Daniel 11 - WEN GBAŊKA

¹ Bein dii ate Miidi denɔwa Darius a dɛ wa naamu la mi zaani kama a te wa nyiŋbiiri.

² <

³ Naab kpioŋ ale jam waai ale wa a nya ni zuk ale pagrim abe wa nye dii ale a yɔk wa suinni la.

⁴ Wa dan jam a ga nueri wa tɛŋka ale poori bunaansi. Nalima ŋaai ale kan nyini wa buuni po la ale jam tuesi wa tɛŋka alege bala a kan ta pagrim ase wa ale jam ka diila.

⁵ Ejipiti Naawa ale jam ta pagrim alege wa ŋaaŋviirɔma wanyi ale ta pagrim a gaam wadek a yaa a nya wa mɛ dek tɛŋka zuk.

⁶ Bena maga dega a dan ga taam Ejipiti naawa ale nye nɔiyeŋ ale Siriya naawa a pai wa lie a yalisi wa alege ba nɔiyeŋka a kan beni ate wa chorɔwa ale wa biika ale wa tomteerɔma baai meena ale va wa a cheŋ la, ba ale ko ba meena kama.

⁷ Ku kan beni nipowa buuni po nuru ale jam chim naab. Wala ale nye kpaliŋ ale Siriya naawa tugurik tɔŋdɔma a jo ba tɛŋka po a nak yik ba.

⁸ Wa ale tuesi ba bɔgtaŋa ale ba ŋan baai ate ba pai kuta a nye ba la ale ba kpana ale ligmɔniŋka a ta ba a cheŋ Ejipiti tɛŋka. Bena maga dega a dan taam wa le basi Siriya naawa.

⁹ Kula ŋaaŋnyiŋ Siriya naawa ale jo Ejipiti tɛŋka po a tuesi ka ate ba pilim yik wa ate wa ŋmani a kuli wadek tɛŋka.

¹⁰ Siriya Naawa bisaŋa ale gomsi badek ayen ba nye kpaliŋ. Ba le tigsi tugurik tɔŋdɔba ate ba piisi a magsi dila.

¹¹ <

¹² Ase ba dan yik ba a ta cheŋ Ejipiti Naawa ale ta kanjanta ate dila ale basi ate wa togri nuruba a paari tusa alege wa kan nya nakdeka.

¹³ Kula ŋaaŋnyiŋ Siriya Naawa ŋman yaali tugurik tɔŋdɔba ate bala ale piisi a gaam piilimka ate bena yega ŋaaŋnyiŋ wa le kasim a duŋ ale kpaliŋ nyeerɔ boari ale kpaliŋ kɔlima.

¹⁴ Da ŋala po nuruba yegayega a kan siak a te Ejipiti Naawa. Gaasa nuruba ale nyini fi Daniel dek nuruma po a nye si fi gɔdaasimaŋa ale weeni diila alege ba kan nya suik a nye dila.

¹⁵ Ate Siriya naawa a yaa le jam a nye kpaliŋ a tuesi tɛŋ maŋsaŋa gela. Ejipiti tugurik tɔŋdɔma a kan baga a nye kpaliŋ ale ba. Baai dek ate ba a poli ayen ba ka tugurik tɔŋdɔba dek la a kan poom ŋman ta pagrim ale magadek mɛ la.

¹⁶ Siriya demma a yaa le kasim a nye ka dii ale a yɔk ba sueŋa la ate waai a kan bola a zaani ale wa. Wa yaa le jo ka tɛŋka dek po a ta pagrim ka zuk.

¹⁷ Siriya naawa ale gomsi kama nalimnyiini a pai wa tugurik tɔŋdɔma meena a tom tuima, dii le ku basi ate wa baga a nya pagrim wa dachaasaŋa zuk. Wa ale nye nɔiyeŋ ale wa a pai wa liewa a yalisi wa a yaali ayen wa va dila nye a nya pagrim ba zuk ale dila meena wa kan diem a nya suik a nye wa ale a yaali diila.

¹⁸ Dila ŋaaŋnyiŋ wa yaa le nye ka kpaliŋ ale tɛŋ sii ale kala a moata nyiamu nɔi la a nya pagrim si yega zuk. Alege ku ŋaaŋnyiŋ tɛŋ yoŋ nuru ale jam a nak yik wa ate wa kanjantaŋa ale nueri dula jigini.

¹⁹ Kula meena ŋaaŋnyiŋ naawa a yaa le pilim ŋmani kama ayen wa cheŋ wadek tɛŋka, ate ba yaa le yik wa dula jigini ate wa naamu mɛ a nueri dula.

²⁰ Naab waai ale nak a yik wa la ale basi kama ate lampoo cheesirɔ a va wa ga cheesi ligra ate dila a nye ate naab paalika tɛŋka mɛ a jigsi. Dila ŋaaŋnyiŋ ku kan beni ba ale ko wa kama ate waai a kan nya.

²¹ Maarɔwa a yaa weeni ayen, <

²² Waai meena ale a zɛri wa nɔi la, dan poom ka Wen yenni kaabteerɔ kpioŋku dek wa le yik wa kama ate wa nyini dula jigini a nyini.

²³ Ase wa dan nye nɔiyeŋka ale ba wa le paasi ba, wa le nuruba maga ale yiti nya pagrim.

²⁴ Ase tɛŋ sii ale jigsi la a yaa da a poli ayen ba taka suiyɔgni, abe wa yaa fɛ a jo si po a nye dii ate wa kokpieŋsaŋa an jam a nye la. Wa yaa le pai ŋan baai ate wa vari diipo ate kpaliŋka a nye la a chari wa ŋaaŋviirɔma. Wa ale gomsi kama ayen wa nye kpaliŋ ale tɛŋsa yegayega alege wa daaŋa a kan soa dii ya.

