Sagrɔ 8 - WEN GBAŊKA

¹ Ka wana ale a nye ase yam nyɔnɔwa la? Ka wana ale baga a weeni wie kiri yaa? Yam a ta ka suipeentik a jam ale a nye ate waai sui ale kaasi la sui a peenti.

² Mi weeni ayen, siak a te naawa ale weeni diila, dii nyiŋla fi nye ka pɛka Wen niŋ.

³ Kan kpabi a basi naawa abe fi cheŋ, kan biisi a maari dii ale kan daa wamaŋ la, wa ale ka naab la nyiŋ wa a nye ka dii ale a yɔk wa suinni la.

⁴ Ase naawa ale a weeni dii ale gaam wari meena la, ka wana ale wa weeni wa ayen, <>

⁵ Waai ale siak a te naawa ale weeni diila ale vari wadek a basi. Waai ale ta yam la a nye wamaŋ ka diipo ale magsi la.

⁶ Dai ale boro a te wari meena ale fi le a nye diila. Alege nuru niniga a duŋ wa a basi ka tɛŋ.

⁷ Ase nuru ale kan seba chum po la, ka wana ale wa weeni wa dii ale di jam la?

⁸ Nuru a ka pagrim vioku zuwa a baga a ta ku, ku ka dila mɛ ate nuru waai a ka pagrim wa kum dai ya. Ase ba le kan basi nuru ate wa cheŋ kpaliŋ dai la, ku ka dila gaasa a kan basi baai ale a zamsi gaasa la.

⁹ Ŋade meena mi jam nya kama, ase mi ale pai m popola a basi wari meena zuk tɛŋzuk de la. Nuruma gela a ta pagrim kama tɛŋka zuk ate nuruba gela a nam ba nisa po.

¹⁰ Mi yaa ŋman nya gaasa nyama guka, baai le nyini jigi weleŋka a cheŋ a nya pimpauk tɛŋka po la. Kude mɛ a ka kiri ya.

¹¹ Ase ba dan kan kpabi a namsi gaasa nyama, ku le basi ayen ka nuruba a ŋmasi a kaasi wie.

¹² Dai dii dai gaasa nyɔnɔ ale kaasi wie a paari ka kook ale diem goa beni, mi seba ayen ku ale zunchoŋ a te nuru baai ale a chali Wen la, baai ale tom a te Wen la.

¹³ Gaasa nyam ale kaa chali Wen la, ku kan cheŋ nalimnyiini ale ba ba daaŋa mɛ a kan woŋŋa ase yisuŋ la.

¹⁴ Wari di choa ale boro a ka kiri tɛŋzuk de, nuru maŋsa a nya ka dii ale kan nala la ate nuru baata a nya dii ale nala la. Mi yaa weeni ayen kude mɛ a ka kiri ya.

¹⁵ Dila nyiŋ ate mi yaa weeni ayen fi dan dɛ masim fi boka po, dii ale zunchoŋ tɛŋzuk de a te nuru la ale fi a dɛ abe fi a nyu abe fi dɛ masim fi boka po. Ate mariŋka ale bo wa jigi wa tuini meena po da ŋaai meena ate Wen a te wa tɛŋzuk de la.

¹⁶ Ase mi ale nye m popola ayen m seba yam abe m kpesi nya nurubiik ninammu tɛŋzuk de la, ate wa kan goa yok ale kantueŋ la.

¹⁷ Mi yaa nya dii meena ate Wen a nye la. Waai an baga a miŋ dii ale a nye tɛŋzuk de la. Wa dan poom a yaali wa nye dii meena wa kan miŋ di kiri ya. Yam nyɔnɔ a dan poom sak ayen wa seba, wa kan baga a miŋi.