Sagrɔ 3 - WEN GBAŊKA

¹ Dai ale boro a te wari meena, ate vari a boro a te tuini meena tɛŋzuk de.

² Biam dai a boro kama, ate kum dai a boro. Borik dai a boro kama ate voorika dai mɛ a boro.

³ Koka dai a boro kama ate tebika dai a boro. Kaasika dai a boro kama ate sɛka dai mɛ a boro.

⁴ Kumsa dai a boro kama ate laata dai a boro. Kaarik dai a boro kama ate gɔgta dai mɛ a boro.

⁵ Tintana kati waaŋka dai a boro kama ate ŋa tigsika dai a boro. Gbaarika dai a boro kama ate dai mɛ boro an magsi gbaarika.

⁶ Gisika dai a boro kama ate dai a boro an magsi gisika. Yiktaka dai a boro kama ate yukbasika dai mɛ a boro.

⁷ Cheerika dai a boro kama ate maŋka dai a boro. Diki dai a boro kama ate biik dai mɛ a boro.

⁸ Yaalika dai a boro kama ate kisika dai a boro. Kpaliŋ dai a boro kama ate suiyɔgni dai mɛ a boro.

⁹ Ka boa ate tuimtomdɔwa ale nya wa ninammu nyiŋŋa?

¹⁰ Mi nya gigelika ate Wen a pai ji nurubiik la kama.

¹¹ Wen a nye wari meena kama ate di nala diipo ale magsi la. Wa nye kama mɛ ate wenŋmazuk wie a bo nurubisa suiniima po alege ba kan miŋ Wen ale nye dii a nyini piilimka a ga paari kpeglimka.

¹² Mi seba kama ayen wari a karo a zunchoŋ a te nuru biiga a gaam ba le ta suipeentik ase ba nin a nye wamaŋsa ase ba le vua la.

¹³ Wen a yaali kama ayen ba a dɛ abe ba nyu a ta suipeentik ba tuimaŋa po, dii ale ka tiirim a nyini Wen jigi la.

¹⁴ Mi seba ayen Wen ale a nye diila ale boro kama taam wuu. Ba kan pai wari a gum du ba be kan yeeri wari a ta a nyini du. Wen a nye dila kama ayen nurubiik a zuli wa.

¹⁵ Dii ale a nye yɔgyɔgla de la a liŋ nye nya kama, dii abe le kali di nye chum po la a liŋ nye kama. Wen ale basi ate dii ale nye dipo la a ŋman pilim nye.

¹⁶ Mi nya ka wari dichoa tɛŋzuk de. Buusa boka jigini gaasa ale boro. Nyemagsika jigini gaasa ale boro.

¹⁷ Mi yaa weeni m dek ayen, Wen a gomsi ka dai a magsi wari meena ale nyeela meena, ate dila ale basi ate wa bo nuru maŋsa ale nuru baata meena buusa.

¹⁸ Mi yaa ŋman poli ayen, <

¹⁹ Nurubiik a nye ase ka duŋsa la, nyeela ŋala ale a limisi ba nɔi bayewa. Ase wanyiwa ale a kpi la, dila dek ate nwala ale kpi. Ba meena a ta ka vuusum yeŋka la. Nuru a ka wamaŋ a gaam duŋŋa. Wari meena a ka kiri ya.

²⁰ Ba meena a cheŋ ka jigi yeŋ, ba meena a nyini ka tanta po, tantaŋa po abe le ba meena ale wari du.

²¹ Ka wana ale seba a chak ase nuru chiik a jueli ka Wen jigi ate duŋ chiik a siŋ tɛŋŋa?>>

²² Dila mi yaa nya ayen dii ale zunchoŋ la ale nuruba a dɛ masim ba tuima nyiŋ, dii nyiŋla dii meena ate ba ta la ale la. Nuru an baga a maari wa choa ate wa a nya dii ale di nye chum po la.