Azaya 2 - WEN GBAŊKA

¹ Amoz nidoabinni Azaya ale nya dii a ta va Juda ale Jerusalem zuk la ale nna.

² Dai kpeglimaŋa po, Naawen yenni guuku ale zaani ase naab la guutaŋa po. Ku ale yiti ŋmai a gaam guutaŋa, ate tɛŋsa meena ale chuiri a cheŋ ku jigi.

³ Nuru boari ale jam a weeni ayen, <> Wa sinsaŋŋa ale nyini Zayon a cheŋ. Ate Naawen wanni ale nyini Jerusalem.

⁴ Wa le bo tɛŋsa suŋsuŋ buusa. Wa le yik nuru boari wie a yomsi. Ba ale kuri ba gebisaŋa a nye niiga kua. Ba gbattaŋa ale labri a chim gebisa ate ba pai a yoarisi tiisa. Tɛŋ a kan pai gebik a ta chaab ale tɛŋ ka choa, yaase ba ŋman sak badek a magsi kpaliŋ diipo diipo.

⁵ Jekob dɔkdemma abe jam ate ti cheŋ Naawen bolimu po.

⁶ Fi zɛri fidek nuruma Jekob dɔkdemma kama. A nyini Kori geŋsa, ku kasim a sueri ale ka kperisa tuima. Ba a tom ka sampoporinni tuima ase Filistia demma la, ale a nak ba nisima ale baai ale kan seba Wen la.

⁷ Ba tɛŋka a sueri ale ka kpana ale ligmɔniŋ. Ba tuilum ŋantaŋa a ka kpeglimka. Ba torokoma a ka kpeglimka.

⁸ Ba tɛŋka a sueri ale ka bɔgta. Ba a koori ka tɛŋ a zuli ba nisima tuimaŋa, a zuli ba nandubsaŋa ale nye ŋan baai la.

⁹ Dila Naawen ale te nuru siŋ tɛŋ ate nurubiik a zaab wadek. Kan vua a te ba.

¹⁰ Ni cheŋ pinaŋa po, ni suk tɛŋka po a nyini Naawen kpazinagsuku po ale wa naamu nalimu po.

¹¹ Nuru waai ale a nya wadek nna se wa gaam nuruba la ale zaab wadek, ate kanjanta nyam ale siŋ tɛŋ. Ka Naawen nyiini ale za wa nya zakzaanika da dila danni.

¹² Naawen Dii Ale A Dɛ Tugurik Tɔŋdɔma Niŋ La a lueri ka dai a magsi kanjanta nyam ale kayeruk nyam ale zak badek a zaani la, ba meena ale zaab badek.

¹³ Wa lueri ka dai a magsi Lebanon nyunyoŋtaŋa meena ale woŋŋa ale ta kayeruk la ale Basan kinkaŋpettaŋa meena.

¹⁴ Guuk woŋta ale guuk tii ale jueli la meena ale

¹⁵ yie ŋaai ale sɛ jueli wen la ale parik pagrik meena ale

¹⁶ Tarsis ŋaaruŋ meena ale ŋaaruŋ naluŋ meena.

¹⁷ Nurubiik kanjantaŋa ale siŋ tɛŋ ate nurubisa ale zaab badek ale ba kanjantaŋa. Ka Naawen nyiini ale za wa soa zakzaanika da dila danni.

¹⁸ Ate bɔgta meena ale muriŋ bɛ.

¹⁹ Nurubisa ale chali a jo pina vie ale tɛŋka vieŋa po, dii nyiŋla Naawen kpazinagsuk ale wa naamu nalimu nyiŋ. Wa ale yiti kama a choa tɛŋka.

²⁰ Da dila danni nuruba ale yuk ba bɔgtaŋa tii ate ba pai kpana ale ligmɔniŋ a nye ayen ba a puusi la a te ŋooma ale kpinkpirinsa.

²¹ Ba ale yiti a jo vie pinaŋa po ale pina ŋaai ale yik wen a churinti la po, a nyini Naawen kpazinagsuk ale wa naamu nalimu nyiŋ, wa ale yiti kama a choa tɛŋka.

²² Kan mariŋ nuru biiga, waai ale ta vuusum wa nyuevie po la, wa ka boa?