Azaya 53 - WEN GBAŊKA

¹ Ka wana ale ta siaka ale ti wanni? Naawen abe yeeri wa nisa a sak ka wana?

² Wa chim wa niŋ ase ka tiib buli la, ate bu naŋsaŋa a feri tɛŋ kosik po. Nalim yaase kpaŋta a jam ka wa jigi ayen ku nye ate ti nina a cheŋ wa jigi ya, jaab a ka wa jigi ayen ti yaali.

³ Nuruba a jam valiŋ wa kama ale zɛri wa ate wa chim niniga nuru ale tu chaab ale ninam. Wa nye ase ka nuru waai ate nuruba a suk ba nina a nyini wa jigi. Ba jam valiŋ wa kama alege ate ti an pai wa a chim jaaboa.

⁴ Wa sum pai ti nyiŋtuilaŋa ale ji ti niniŋŋa, alege ti nya se ka Wen ale namsi wa ale nak wa ale daani wa la.

⁵ Alege ba chub wa ka ti nye kaasuŋku nyiŋ. Ba kaasi wa ka ti biemu nyiŋ. Ninam buui ale ta suiyɔgni a jam te ti la a siŋ ka wa zuk, ate wa mulaŋa nyiŋ, ti nya tebika.

⁶ Ti meena a nye a se ka piisa la, a cheŋ bɛ. Ti wanyi meena a va ka wa suik. Ate Naawen a pai ti meena biemu a basi wa zuk.

⁷ Ba jam daani wa kama ale ŋman namsi wa, alege wa an jam lak nɔi ya. Ba jam ta wa a cheŋ ase ka pabiik la ayen ba te tɔgridɔwa, ase posuk ale za pondɔwa niŋ la, wa jam nye ka chim, wa an jam a lak nɔi ya.

⁸ Ba jam namsi wa kama ale bo wa buusa ale ta wa a cheŋ. Be ka wana ale wa biisi wa ŋaaŋbisa wari ya? Diila ba jam yeeri wa a nyini ŋanvuta tɛŋka po kama. Mi nuruma nye kaasuŋku nyiŋ ale soa ate ba ko wa.

⁹ Ba jam gomsi ka gaasa nyam boosuk a te wa, ba jam a gu wa ka jigsirɔ vɔrup po, wa an jam a nye wari a kaasi ya, yaase nuruba be an jam wom venta wa nɔi po.

¹⁰ Alege ku jam ka Naawen yaalika ayen wa ŋɔriŋ abe wa nye ate wa nam, Naawen nye wa nyuvunni ka foolaa tiirim, wa ale nya wa ŋaaŋbisaŋa abe wa daaŋa a wɔŋa, ate Naawen yaalika ale jigsi wa nisa po.

¹¹ Wa ninammu ŋaaŋnyiŋ, wa ale nya nyuvuri bolimu ate wa ale chak. Wa yam wie miŋka ale m tomteerɔma wayɔrisimaŋa nyiŋ ale ta vɔŋteka a jam nuru boari jigi, ate wa ale tuesi ba biemu.

¹² Dila nyiŋ, m le pai juijui ale zuak la a te wa, ate wa ale baai ale pagra la ale lab ŋan baai ate ba kɔlim a nyini kpaliŋka po la, dii nyiŋla wa kpiiri ka wa nyuvunni a te kum, ate ba maa chiini wa a gum nye kaasirɔma po. Diila wa tuesi nuru boari biem ale puusi a te nye kaasirɔba.