Daniel 4 - WEN GBAŊKA

¹ Naab Nebukadnezzar a tom gbaŋsa a te nuru meena ale buuri meena tɛŋka po ayen, Mi a puusi ni meena.

² Ku nye mu masim nna yegayega wakperikaliik kaai ate Wen Dii Ale Bo Wenŋmazuk La a nye te mu la.

³ Nya wa wakinkagla, nya wa wakperisa ale zuak dii ya wa naamu a boro ka dila taam wuu, ate wa pagrimu mɛ a bo ale gaŋsa meena.

⁴ Mi Nebukadnezzar a jam bo ka m yenni po a jigsi a dɛ masim,

⁵ Mi yaa gɔdaasim a yɔgsa. Ase mi ale doa m gaduokku zuk la mi yaa nya yisuŋ m gɔdaasini po, dii ale nye ate mi a chali yɔgsum.

⁶ Mi a yaa wi yam nyama meena Babilon tɛŋka po ayen ba jam a weeni gɔdaasimaŋa kiri a sak mu.

⁷ Sampoporisaŋa ale chichirik wiirisaŋa ale baai ale a zamsi chiŋmarisa wie la meena a jam ate mi a weeni ba m gɔdaasimaŋa alege bala an baga a weeni mu ŋa kiriya.

⁸ Daniel yaa jam ate mi weeni wa m gɔdaasimaŋa. Wa yuei di choa ale Beltesazzar mi te wa yuenni de a ta va chaab ale ka m wenni yuei. Wen weleŋsaŋa chiika ale bo ale wa.

⁹ M weeni ayen, <

¹⁰ M gɔdaasimaŋa ale nna. Diipo ate mi a doa m gaduokku zuk la, m goomu po mi nya ka tiib ale wɔŋa a za tɛŋka suŋsuŋ. Bu ŋmasi wɔŋa ka nna yegayega.

¹¹ Tiimu chim zuak, a pagra ate bu woglimmu a tiri chiŋmaaŋa. Tɛŋka meena jam a nya bu kama.

¹² Bu vaataŋa a jam nala kama, bu yɔnaŋa mɛ a piisi ate bu zuk a ta ŋandiinta a te waai meena. Duŋsaŋa tɛŋka po meena a zaani bu yɔgsummu po, nuinsaŋa mɛ a kali bu naŋsaŋa zuk, ŋanvuta meena jam a dɛ ka dula.

¹³ Mi gɔdaasimaŋa po ase mi ale diem doa m gaduokku zuk la, mi yaa nya maarɔ waai ale welema la ale wa nyini wenŋmazuk a cheen tɛŋzuk de.

¹⁴ Wa yaa wi ale lueluk pagrik ayen che tiimu a lɔnsi tɛŋ, gebi bu naŋsaŋa kpaanti bu vaataŋa a basi abe fi kati bu yɔnaŋa a waaŋ, basi ate duŋsaŋa a waaŋ bu tɛŋ abe nuinsaŋa a basi bu naŋsaŋa mɛ.

¹⁵ Alege basi bu kinni ale bu tɛŋ naŋsaŋa, pai kutuk ale kutuk mɔnuŋ a lik si abe fi basi ate si bo wuuku ale tantaŋa po. Basi ate wenŋmazuk maglimu a lo wa abe fi basi ate wa gum duŋsaŋa ale bo tɛŋka po la.

¹⁶ Basi ate wa popolaŋa a tagri a chim duŋ popola a ta ga paari bena ŋayopɔi.

¹⁷ Kude meena a nyini ka maarɔ weleŋsaŋa jigi kude a nye kama ayen ku sak baai ale vua la ayen Wen Dii Ale Bo Wenŋmazuk La ale a nya nurubiik tɛŋka zuk ale pai ka a te waai ate wa a yaali la, poom ka nuru baai ale pɔsima la.

¹⁸ Gɔdaasini dii ate mi Naab Nebukadnezzar a ta la ale la. Beltesazzar, weeni mu di kiri ale yam nyɔnɔ a ka tɛŋka po a baga a weeni di kiri a sak mu. Alege fi baga kama, dii nyiŋla wen weleŋsaŋa chiika a bo fu po kama.

¹⁹ Daniel waai yuei ale jam chim Beltesazzar la ku yaa jam cha wa, wa popolaŋa a jam kasim a daani wa kama. Naawa yaa weeni ayen, <> Beltesazzar yaa tulisi ale weeni ayen, <

²⁰ Tiimu ate fi a nya ale bu chim zuak ale pagra ale wɔŋa a tiri chiŋmaaŋa ate tɛŋka meena a nya bu la,

²¹ ate bu vaataŋa a nala, ate bu yɔnaŋa a piisi a te ŋanvuta meena, le ta yɔgsum ate duŋsa a zaani bu tɛŋ ate nuinsaŋa mɛ a yɔk tugta bu naŋsaŋa zuk la.

