Azaya 34 - WEN GBAŊKA

¹ Ni cheŋ a paari, a wom nama tɛŋsa. Ni zaani ŋmam nama nuruba. Basi ate tɛŋzuk de demma a wom ale ŋan baai meena ale bo ka po la, tɛŋka meena ale jaab meena ale nyini ka po a nyini la.

² Naawen sui ale a puuri ale tɛŋsaŋa meena. Wa suipuurumu a bo ka ba tugurik tɔŋdɔma meena zuk. Wa za wa kaasi ba meena kama, Wa le pai ba a te ka tɔgridɔwa.

³ Ba ale yuk nuru baai ate ba ko la a basi, ba kpiema ale kasim a nyuŋ, ba ziitaŋa ale tagli guutaŋa zuima meena.

⁴ Chiŋmarisaŋa meena ale bo wenzukku la ale nyaliŋ, ate wenzuk a kpamsi ase duŋ gbaŋ la. Chiŋmarisaŋa meena ale wiiri lo ase tiib vaata la, ase moota ale nyini kiŋkaŋ zuk a lo diila.

⁵ M gebika a nyu chak kama wenŋmazuk. Ni nya, ka siŋ cheen ka Edom zuk ale buusa, ba ka nuru baai ate mi a poom ŋaam a kaasi ba la.

⁶ Naawen gebika a so ale ka ziim. Kpaam ale lik ka ale pa bisa ale bua ziita ale kpaam a nyini padaasa yiima po. Diila Naawen a ta ka kaabka a bo Bozra ale tɔgrik kpieŋ a bo Edom.

⁷ Ate lalik jeeŋ kaai ale waara la ale lalikbilisa ale lalik kpieŋsa ale lɔ tɛŋ ale ba. Ziim ale tagli ba tɛŋka zuk, ate kpaam ale mooŋ nyuŋku.

⁸ Diila Naawen a ta ka dai ayen wa tuni baai ale nye biem la. Ku ale chim ka namsika ben, ayen wa pai a nye a maari Zayon.

⁹ Edom beli naŋsaŋa ale chim kotaali, ate nyuŋku ale chim bolim kaala, ate wa tɛŋka ale chim kotaali bolim.

¹⁰ Bu a kan kpi yok yaase kantueŋŋa. Bu nyuisaŋa ale kasim a yiti kama taam wuu. Gaŋsa tɔgatɔga ale jam taam, ka ale diem chim ka tɛŋ lɔri a dua. Nuru a kan ŋman va ka po a taam.

¹¹ Kpaluŋ ale viuk ale tuesi ka. Viuk kpioŋ ale tagaaruk ale yɔk tukta dula. Wen ale teeri butimka magsika miika ale kaasuŋ magsika jaamu a basi Edom zuk.

¹² Ba nuru kpientaŋa a kan ta jaab dula a nak kuusidi ayen ba tɛŋŋa, ate ba nabisaŋa meena ale muriŋ bɛ.

¹³ Muŋsa ale chim a vari ba nalima yieŋa, ate muŋsa tiisa ale chim a vari ba tɛŋka parisaŋa. Gɔi baasa ale nya wa a pai chim kɔk. Abe ka chim viita yeri.

¹⁴ Gɔi duŋsa ale tu chaab ale piina, ate walisa ale kum a gisi chaab, ate yok ŋanta ale kali dula, ate dula ale chim ba vuusum jiga.

¹⁵ Viuku ale yɔk ku tuk dula a lob jena. Ku ale wɔgri a pai ku kinkaŋŋa a lik ku bisaŋa. Dula mɛ ate kpaluŋ chaasa meena ale tigsi chaab jigi yeŋ, jaduok ale jasari.

¹⁶ Nya Naawen gbaŋka po a karim. Ŋade kunyi mɛ la a kan nyini du a nyini bɛ. Ba wanyi mɛ la a kan silim wa vaanchoa. Diila ka wa nɔnni ale biisi wanni, ate Naawen Chiika ale tigsi ba meena a jam jigi yeŋ.

¹⁷ Wa ale lab ba jiŋŋa a te ba. Wa pai ka ja magsimmu ale bo wa nisaŋa po la a lab a te ba. Ba ale soa ku kama taam wuu, ate ba ŋaaŋbiik sii ale bo ŋaaŋ cheen la ale bo dula.