Daniel 8 - WEN GBAŊKA

¹ Naab Belsazzar ale dɛ wa naamu a paari bena ŋatawa po la, mi Daniel jam gɔdaasim kama ŋmana. Mi ale liŋ gɔdaasim la ŋaaŋnyiŋ ale la.

² Mi gɔdaasimaŋa po, mi yaa nya m dek Susa tɛŋka jigi pagrika ale bo Iilam tɛŋka po la. Gɔdaasimaŋa po, mi jam za ka Ulai Nyiam Vuuku nɔi.

³ Mi a yaa zak nya ŋmai ale padiak a za mi niŋ ale ka nyiila ŋaye a za benni nɔi. Nyiilaŋa a jam wɔŋa kama alege dinyi a jam chim a gaam m dila.

⁴ Mi yaa nya padiaka a kpa tuak yeniŋ geŋsa ale wiilukku geŋsa ale yeseoku geŋsa. Alege duŋ ka choa karo a pagra a nye kpaliŋ ale ka, duŋ mɛ abe karo a pagra ase kala la ate ka yaa kasim a nye dii ate ka a yaali la ale pagra a gum du.

⁵ Mi ale diem a poli la, ku an beni ya buuk ale ta nyiili ku ninaŋa suŋsuŋ a nyini yeniŋ geŋsa a gilim tɛŋka meena alege kan tabi tɛŋka.

⁶ Ku yaa jam padiaka jigi kaai ate mi nya ale ka za nyiam vuuku nɔi ale nyiila ŋayewa la jigi ale suipuurum.

⁷ Ku yaa nye kpaliŋ ale padiaka a wɛ ka nyiila ŋayewa padiaka a jam wobsa kama ka an jam baga a zaani ale ku. Buuku a nak ka a lɔnsi ka tɛŋ ale tabi ka zuk alege jaab a karo a vari padiaka a ta nyini ku jigi a basi.

⁸ Buuku a yaa zuak alege pagrim buui ate ku ta la, ku nyii dii ale zuak la a yaa wɛ alege ate nyii pagrisa ŋanaansi a nyini dula kuuni a jueli jiga bunaansi.

⁹ Ŋatawa po nyiili di choa nna fii fiiga alege chim ale pagrim a nyini yeseok geŋsa a ta ga paari kori geŋ a ta moata Tɛŋ Kaai Ale Nala La geŋ.

¹⁰ Di chim kama a jueli moata wenŋmazuk. Di yaa nye kpaliŋ ale chiŋmarisaŋa gela ale zak si a yuk basi tɛŋzuk alege a tabi si zuk.

¹¹ Ku zak ku dek a zaani ŋmai ase Nabiik la. Ku yaa tuesi danni po kaabka a ta nyini wa jigi a ta puusaŋa ale ta wa yenni kaabka a siŋ tɛŋ.

¹² Alege tukpari nyiŋ ba paari kaabka jigini ate ku yaa kasim a nya niaka ate wensie a ŋman karo.

¹³ Ate mi wom ale nuru weleŋ a biisi, ate nuru weleŋ wa choa a weeni wa ayen, <>

¹⁴ Wa yaa weeni mu ayen, <>

¹⁵ Mi Daniel ale diem a poli gɔdaasimaŋa kiri la ayen m dan baga m miŋ ŋa kiri la, m yaa ŋman nya waai m niŋ ase nuru la.

¹⁶ Mi yaa wom nuru lueluk a nyini Ulai Nyiam Vuuku a wi Gabriel, ayen weeni nuruwa de gɔdaasimaŋa kiri.

¹⁷ Ase wa ale forisi moata mi ale za kauk kuui la mi nyiŋka a yaa deri a gɔk ate mi a lo tɛŋ ase m cha la wa yaa weeni mi ayen, <>

¹⁸ Wa ale diem boro a biisi ale mi la, mi jam pai mi ninaŋa a vuk ka tɛŋ a goa. Wa yaa tiri mi ale zak mu a zaani.

¹⁹ Wa weeni ayen, <

²⁰ Padiaka ate fi a nya ale nyiila ŋayewa la ka Miidi ale Persia nalima.

²¹ Budukku mɛ a magsi chaab ale ka Girik naawa, alege nyii kpien dii ale bo ninaŋa suŋsuŋ la mɛ a magsi chaab ale ka naab waai ale wa dɛ niŋ la.

²² Nyiila ŋanaansiwa, ŋaai ale tagri dii ale wɛ la kiri ale wa naamu ale lab bunaansi alege si pagrimu a kan chim bunyi.

²³ Ba dan dɛ ba naamu a ta ga moata nueri ka, gaasa tuima ale kasim boro, Naab ale jam ate wa nyeka ale toa.

²⁴ Wa ale kasim pagra kama alege daa wadek pagrimoa. Wa ale kasim a kaasi tuima abe wa nya suik a nye dii meena ate wa a yaali la. Wa ale kaasi niŋdeerɔma baai ale ta pagrim la ale Wen nuruma.

²⁵ Wa ale paasi nuruba a jigsi. Wa ale pai wadek a chim nuru dek, ate ba daa a poli ayen ba boro ka boka dek, wa ale ko nuruba yegayega, ate ku ŋaaŋnyiŋ wa ale kpaliŋ ale nabisa meena Nabiika. Alege ba ale nak yik wa alege daa nurubiik pagrimoa.

²⁶ Junoaŋa ale saluitaŋa gɔdaasimaŋa ate fi a nya la ka wensie. Ta kude fidek fi nyiini ale gɔdaasimaŋa ka chum po wie.

²⁷ Mi Daniel a jam jiak kama ale a yuak a paari da boari. Ku ŋaaŋnyiŋ ate mi a baga a yiti a tom naawa tuini. Gɔdaasimaŋa a jam cha mu kama ate mi an miŋ ŋa kiri ya.