Azaya 26 - WEN GBAŊKA

¹ Dai dila danni ba le yi yiini de Juda tɛŋka po ayen, ti ta ka tɛŋ pagrik. Wen a basi kama ate varibasika a chim ka parisa ale ka bimbima.

² Lak tuataŋa ate wayɔrisima tɛŋka a jo, tɛŋ kaai ale ta siaka la.

³ Fi ale yik waai popola ale bo jigi yeŋ la ale suiyɔgni, dii nyiŋla wa ta sebchakka ale fu kama.

⁴ Kasim ta sebchakka ale Naawen, diila Naawen, Naawen ka Piuŋ taam wuu.

⁵ Wa nye ate kanjanta nyam a siŋ tɛŋ, ale kaasi ba tɛŋka. Wa palinti ka a magsi chaab ale tɛŋka a yuk ka a basi tantaŋa po.

⁶ Naŋtaata ale tabi ka a lɔnsi, baai ate ba a namsi ba la naŋtaataŋa, ŋanjaksaŋa naŋtaataŋa.

⁷ Gola a ka wayɔrisima nyɔnɔ suiku po. Fi Waai ale kan ta kaasuŋ la, a nye kama ate wayɔrisima nyɔnɔ suiku a nala.

⁸ Wensie, Naawen yaa, ti ale a cheŋ fi buusa suiku po la, ti le limisi fu. Ti suiniimaŋa a yaali ka fi yuenni ale a yiti diila.

⁹ Mi chiika a yeenti a yaali fu kama yok, ate m chiika a zeenti a yaali fu saluiku. Fi buusaŋa a dan jam tɛŋka zuk, nuruma ale bo ka po la a zamsi ka wayɔrisima.

¹⁰ Niaka a dan poom jam gaasa nuruba jigi, ba kan zamsi wayɔrisima wie. Dan poom ka tɛŋ kaai ale nye a magsi la po ba ale diem a nye biem, ate ba poom a kan pa zula a te Naawen zuaka ale ka diila.

¹¹ Naawen yaa, fi nisaŋa a zak ka wen alege ba kan nya. Basi ate ba nya fi popola ale bo fi nuruma zuk diila ate chivie a yik ba. Basi ate fi ale tali bolim buui a magsi fi dachaasaŋa la a de ba.

¹² Naawen yaa, fi ale te ti suiyɔgni. Ti ale baga a nye dii meena la, ka fi ale tom a te ti.

¹³ Naawen yaa, ti Wenni, kpaga yona a nya ti zuk a nya kama, alege ka fi yuenni nyiini ate tama a zuli.

¹⁴ Ba yaa kpi kama, ba ŋman karo. Chiik sii ale cheŋ la an yiti ya. Fi namsi ba kama ale ta ba jam kaasuŋ jigi. Fi ko ba kama ate waai a kan teeri ba.

¹⁵ Naawen yaa, fi nye kama ate tɛŋ kpieŋka a lagri. Fi ale sum nye ate ka lagri nna yegayega. Fi nya zula kama a te fidek. Fi nye kama ate tɛŋka banaŋa a lagri.

¹⁶ Naawen yaa, ba jam fi jigi kama ale ba daanika. Ase fi ale dari ba tue la, ate ba waasi a puusi fu.

¹⁷ Ase nipok ale ta lɔgi a dom ayen wa biak a kaari diila, dila ate tama a nye a bo fi niŋ, Naawen yaa.

¹⁸ Ti jam ta ka puuk, ate ka a dom, alege ti biaka viok. Ti an ta varibasika a jam tɛŋka zuwa. Ti an biak nuruba a basi tɛŋka zuwa.

¹⁹ Alege ni kpiema ale boro. Ba nyiŋsaŋa ale yiti. Nama baai ale bo tanta po la, ni yiti a nuem ale masim. Ni maglimu a nye ase ka saluik maglim la. Tɛŋka ale ŋman biak ka kpiema.

²⁰ Mi nuruma, ni cheŋ, a ga jo ni diinaŋa po, abe ni lik nidek a basi ni diinaŋa po. Ni suk nidek maga ate wa suipuurumu a taam.

²¹ Nya, Naawen a nyini ka wa boka jigini a cheena ayen wa namsi nuru baai ale tom wabaata la. Tɛŋka ale dak baai ale suk a ko nuruba ka zuk la. Tɛŋka a kan ŋman suk baai ate ba ko ba la.