Azaya 13 - WEN GBAŊKA

¹ Naawen ale pai wa dii a sak Amoz nidoabinni Azaya ate wa nya a magsi chaab ale Babilon la ale nna:

² Zak tikti guuk kuui ate jaab a ka ku zuk la, nuem ate ba wom abe ni zak nisa, ate ba baga a va nuru kpientaŋa nansuiŋtaŋa a jo.

³ M weeni m nuru weleŋsaŋa kama. M te m tugurik tɔŋdɔma ka nɔi ayen ba sak m suipuurumu. Baai nyiem ale a dɛ masim m nakdeka nyiŋla.

⁴ Ni wom, nuemka ale bo guutaŋa zuk ase nuru boari la. Ni wom nalima tɛŋsa wɔkwɔk choa ka nna ase tɛŋ kpieŋsa dem ale tigsi jigi yeŋ la. Naawen Dii Ale A Dɛ Tugurik Tɔŋdɔma Niŋ La a gomsi ka tugurik tɔŋdɔba a magsi kpaliŋ.

⁵ Ba a nyini tɛŋ sii ale yalima, ba nyini ka wenŋmazukku kpeglimka meena. Ka Naawen ale cheena ale wa suipuurumu kɔlimaŋa ayen wɛ kaasi tɛŋka meena.

⁶ Ni abe kum, dii nyiŋla Naawen danni a moata kama. Ku ale jam ase ka kaasuŋ la a nyini Waai Ale A Niak La jigi.

⁷ Dila nyiŋ, nisa meena ale wobsa, ate nuru meena ale ŋiak.

⁸ Yɔgsum ale yik ba, nyiŋdomma ale daanika ale jam ba zuk. Ku ale toa a te ba ase ka nipok ale a dom lɔgi diila. Ku ale cha ba kama ase bolim ŋiak ale a nyaksi ba nina po diila.

⁹ Ni nya, Naawen danni a cheena di abe ka nyeka tuem dai ale suipuurum nna yegayega ate wa ale kaasi tɛŋka ale wabaata nuru baai meena ale bo ka po la.

¹⁰ Chiŋmarisaŋa ale ŋan baai meena ale bo wenŋmazukku la a kan nyaksi. Wenbinni ale sobri ate chiika a kan nya.

¹¹ Mi ale namsi tɛŋka nuruma ba biemu nyiŋ ale nuru baataŋa ba wabaataŋa nyiŋ. Mi ale basi ate kanjanta nyam ale ba kayerinni a kpeglim, abe m nye ate kanjanta nuruba ale baai ale kan ta jiirim la a siŋ tɛŋ.

¹² Mi ale nye ate nurubiik a silima a gaam ligmɔniŋ kaai ale nye cheri la, wa ale poom a silima a gaam ligmɔniŋ kaai ale bo Ofir la.

¹³ Dila nyiŋla, mi ale nye ate wenŋmazukku a choa ate tɛŋzuk de mɛ ale kpiŋsi a nyini ka boka jigini. Ka Naawen Dii Ale A Dɛ Tugurik Tɔŋdɔma Niŋ La ale za wa nye dii wa suipuurumu danni la ale la.

¹⁴ Ase sebik la, ase piisa ale kan ta naapeerik la, waai meena ale ŋman cheŋ wadek nuruba jigi, waai ale ŋman cheŋ wadek tɛŋ.

¹⁵ Waai dek ate ba a yik wa la, ba a chub wa kama, baai meena ate ba a yik ba la, ba a ko ba kama ale gebik.

¹⁶ Ba bisaŋa ale ŋɔriŋ ba nina po. Ba ale kɔlim ba ŋantaŋa a nyini ba yieŋa po abe ba fɛ a goa ale ba pooma.

¹⁷ Ni nya, mi ale siti Miidi demma a basi ni nyiŋ, baai niŋ ale kan bo kpana ale ligmɔniŋ po la.

¹⁸ Ba timaŋa ale lɔnsi nidoabili paalisaŋa tɛŋ. Ba a kan ta jiirim ale buluataŋa yaase bi fiisaŋa.

¹⁹ Babilon, tɛŋ kaai ale nala a gaam tɛŋsa meena la, Kaldiya demma zulaŋa ate ba a ta kanjanta ŋa nyiŋla, Naawen ale tuesi a nyini ba jigi ase Sodom ale Gomora tɛŋsaŋa ate wa jam a nye diila.

²⁰ Waai a kan ŋman bo ka po, yaase ka poom boro gaŋsa meena po a cheŋ. Arab denɔ kan yaali ayen wa ti wa viuk dula, naapeerik a kan yaali ayen wa te wa ate wa piisa a vuusi dula.

²¹ Alege gɔi ŋanta ale duak dula, gɔi baasa ale sueri yieŋa po. Dula jigini viita ale boro, dula ate bua ŋaai ale waara la ale yɔk a zi.

²² Piina ale kasim a wooli ba yie pagrisaŋa po, abe gɔi baasa a bo ba nalimaŋa yie naliŋsaŋa po. Wa daaŋa a paari kama, ate daa a kan vi du a te wa.