama nna yegayega.

¹⁹ M be ŋman a puusi a te wa kama ayen ni seba wa pagrimu yegayega ate wa pai te tama baai ale ta siaka ale wa la. Pagrimu de ale pagrim kpioŋku,

²⁰ ate wa pai nak Kirisita kum po a yiti ale basi wa ate wa jueli a kali wa juga nisa geŋ wenŋmazuk po la.

²¹ Kirisita bo ka dula jigini yɔgyɔgla de a nya wenŋmazuk chichirik pagrisaŋa ale jaabuuri meena ale ta pagrim ale bo wenŋmazuk po ale tɛŋzuk de meena ale tɛŋ kaai meena ale bo ŋaaŋ cheena la zuk.

²² Wen pai jaabuuri meena nyo ka Kirisitawa nisima po. Wa ŋman pai mɛ a te ka Kirisita bisaŋa ale a tu chaab la meena ayen wa chim ba wie meena niŋdeerɔ kpioŋ.

²³ Kirisita bisaŋa ale a tu chaab la meena a nye se ka wa nyiŋka la, wa be kasim sueri nyiŋka de po kama ase wa ale kasim sueri tɛŋzuk de meena diila.