Sagrɔ 11 - WEN GBAŊKA

¹ Yuk fi boroboroku a basi nyaata po, diila da boari ŋaaŋnyiŋ fi le ŋman nya ku.

² Lab a paari buyopɔi, naaniŋ a te nuruba ale fi zɛ kaasuŋ kuui ale cheena tɛŋka zuk la.

³ Nyiam a dan sueri chiŋmari, ka ŋmoruk ale a ni tɛŋzuk de. Tiib a lo yeseoku geŋsa yaase bu lo wiilukku geŋsa, juijui ate bu lo la, bu doa ka dula.

⁴ Waai meena ale nya viok a kan bori ba dega, baai mɛ ale a nya chiŋmaaŋa la a kan nya ŋandiinta.

⁵ Ase fi ale kan seba viok suik diila yaase nyiŋ ale a piilim dii ma popo la, ku ka dila mɛ ate fi kan miŋ Wen tuini, waai ale ka jaab meena nyeerɔ la.

⁶ Bori fi ŋanborintaŋa saluik, a tom ate ku paari junɔi ale fi zɛ ale ka di dii dek ale a niak la, ase ka di de yaase ka ndila yaase ŋa nɔi buyewa ale nye wayeŋŋa.

⁷ Bolim a nala kama ku abe le te numbinni ka masim ase bu nin nya wenbinni.

⁸ Ale ge bena yega nuru a baga a boro kama, basi ate wa dɛ ba meena masim. Alege basi ate wa teeri da ŋaai po ate wa jam bo legini po la. Ba jam piisi kama. Wari meena ale kali di jam la a ka kiri ya.

⁹ Ta suipeentik nuru paaliga, ase fi le diem paala la, abe fi te ate fi sui a peenti da ŋaai ate fi diem paala la po. Va fi suinummu yaalika ale dii meena ate fi nummu a nya la alege seba ayen wieŋa de meena nyiŋ Naawen ale bo fi buusa.

¹⁰ Dila nyiŋ zɛri wieŋa de fi suinum po a yeeri daanika de fi nyiŋka po ale paalim ale pagrim a ka kiri ya.