Sagrɔ 5 - WEN GBAŊKA

¹ Kpesi fidek ase fi nin cheŋ fi puusi Wen yenni po. Fi dan wom chak zunchoŋ fi le nye betta kaabka ale poom zɛ ayen fi nye kaasi kama.

² Kan te ate fi nɔi a valima abe fi kpesi fidek fi ale a biisi dii a te Wen la. Wen a bo ka wenŋmazuk ate fi bo tɛŋzuk de, dila biisi magadega.

³ Fi daa poli yegayega ku ta ka gɔdaasima a jam, ka betta ale a biisi wie yega.

⁴ Ase fi dan puulim a te Wen, kan beni ale nyeka. Wen sui kan peenti ale betta, nye fi le puulim diila.

⁵ Fi dan kan puulim ya ku zunchoŋ fi le puulim ale kan nye fi ale puulim diila.

⁶ Kan basi ate fi nɔnni a ta fu jo biem po, abe fi kan ta chaab ale biisiteerɔwa Wen yenni po ayen, <> Fi dan nye dila Wen sui ale puuri ale fu ate wa kaasi jaab meena ate fi nam nya la.

⁷ Gɔdaasima yegayega ale wie yegayega biisika a ka kiri ya. Dila a zuli Wen.

⁸ Fi dan nya ale ba a namsi ŋanjaksa tɛŋ kpieŋ po, ate nyemagsika ale wensie a karo, kan te wa ŋala a cha fu, ale ka kpagi kpien nina ale bo wa zuk, ŋayema zuk ka kpagi kpiema ale diem boro.

⁹ Tɛŋka ŋantaŋa ka ba ale soa ba meena, naawa dek a nya nyuenta ka dula.

¹⁰ Waai ale a yaali ligra la a kan ta ligra yega, waai ale a yaali jigsika la jigsika a kan paari wa. Kude mɛ a ka kiri ya.

¹¹ Ase ŋanta ale a piisi diila, ba dɛɛrɔma mɛ a piisi ka dila. Be ka boan jaab nyuenta a te ba nyɔnɔwa, ka wa pai nina a nya ba?

¹² Tuimtomdɔ goom a masa kama, wa dɛ maga yaase wa dɛ yega wa a goa kama alege nuru waai ale jigsi la ŋantaŋa a kan te wa suik ate wa a goa.

¹³ Mi nya ka biem ate bu a daani tɛŋzuk de, paaruŋ ka biem a te ku nyɔnɔwa

¹⁴ yaase paaruŋ a va ka suik yoŋ a muriŋ a be dila wa dan ta nidoabili jaab karo tali a te wa.

¹⁵ Chaboala ate nuru a nyini wa ma popo a nyini, wa be pilim a cheŋ ka dila dek. Wa kan pai jaab a nyini wa gigelika nyiŋŋa a nyo wa nisaŋa po a cheŋ.

¹⁶ Kude mɛ ka biem ale ta daanika tɛŋzuk de. Ase nuru ale jam diila, dila dek ate wa a ŋmani, ka boan nyuenta ate wa nya, wa nam a te ka vioku?

¹⁷ Wa daaŋa meena po wa a dɛ kama legini po ale ninam kayiok ale nyiŋ wula ale suipuurum.

¹⁸ Mi yaa nya ayen ku nala kama ale chim wamaŋ ayen nuru a dɛ abe wa a nyu a chak wa gigelika ale wa ninammu nyiŋ tɛŋzuk de daa magadega ate Wen a te wa la, ka wa charuk ale la.

¹⁹ Alege Wen a dan te nuru jigsika ale ŋanta ale maari wa ate wa a dɛ ba ale masim, ate wa tuesi wa paaruŋku ale ta suipeentik, kude ka Wen tiirim.

²⁰ Wa nyiem kan poli wa daaŋa ale gela diila wari ya, dii nyiŋla Wen a basi kama ate wa nina a muni ate wa sui a peenti.