²² Naaba, fi abe le tiimu, fi a zuak kama ale pagra ate fi zuaka a paari chiŋmaaŋa ate tɛŋka meena a nya fu.

²³ Naaba, waai ate fi a nya ale wa welema a nyini wenŋmazuk a weeni ayen ba che tiimu a lɔnsi a kaasi bu abe ba basi bu tɛŋ naŋsaŋa ate si bo tantaŋa ale wuuku po, pai kutuk ale kutuk mɔnuŋ a lik abe bu kinni a bo tɛŋ. Basi ate maglim a lo wa, basi ate wa boro ase duŋ la a ta ga paari bena ŋayopɔi.

²⁴ Di kiri abe le nna: Naaba, Wen Dii Ale Bo Wenŋmazuk La ale te m nyɔnɔwa naawa kaamka de.

²⁵ Fi kala fi nyini nurubisa po a nyini kama a ga gum duŋsa po. Fi ale ŋɔbi wuuk ase naab la ate maglim mɛ a lo fu a ta ga paari bena ŋayopɔi ate fi yaa ale miŋ ayen Wen Dii Ale Bo Wenŋmazuk La ale soa tɛŋka meena a nya alege pai ka a te waai ate wa a mariŋ la.

²⁶ Wa ale weeni ayen ba basi tiimu kinni ate bu naŋsaŋa a bo tantaŋa po la kiri ale fi ale ŋman pilim chim fi daam ale ka diila ase fi ale miŋ ayen pagrim a bo ka Wen jigi la.

²⁷ Dila nyiŋla naaba, be siak dii ate mi a weeni fu la zɛri biem abe fi a nye dii ale nala. Basi gaasa abe fi a nye wamaŋsa a te niwoba. Da dii dai fi daa a nye dila fi jigsika ale gum du a te fu kama.

²⁸ Nya ŋade meena yaa sum jam nye Naab Nebukadnezzar.

²⁹ Chiisa pi ale siyewa po, ase Naawa ale jam bo wa yenni gboŋku zuk Babilon tɛŋka po a cheŋ la,

³⁰ wa yaa weeni ayen, <>

³¹ Wieŋa a diem jam bo ka wa nɔnni po ate lueluk a nyini wenŋmazuk a weeni ayen dii ale za ku nye fu la ale nna. Naab Nebukadnezzar: fi kala ayen fi jɔk fi naamu kama.

³² Fi ale nyini nurubisa po a nyini kama ate fi ale kasim a bo ale gɔi duŋsa. Fi ale kasim a ŋɔbi wuuta ase naab la a ta ga paari bena ŋayopɔi ate fi a yaa dan miŋ ayen Wen Dii Ale Bo Wenŋmazuk La ale soa tɛŋka ale nuru meena ale baga pai naata a te waai meena ate wa a yaali la.>>

³³ Wa dii ale jam weeni a magsi chaab ale Nebukadnezzar la a sum jam nye. Wa yaa jam nyini nurubisa po a nyini kama ale a dɛ wuuk ase duŋ la. Maglim mɛ jam kasim a lo wa kama, ate wa kɔbtaŋa mɛ a nye ase jiiruk kɔbta la, wa ninyeensaŋa a nye ase nuinsa nampei la.

³⁴ Kpeglimka po, mi Nebukadnezzar a yaa zak m ninaŋa a basi wenŋmazuk ate m popolaŋa a jam ate mi yaa pak Wen Dii Ale Bo Wenŋmazuk La, mi zuli wa ale pak wa. Wa ka waai ale boro taam wuu la, wa pagrimu a kan maara taamu, wa naamu mɛ a boro ale ka gaŋsa meena.

³⁵ Nuru meena tɛŋzuk de ka kinla, wa a nye ka dii ate wa a yaa la ale wenŋmazuk po pagrimu ale nuruma tɛŋzuk. Waai an baga a yik wa nisimaŋa a taa ŋmani ŋaaŋŋa yaase wa weeni wa ayen, <>

³⁶ Dila po wa mɛ, m popolaŋa a ŋman jam m jigi m zulaŋa ale m pimpaukku ale m naamu a pilim jam m jigi. Baai daam ale sak mu la bala meena a daam gisi mu kama ate m pagrimu a ŋman pilim jam m jigi a poom gaam m daam ale ka diila.

³⁷ Yɔgyɔgla de, mi Nebukadnezzar yaa pai pimpauk ale zula a te wenŋmazuk Naawa, dii nyiŋla wa dii meena ate wa a nye la a nala kama. Wa suitaŋa mɛ a nala. Baai meena ale a cheŋ ale kanjanta la wa ale baga a ta ba a siŋ tɛŋ.