Sagrɔ 9 - WEN GBAŊKA

¹ Mi yaa poli kude meena zuk a yaa weeni ayen nuru maŋsa ale yam nyam ale dii meena ate ba a nye la a bo ka Wen nisa po, alege nuru a zɛ ase ka yaalika yaase ka kisika ale a limisi ba.

² Wayɔrisima ale gaasa nyam, nuru maŋsa ale nuru baata, baai ale nala ale baai ale daŋ, baai ale a nye kaabka ale baai ale kaa nye kaabka la ba meena ka wayeŋ. Ase ku le ka dii a te nuru maŋ la ku ka dila a te wabanyeerik, ase ku le ka dii a te baai ale a pɛ la, ku ka dila a te baai ale a chali yɔgsum ale pɛka la.

³ Biem ale nna wari meena po a nye tɛŋzuk de la. Wayeŋka ale a nye nurubisa suiniimaŋa po la ka gaasa ale sueri ate yesiŋsa nyeela a sueri ba popolaŋa po ale diem boro, kula ŋaaŋnyiŋ ba le gum kpiema po.

⁴ Waai ale vua la a ta yiila kama, ba kaai ale vua la a zunchoŋ gbeŋ kpiuk kama.

⁵ Diila ŋanvutaŋa a seba kama ayen ba le kpi alege ŋankpiuktaŋa a zɛ dila, ba ka tutuna a gum du ba poom baŋ ba wari kama.

⁶ Ba yaalika ale ba kisika ale ba nyuri dɛka a muriŋ bɛ kama, ba ŋman ka wari a nye ale dii meena ale a nye tɛŋzuk de la.

⁷ Cheŋ, dɛ fi ŋandiintaŋa ale suipeentik abe fi nyu fi daamu ale suipeentik ale ka yɔgyɔgla de ate Wen nina a sueri ale dii ate fi nye la.

⁸ Kasim a jo garuk peeta a kpiiri kpaam fi zukku po.

⁹ Kasim a dɛ masim ale fi powa waai ate fi a yaali la fi vum daaŋa po da ŋaai meena ale kan ta kiri ate Wen a te ti tɛŋzuk de la po. Ale ka fi charuk ale la fi boka po tɛŋzuk de ate fi a tuilum a nam la.

¹⁰ Dii meena ate fi nisa a baga a nye la, nye ale fi pagrim meena ale boosuku po, juijui ate fi a cheŋ la tomka yaase zɔkka yaase miŋ chakka yaase yam a ka dula.

¹¹ Mi ŋman nya ka wari di choa tɛŋzuk de, chalaŋa daa waai ale a kpabi la ale soa, yaase kpaliŋka waai ale pagra la ale soa, yaase ŋandiinta a jam yam nyɔnɔ jigi ya, yaase jigsika a paari sebrɔ jigi ya, yaase ŋmanteka a cheŋ zamsidɔ jigi ya, alege wie a paari ba meena kama.

¹² Nuru waai zɛ dii ale cheena wa zuk danni po la. Ase juma ate ŋmiak a yik diila yaase baruk ale a yik nuinsa diila dila dek ate biem a bari a yik nuruba.

¹³ Mi ŋman nya ka yam daana ŋa chaab tɛŋzuk de ate ku nye mi masim nna yega.

¹⁴ Tɛŋ fiik ale jam boro ale nuruba nna magadega ka po. Ate naab waai ale pagra a jam wa nye kpaliŋ ale ka, wa te wa tugurik tom boanni a ga gilim ka.

¹⁵ Nuru jak ale jam bo tɛŋka po alege ta yam, wa jam vari tɛŋka a basi kama ale wa yammu. Alege waai an jam ŋman teeri nuru jakka de wari ya.

¹⁶ Mi weeni ayen, <> Alege nuru jakka de yammu ba jam baŋ kama an ŋmaa teeri wa wieŋa.

¹⁷ Yam nyɔnɔ waai wie ale kaa nuem la a magsi womka kama a gaam beruk kuui ale nuem la.

¹⁸ Yam a zunchoŋ tugurik ŋanta kama, alege wabanyeerik yeŋ a kaasi ka ŋan maŋ boari.