Azaya 32 - WEN GBAŊKA

¹ Ni nya, naab ale dɛ naam ale wayɔrisima, ate kpaga ale dɛ naam ale nyemagsika.

² Nuru meena ale nye ase ka yɔgsum la a lik vioku ate ku kan paari fu ale sukka jigi ate ŋmoruk vioku a kan paari fu, ale benaŋsa ale bo gɔi po la, ale piuŋ kpioŋ yisuŋ ale bo tɛŋ kosik po la.

³ Dila baai nina ale a nya la a kan ŋman ligi, baai tue ale a wom la ale wom.

⁴ Waai ale a poli mwuli la ale seba abe wa miŋ chak, waai ale biisi a gagli la ale biisi nyaanti.

⁵ Ba kan ŋman wi beruk ayen zula nyɔnɔ yaase paasidɔ ayen zula nyɔnɔ.

⁶ Beruk a biisi ka berinni, ate wa popolaŋa a kasim ta biem nyiini. Wa a nye ka wie ŋaai ate Naawen a kisa la, ale a nye wie a kaasi Naawen. Wa kan te kom ale ta baai la ŋandiinta ale a mini baai ate nyanyuila a ta la nyiam.

⁷ Paasidɔwa nyeelaŋa ka gaasa nyiini, wa a nye ka biem wie ayen wa kaasi jajakka ale venta, jajakka wanni a dan poom ta wensie, wa bo a mini wa.

⁸ Alege zula nyɔnɔ a zɔk ka zula zɔga, wa zulaŋa nyiŋ wa a zaani kama.

⁹ Nama nipok baai ale a nya wari ase di daa wari la, ni yiti a wom mi, Nama nipokbili sii ale a poli ayen ni bo ka boka dek jigi la, ni wom mi ale ta dii m weeni la.

¹⁰ Ku dan gaam bein maga dega nama baai ale a poli ayen ni bo ka boka dek jigi la ale lo, tii sii ale a yɔni yɔna la a kan ŋman yɔni.

¹¹ Ni lo nama nipok baai ale a nya wari ase di daa wari la, ni nyiŋsa ale gɔk. Nama nipokbili sii ale poli ayen ni bo ka boka dek jigi la, ni yeeri ni gattaŋa abe ni jo boorisa gatta a basi ni chaasaŋa po.

¹² Ni a nak kuusidi laŋ maŋsaŋa ale yɔna tiisaŋa

¹³ ale m tɛŋka nuruma nyiŋ, tɛŋ kaai ate muŋsa ale muŋkangɔtisa a vari ka la, mm ni kum te yie ŋaai ale jam ta suipeentik la ale tɛŋ kpieŋka ate nuruba a jam a yaali la.

¹⁴ Yie pagrisaŋa ba le banti ŋa, nuemka tɛŋka a doa koruk, guuta ale gboŋ woŋku ale chim tɛŋ kaai ale kan ta kiri la taam wuu, bonsa boka jigi ale duŋsa dɛka jigi,

¹⁵ ate ku paari diipo ate Naawen Chiika ale nyini ŋmazuk a siŋ ti zuk la, ate gɔnni ale chim laŋ poosuk abe laŋ poosuku a nye ase sagi la.

¹⁶ Nyemagsika tuima ale bo gɔnni po abe wayɔrisima a bo laŋ poosuku po.

¹⁷ Wayɔrisima yɔnaŋa ale chim ka suiyɔgni. Wayɔrisima nyeka ale ta chim ale sebchakka a jam taam wuu.

¹⁸ Mi nuruma ale bo suiyɔgni jiga, ba le bo yie ŋaai ale ta boka la po, juijui ate daanika a karo la a vuusi.

¹⁹ Ŋmoruk tana a dan lo gɔnni po ate tɛŋ kpieŋka a ŋɔriŋ meena,

²⁰ nya ku le chim suipeentik dii a te ni, ate ni a bori ni ŋantaŋa buboalisa nɔi meena ale basi ate ni niiŋa ale ni bonsaŋa a dɛ nna fasiyaa.