Daniel 3 - WEN GBAŊKA

¹ Naab Nebukadnezzar a jam sɛ ka ligmɔniŋ bɔgluk ate ku woglimmu a paari anamagib kook ale pisiye, ku labsimu mɛ a paari anamagib pi ale buye. Wa jam sɛ ku ka Dura ale bo Babilon tɛŋka po la.

² Wa wi tɛŋka niŋdeerɔma ale kpaŋŋa ale baai ale a sak naawa wie la ale baai ale a nya ligra zuk ale boteerɔba ayen ba jam ate ba piilim jaamu puusika.

³ Niŋdeerɔma ale kpaŋŋa ale baai ale a sak naawa wie la ale baai ale a nya ligra zuk ale boteerɔba ayen ba jam ate ba tigsi jam ate ba piilim bɔglukku ate Nebukadnezzar a sɛ la puusika.

⁴ Kpagni a yaa weeni ate ku jueli ayen, <

⁵ Ase nama dan wom ale damunsa ale paampuuŋta ale dunduirisa ale bagansa ale kpanta ale wiisa ale jabuui meena ate ba pai a leni yiila la a nuemu, ku a magsi kama ayen ni koori tɛŋ a puusi ligmɔniŋka bɔglukku ate Naab Nebukadnezzar a sɛ la.

⁶ Waai ale a zɛri a kan koori tɛŋ a puusi bɔglukku la, kula choa nyɔnɔwa ba yuk wa a basi ka bolimu po.

⁷ Ase ba ale ga wom ale damunsaŋa ale paampuuŋtaŋa ale dunduirisaŋa ale bagansaŋa ale kpantaŋa ale wiisaŋa ale jabuui meena ate ba pai a leni yiila la a nak la, tɛŋ meena ale nuru meena a yaa jam lo tɛŋ a puusi ligmɔniŋka bɔglukku ate Naab Nebukadnezzar a sɛ la.

⁸ Dila po baai ale a zamsi chiŋmarisa wie la a yaa poli ayen ba kaasi Juuma yuei.

⁹ Ba weeni naab Nebukadnezzar ayen, <

¹⁰ Fi weeni kama ayen waai meena a dan wom ale damunsaŋa ale paampuuŋtaŋa ale dunduirisaŋa ale bagansaŋa ale kpantaŋa ale wiisa ale jabuui meena ate ba pai a leni yiila a nak ba koori tɛŋ a puusi ligmɔniŋka bɔglukku,

¹¹ alege waai a dan zɛri an puusi ya, ku choa nyɔnɔwa ba yuk wa a basi bolim wuluku po.

¹² Alege Juuma gela baai ate fi a lueri ayen ba chim kpaga Babilon tɛŋsaŋa po la, Sadrak ale Mesak ale Abednego, bala a zɛri fi ale weeni diila kama Naaba. Bala an tom a te fi wenaŋa yaase ba puusi ligmɔniŋka bɔglukku ate fi a sɛ la.

¹³ Nebukadnezzar sui yaa jam puuri. Wa yaa tom wi Sadrak ale Mesak ale Abednego ate ba yaa ta ba jo naawa jigi.

¹⁴ Nebukadnezzar a bek ba ayen, <

¹⁵ Nya kude ni dan wom damunsaŋa ale paampuuŋta ale dunduirisaŋa ale bagansaŋa ale kpantaŋa ale wiisaŋa ale jabuui meena ale a leni yiila la, ni dan gomsi ayen ni koori a puusi bɔglukku ku nala. Alege ni dan kan puusi ku, ba ale pai ni a nyo ka bolim wuluku po. Ka wen boa ale di vari ni mi nisa po a basi?>>

¹⁶ Sadrak ale Mesak ale Abednego a yaa tulisi ayen, <

¹⁷ Ase tama dan poom bo bolimu wuluku po Wen dii ate tama va la ale yeeri ti a ta nyini fi nisima po a nyini Naaba.

¹⁸ Alege wa dan kan poom a yeeri ti, tama a yaali kama ayen fi seba Naaba, tama a kan tom a te fi wenaŋa yaase ti koori tɛŋŋa a puusi fi ligmɔniŋka bɔglukku ate fi a sɛ la.>>

¹⁹ Nebukadnezzar sui a yaa puuri ate wa ninaŋa a deri tagri a ta va chaab ale Sadrak ale Mesak ale Abednego ale nye diila. Wa yaa weeni ayen ba basi ate bolimu a toliŋ ku naŋtuok nɔi buyopɔi a gaam ku ale poom ka diila.

²⁰ Dila ŋaaŋnyiŋ, wa yaa wi tugurik tɔŋdɔma ayen ba bobi Sadrak ale Mesak ale Abednego a yuk ba a basi bolimu po.

²¹ Nuruma de ba jam yuk ba kama a basi bolimu po ale ba kɔlimaŋa.

²² Naawa wanni a jam pagra kama, bolimu mɛ a toliŋ ate bu wuluku nyiini a ko tugurik tɔŋdɔma baai ale pai Sadrak ale Mesak ale Abednego a yuk basi bolimu po la.

²³ Ate nuruma de batawa ate ba jam bobi a yik nna giŋgiŋ la, ba jam yuk ba kama a basi bolimu po.

²⁴ Naab Nebukadnezzar yaa yiti zaani ŋmai nna nwuli a bek ba ayen daa nuruba bata ate tama a bobi a yuk basi bolimu po la? Ba yaa tulisi ayen mm.

²⁵ Wa yaa tulisi ayen, <>

²⁶ Nebukadnezzar yaa torisi paari bolimu ale na ayen, <> Sadrak ale Mesak ale Abednego yaa nyini bolimu po a nyini.

²⁷ Tɛŋka niŋdeerɔma ale kpaŋŋa ale baai ale a sak naawa wie la meena a yaa jam gilim ba. Ba yaa nya ale bolimu an dɛ ba nyiŋsaŋa yaase ba kɔbtaŋa. Ba gattaŋa mɛ an jam dɛ bolimoa ate bolim nyum mɛ ka ba nyiŋsaŋa.

²⁸ Nebukadnezzar a pai pimpauk a te Sadrak ale Mesak ale Abednego Wen, waai ale tom wa maarɔwa ate wa jam vari wa tomteerɔma a basi la. Ba ta siaka ale ba Wenni alege a zɛri mi ale weeni ba ayen ba nye diila. Ba siak ayen ba dam poom kpi a zunchoŋŋa ba ale puusi wen dii ale kan daa ba Wen la.

²⁹ M kan siak ate nuru a nyini tɛŋka po yaase buui diipo a weeni wari a kaasi ba Wenni. Nuru waai a dan nye dila, ti ale ko kula choa nyɔnɔwa kama ale wa yenni demma dii nyiŋla bɔgluk a ka pagrim a vari nuru a basi.

³⁰ Kude nyiŋ naawa yaa basi ate Sadrak ale Mesak ale Abednego a chim nuru kpienta Babilon tɛŋka po.