Azaya 9 - WEN GBAŊKA

¹ Alege daanika a kan ŋman bo baai ale a nam la jigi ya. Dila powa wa jam basi kama ate Zebulun ale Nafitali tɛŋsaŋa a siŋ tɛŋ, alege wa ale nye ate zula a jam Galili baai ale kan daa Juuba la tɛŋka ale bo nyakpiemu suiku nɔi ale Jodan benni la.

² Nuru baai ale a cheŋ legi po la a nya ka bolim kpiem. Baai mɛ ale bo legi kpien po la, bolim a nyaksi ba jigi.

³ Naawen ya, fi nye ate tɛŋka a lagri ale ŋman te ba masim a gum ba masimu po. Ba a dɛ masim fi niŋ ase nuruba nyiem ale che ba ŋankpaanta ate ba sue a peenti diila. Ba a dɛ masim ase ka nuruba nyiem ale lab ŋan baai ate ba kɔlim la.

⁴ Midian nak yikka danni fi kaasi niiga diok kuui ale chim jibta a te ba la kama ale diok kuui ale bari vi ba ŋmankpalaŋa zuk la ale baai ale a namsi ba la doani.

⁵ Tugurik tɔŋdɔ meena nuensa ate ba su nye kpaliŋka la ale garuk meena ale lusi ziimu po la a magsi ka pai juka, ba chimka kpaam a magsi bolim.

⁶ Biik ate ba biak a te ti, nidoabili ate ba pai a te ti, ate pagrimu a bo wa ŋmankpalaŋa zuk. Ate ba a wi wa ayen, Sagrɔ Kperikaliik ale Wen Tanjaŋini ale Taam Wuu Koa ale Suiyɔgni Nabiik.

⁷ Wa pagrimu ale wa suiyɔgni zuaka a kan ta kpeglimka. Wa ale kali Deevid naamu zukpaglika zuk. Wa ale basi ate wa naamu a zaani abe wa ta wensie ale nyemagsika a nyini dila po a kasim a cheŋ. Naawen Dii Ale A Dɛ Tugurik Tɔŋdɔma Niŋ La mariŋka ale basi ate kude a nye.

⁸ Nyɔnɔwa a te ka tomtomiŋ a ta chaab ale Jekob. Ka ale lo ka Izirali zuk.

⁹ Nuruma meena ale miŋ ku. Ɛfraim ale Samaria tɛŋ demma ale miŋ wanni de. Alege kanjanta ale tukpari ale bo ba jigi la nyiŋ, ba a weeni kama ayen.

¹⁰ <>

¹¹ Alege Naawen a basi kama ate Arezin demma dachaasaŋa a nya pagrim a ta chaab ale ba ale choa ba dachaasaŋa a basi.

¹² Araam demma ale nyini kori la, ale Filistia demma ale nyini yeniŋ la, a lak ka ba noaŋa a pa Izirali a nɛ. Kude meena ŋaaŋnyiŋ wa sui ale diem a puuri ale ba. Wa za wa namsi ba kama.

¹³ Alege nuruma an ŋmani waai ale nak ba la jigi ya, yaase ba gisi Naawen Dii Ale A Dɛ Tugurik Tɔŋdɔma Niŋ La.

¹⁴ Dila nyiŋla, Naawen ale gebi wadek a nyini Izirali jigi zuk ale juik meena, kpinkparuk naŋ ale wuwɔŋ meena dai yeŋ po.

¹⁵ Niŋdeerɔma ale kpaŋŋa ale chim zukku, ate biisiteerɔba baai ale ta venta sinsaga a sak la ale chim juiku.

¹⁶ Baai ale a gani nuruma de la, ba ta ba cheŋ bɛ kama, ate baai ate ba a gani la, ba ta ba cheŋ bɛ.

¹⁷ Dila nyiŋla, Nyɔnɔwa sui a kan peenti ale nidoabili paalisaŋa, yaase wa ta jiirim ale baai ale kan ta koba ale pukɔga. Dii nyiŋla, waai meena a kan tom wentuima. Ba a nye ka gaasa ale a biisi biem wie. Nyakude meena nyiŋ, wa suinni a an diem a basi ya. Wa za wa namsi ba kama.

¹⁸ Wensie, gaasa a dɛ ase ka bolim la. Bu dɛ muŋkangɔtisaŋa ale muŋsaŋa ale chogsi gɔnni tikima a dɛ ate nyuisa yiti a jueli wen nna kulkul.

¹⁹ Naawen Dii Ale A Dɛ Tugurik Tɔŋdɔma Niŋ La suipuurumu nyiŋ, tɛŋka ale dɛ ate nuruma ale chim kpaam a magsi bolim. Ate waai a kan pai wa suok a basi.

²⁰ Ba ale cheem a gala ale a juga a pa ŋandiinta a dɛ, alege ba a kan chagi waai meena ale yik ka ba bisa a ŋɔbi.

²¹ Manasa dɔkdemma ale Ɛfraim dɔkdemma ale nye kpaliŋ ate ku ŋaaŋnyiŋ ba ale gum chaab a nye kpaliŋ ale Juda dɔkdemma. Alege kude meena zuk, wa suinni a kan yɔgi. Wa za wa namsi ba kama.