²⁵ Wa le tigsi ka tugurik tɔŋdɔba ayen ba nye kpaliŋ ale Ejipiti Naawa, ate Ejipiti Naawa mɛ ale tu chaab ale wa ale kpaliŋ nyeerɔ baai ale piisi ale pagra mɛ la. Alege ba ale paasi a yik Ejipiti naawa ate wa a kan nya nakdeka.

²⁶ Baai ate naawa a te ba ate ba a dɛ la ale a yaa ayen ba ko wa ba ale ko wa tugurik tɔŋdɔma kama kpaliŋ po.

²⁷ Nalimaŋa ŋayewa de ale kali ka jigi yeŋ ayen ba dɛ ŋandiinta, alege ba suiniimaŋa po ba taka biem popola ate dila basi ate ba velim a te chaab. Ba kan nya ba ale a yaali diila dii nyiŋla di danni an diem paari ya.

²⁸ Siriya naawa ale ŋmani a kuli yeri ale wa ŋantaŋa meena ate wa nye kpaliŋka a tuesi la, abe wa a poli ayen wa kaasi Wen nuruma suiku. Wa ale nye ka dii ate wa a yaali la abe wa ŋman pilim kuli wadek tɛŋka.

²⁹ Abe ku ŋaaŋnyiŋ ate wa fɛ a jo Ejipiti tɛŋka po a tuesi ka ate dila po ku ale pai toa kama a te wa.

³⁰ Aroom demma ale jam ale ŋaaruŋta a zɛri wa ale a nye diila, ate wa le nye kpaliŋ ale ba. Wa sui ale puuri ate wa nye kpaliŋ ale Wen suiku nuruma. Wa le ŋman sak ŋmanteka ale baai ale zɛri Wen suiku nuruma.

³¹ Wa tugurik tɔŋdɔma ale kaasi Wen yenni wa kan basi ate ba ŋman nye kaabka a te Wen yaa ka wabiok tuima nyiini.

³² Pimpaasima nyiŋ naawa ale nya baai ale zɛri Wen suiku ate bala ale va wa, alege baai ale a va Wen la ale nye kpaliŋ ale ba.

³³ Kpaga ŋaai ale ta yam la ale suk ba yammu ale ba vaanchaab. Alege ku kan beni ba le ko ba yega kpaliŋ po yaase bolim a dɛ ba a ko be ba yik gela mɛ a lik dɔk po.

³⁴ Ase ba le diem boro a ko ba la, Wen nuruma ale nya maarika maga, nuru baai magadek ale maa va ba la ale maa nya maarika magdega.

³⁵ Yam nyama de ba le ko ba gela, alege dila ŋaaŋnyiŋ nuruma ale basi biem tuima dila ale nye kama alege ate Wen ale te diipo la a paari.

³⁶ Siriya naawa ale nye ka dii ale a yɔk wa suinni la. Wa le zak wadek a zaani ale kanjanta a gaam wena meena abe wa a poli ayen wa poom gaam wena meena Wenni kama. Wa le nye wieŋa de meena kama alege ate ku paari diipo ate Wen a yaali wa namsi wa la.

³⁷ Naawa de ale zɛri wena ŋaai ate wa koma a jaa a kaab la kaabka kama ale wena dii ate nipooma a jaa yaali la. Wa ale zɛri wena meena vaka kama dii nyiŋla wa a poli kama ayen wa a gaam ŋa meena kama.

³⁸ Wa le a magsi wa zuli Wen la, wa le goanti pai zulaŋa a te ka wena, wena ŋaai ate wa kokpieŋsaŋa a poom zɛ ŋa wie la. Wa le pai ligmɔniŋ ale kpana ale tiirita a tom ŋa tuima.

³⁹ Wa le pai ka nuru baai ale a kaab wen yonta la a tom tuima. Wa le pai zula a te baai ale siak ayen wa ka kpagi abe wa basi ate ba chim kpaga abe wa te ba tɛŋ ase tiirim la.

⁴⁰ Ase Siriya Naawa daaŋa a dan moata nuerika, Ejipiti Naawa ale nye kpaliŋ ale wa ate Siriya Naawa mɛ ale kpaliŋ ale wa pagrim meena ale naab wusuma ale ŋaaruŋta. Wa le poom a jo tɛŋsaŋa po ale fifiok ase nyiam ale jam beli diila.

⁴¹ Wa le fɛ kama a jo tɛŋ kaai ate Wen a puulim ayen wa te ba la po a ko tusa. Alege tɛŋsaŋa de Edom ale Moab ale Ammon ale tali a boro kama.

⁴² Ase wa dan fɛ jo tɛŋsaŋa de meena po, wa kan gaam Ejipiti a basi.

⁴³ Wa le tuesi Ejipiti ligmɔniŋka ale kpanaŋa meena kama. Wa le maa tuesi Libia ale Kus tɛŋsaŋa mɛ kama.

⁴⁴ Ate ba yaa dan wom dii ale nye kori ale wiilukku geŋsa la yɔgsum ale yik ba ate wa nya suik a nye kpaliŋka a ko nuru boari.

⁴⁵ Wa le ti wa viuku nyakpiemu ale tuilum guuku suŋsuŋsaŋa po, kauk kuui ate Wen yenni a boro la. Wa le kpi ka dula jigini waai a kan bo dula a maari wa.