Sagrɔ 7 - WEN GBAŊKA

¹ Yuei maŋ a gaam kpa buui nyum ale masa la kama, ate kum dai a zunchoŋ biam dai.

² Fi dan cheŋ kuub a zunchoŋ dɛka tigi kama diila nuru meena a za wa kpi kama. Javuk meena abe a poli kude wari.

³ Niniga a zunchoŋ laata kama, dii nyiŋla nimbie kaasika ka wamaŋ a te suinummu.

⁴ Yam nyam popola a bo ka kuub yeri, alege betta popola a bo ka yie dii ate masim a boro la.

⁵ Yam nyɔnɔ a dan toariŋ fu a zunchoŋ beruk ale a pak fu.

⁶ Beruk laata a nye ase ka munsa ale bo bolim po a parisi diila. Kude mɛ a ka kiri ya.

⁷ Varuk a tulim yam nyɔnɔ ate wa a chim ka beruk, ba dan pai ligra a da wa ŋa taŋ wa popolaŋa kama.

⁸ Wari kpeglimka a zunchoŋ di piilimka kama ate chichiiba a zunchoŋ kanjanta.

⁹ Kan basi ate fi sui a kpabi a puuri. Ka betta sue ale kpabi a puuri.

¹⁰ Kan begi ayen ka boa ate dila po wa a zunchoŋ daaŋa de?>> Yam a ka ku po ase fi nin bek beŋŋa de.

¹¹ Yam a zunchoŋ kama ase bu nin jam ale nitalim. Ba meena a maari baai ale vua la kama.

¹² Yam a nye ase ka ligra la ba meena a maari kama. Alege yam a zunchoŋ kama, dii nyiŋla bu a vari waai ale ta bu la a basi kama.

¹³ Nya Wen ale nye diila. Ka wana ale baga a teenti jabuui ate wa nye ate wa goaliŋ la?

¹⁴ Ase daaŋa po ku dan masa, ta suipeentik, ale daaŋa po ku dan kan masa, a teeri, Wen a nye dinyiwa ase ka ndila la, dila nyiŋ nuru a kan baga a miŋ wa chum po wari ya.

¹⁵ Mi bo kaai ale kan ta kiri la po mi nya ŋade buyewa kama, wayɔrisima nyɔnɔ a kpi ka wa wayɔrisimaŋa po ate gaasa nyɔnɔ a goa a beni ale wa gaasaŋa.

¹⁶ Kan ŋmasi chim wayɔrisima nyɔnɔ a gaam taam yaase fi ta yam a gaam taam, boa ate fi a kaasi fi dega?

¹⁷ Kan ŋmasi ta gaasa, abe fi kan chim beruwa, boa ate fi a kpi ale ge fi daa an paari yaa?

¹⁸ Ku nala kama ate fi yik wanyi abe fi kan basi ate wanyiwa a cheŋ. Waai ale a chali Wen la ale ta ba meena.

¹⁹ Yam a basi ate nuru a ta ka pagrim a gaam tɛŋ kpieŋ niŋdeerɔba pi.

²⁰ Wayɔrisima nyɔnɔ a ka tɛŋzuk de a nye dii ale magsi la a kan nye wabaata.

²¹ Kan fi wom wari meena ate nuruba a weeni la, fi le wom ale fidek tomteerɔ a boro ka a te fu.

²² Fidek seba kama fi suinum po ayen ku nɔi yega fi ka a te nuruba kama.

²³ Ŋade meena mi chamsi nya kama ale yam ale weeni ayen, <> alege kude a gaam m pagrim.

²⁴ Yam ale ka dii meena la, bu zunchoŋ kama ale zuak, ka wana ale baga a nya bu?

²⁵ Dila mi yaa tuliŋ m popola a basi miŋ chakka jigi ayen m kpesi gisi nya yam ale kperisa wie kiri abe m miŋ ayen ku ka koansa ase fi nin ta gaasa, ku abe a nye ase ka yesiŋsa la ase fi nin chim beruk.

²⁶ Mi nya ayen nipooba gela a bie gaam kum kama ate wa wari a pagra ase baruk la, ba yaalika a nye ase ka ŋmiak la, ate ba nisaŋa a bobi nidoaba a tara ase chɔrima la. Nidoa waai ale nye ate Naawen sui a yɔk la ale nya varibasika ba jigi, alege wabanyeerika ba le yik wa giŋgiŋ.

²⁷ Sagrɔwa ayen, <

²⁸ Ase m le diem boro a gisi la, mi nya ka nidoa yeŋ tusini ate mi nya la po ale wa ta wensie alege daa nipok yeŋ ba po ale wa ta wensie.

²⁹ Kude nyiini ate mi nya ale Wen a nye nurubiik ayen wa ta wensie alege ba yaa va suita yega a gisi kperisa wie.>>