Azaya 15 - WEN GBAŊKA

¹ Naawen wa dii ale a magsi chaab ale Moab la. Ar ale bo Moab po la a kaasi kama, a kaasi kama yok yeŋ po. Kir ale bo Moab la a kaasi kama, a kaasi kama yok yeŋ po.

² Dibon demma a cheŋ ka ba puusika yenni ŋmani ayen ba kum. Moab a kum Nebo ale Medeba nyiŋ. Ba chiiri zuima meena ale che teeŋsa meena a basi.

³ Suitaŋa po ba jo ka boorisa gatta. Ba bo ka ba yieŋa zuk ale peelim jigi meena a kum, ba poom lo duak ka tɛŋ a kum ba kumsaŋa.

⁴ Yesbon ale Elealeya demma a kaari kama ate ba luelutaŋa a nyini peelim ate Jayaz a wom ba. Dila nyiŋla, Moab tugurik tɔŋdɔma a kaari kama ate ba kpaziita poom a nak.

⁵ Mi a kum a te Moab a nyini ka m suinum po Moab nuruma a chali a cheŋ ka Zoar, ate ba gela a chali a cheŋ Eglat Selisiya. Ba poom cheŋ jueli a paari ka Luyit ale diem kum a cheŋ. Baai ale va Yoronaim suiku la, a kum kama a magsi chaab ale ba kaasuŋku.

⁶ Nimrim nyaataŋa a kpeeri kama ate wuutaŋa a kɔ. Gɔnni ale tattaŋa po jaab a karo a sobri.

⁷ Dila nyiŋ ba ŋantaŋa ate ba paari a tigsi ba la, ba ji ta cheŋ ka Niak Tiisaŋa Vooliŋka.

⁸ Ba kumsaŋa a chɔgsi a paari Moab tɛŋka banaŋa. Ba kumsaŋa a paari Eglaim ale Beer Elim tɛŋsaŋa kama.

⁹ Dimon tɛŋka nyaataŋa ka ziim, alege mi ale diem a ta namsika yega a jam Dimon zuk. A ta gbeŋli a jam Moab nuru baai ale chali la zuk ale baai ale tali bo tɛŋka po la.