Azaya 3 - WEN GBAŊKA

¹ Yɔgyɔgla de ni nya, Nyɔnɔwa, Naawen Dii Ale A Dɛ Tugurik Tɔŋdɔma Niŋ La, a za wa tuesi Jerusalem ale Juda jigi ŋan baai ate wa a te ale a maari la kama. Wa le basi ŋandiintaŋa ale nyiamu teka meena.

² Nuru tuaka ale tugurik tɔŋdɔwa ale boteerɔwa ale biisiteerɔwa ale baanɔwa ale nisɔmawa,

³ nuruba pisinu kpagni ale nuru waai ale ta kpaŋta la ale sagrɔwa ale gobrɔ waai ale seba nisa tuima la ale sampoporik sebrɔ.

⁴ Mi ale basi ate nidoabilisa a chim ba kpaga. Bi fiisa ale nya ba zuk.

⁵ Nuruba ale namsi chaab, nidoa ale ta chaab ale wa choa, ate kali mɔtidɔ ale ta chaab ale wa choa. Bi paaluk ale yiti a ta chaab ale ŋankpagsa. Nuru baai ale kan ta zula la ale yiti a ta chaab ale baai ale ta zula la.

⁶ Nuru ale yiti a yik wa suata po wanyi wa ko yeri po ayen. <>

⁷ Alege da dila danni wa ale kaari a weeni ayen, <>

⁸ Jerusalem a ja kama, Juda a lo kama. Ba wieŋa ale ba tuima a nye a kaasi ka Naawen ale a taŋ wa zulaŋa.

⁹ Fi dan nya ba ninaŋa po, ku ale sum a sak fu ayen ba sum nye kaasi kama. Ba a tigsi ba wabaataŋa ase ka Sodom tɛŋka demma la. Ba kan suk bu. Ku ale toa a te ba. Ba ta ka kaasuŋ a jam badek zuk.

¹⁰ Weeni wayɔrisima nyama ayen ku ale niak a te ba. Ba ale dɛ masim a ta va ba tuimaŋa ŋanta nyiŋ.

¹¹ Ku ale toa a te gaasa nyam. Kaasuŋ ale jam ba zuk. Ba ale nya ba ale pai ba nisimaŋa a tom tuim ŋaai la tutuna.

¹² Bi paalukku a namsi mi nuruma, ate nipooba mɛ ta pagrim a nya ba zuk. Mi nuru baai ale a dɛ ni niŋ la a ta ni a cheŋ a bɛ kama. Ba basi suiku kama.

¹³ Naawen a kali wa kalika jigini boteka yenni po kama. Wa abe yiti kama ayen wa bo nuruma buusa.

¹⁴ Naawen abe boro ayen wa bo nisɔmma ale wa nuruma niŋdeerɔma buusa. <

¹⁵ Boan nyiŋ ate ni a kaasi mi nuruma ale ŋman a num ŋanjaksaŋa nina?>> Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni dila.

¹⁶ Naawen ale weeni ayen, <

¹⁷ Dila nyiŋla, Nyɔnɔwa ale basi ate nira a nye Zayon nipooma zuimaŋa. Naawen ale basi ate ba zuisa a kpa.>>

¹⁸ Da dila danni Nyɔnɔwa ale vari ba ŋan baai ale nala la ba jigi. Bala ale baŋsa ale ŋan baai ale a vili zuima ale ŋiri baŋsa,

¹⁹ ale tukpana ale nisɔgi baŋsa ale garuk nyaara nyaara,

²⁰ ale zuk kɔlima ale karik chɔrima ale chiak garuk pali ale kpa masik kolima ale koarisa ŋan juenta ale

²¹ yue nifelima ale nyue nifelima ale

²² garuk naliŋsa ale garuk woŋta ale garuk gelisa foata ale

²³ nyaasuŋta ale garuk pa naliŋsa ale zuk jakpiim ale garuk viinta.

²⁴ Ku ale magsi ku chim nyum masik la ku le chim ka nyum biok, ku le magsi ku chim garuk pali la ku le chim ka miik, ku ale magsi ku chim zuisa la ku le chim ka zuk kpaauŋ. Ate garuk naluŋ ale chim boorik garuk, ku le magsi ku chim nalim la ku le chim ka chivie.

²⁵ Gebik ale lɔnsi fi nidoama tɛŋ ate fi tugurik tɔŋdɔma ale kpi kpaliŋ po.

²⁶ Zayon nansuiŋtaŋa ale fɔbili abe ba a kum. Wa za wa kali ka tɛŋka wa kan ta jaaboa.