Azaya 10 - WEN GBAŊKA

¹ Ku ale toa a te baai ale a nye venta sinsaga ale a dueni namsika wie la,

² ate ŋa a kasi ŋanjaksa a nyini ba wensie po la, ale kan weeni nyemagsika a sak mi nuru baai ale bo ninam po la. Ale a tuesi ba ŋandiinta a nyini pukɔga jigi ale a vari ŋanta a nyini baai ale kan ta koba la jigi.

³ Ni ale nye ka sɛ ninammu danni ase kaasuŋ a nin nyini niŋ a jam? Ka wana jigi ate ni ale chali a cheŋ ayen wa maari ni? Ni ale pa ni jigsika a basi ka bɛ?

⁴ Jaab a kan tali alege ni ale maa bo ka baai ate ba yik la po ale chivie, yaase ni lo gum baai ate ba ko la po, alege kude meena wa suipuurumu an diem basi ya wa nisaŋa a diem zak ka wen.

⁵ <

⁶ Mi tom Assiria demma ate ba ga yik tɛŋ kpieŋ dem baai ale kan seba Naawen la kama. Mi basi ba kama ate ba ga yik nuru baai ale nye a te mi sui a puuri la kama. Mi tom ba kama ayen ba ga zu abe ba vari ba ŋantaŋa, abe ba tabi ba zuk a taam ase suik po tanta la.

⁷ Alege daa wa ale yaali ayen wa nye diila ale la, daa wa ale ta dii wa popola po la ale la. Wa a yaali kama ayen wa kaasi ate tɛŋsa yegayega a jam kpeglimka jigi.

⁸ Wa weeni kama ayen,

⁹ Kalno an nye ase ka Karchemis la? Ate Yamat a nye ase Arpad la? Ate Samaria a nye ase Damasikus la?

¹⁰ Tɛŋ sii bɔgta ale gaam Jerusalem ale Samaria bɔgtaŋa la, m nisaŋa pagrimu a nya nakdeka ba zuk kama.

¹¹ Ase m le nye Samaria ale wa bɔgtaŋa diila, m kan nye Jerusalem ale wa bɔgtaŋa dila?>>

¹² Ase Nyɔnɔwa a dan nueri dii ate wa pai ta chaab ale Zayon Guuku ale Jerusalem la, wa yaa le weeni ayen, <

¹³ Dii nyiŋla, wa weeni kama ayen, <

¹⁴ Ase nuim ale a jo tuk po diila, dila wa mɛ ate mi nisaŋa paari tɛŋ kpieŋsa a tuesi ba jigsika ate ba ta la. Ase nuruba nyiem ale tigsi jena ŋaai ate ba zɛri ŋa la, dila wa mɛ ate mi a tigsi tɛŋsa a ta si a jam jigi yeŋ. Bunyi an poom baga a fuk bu kinkaŋni yaase bu lak bu nɔi a kum.>>

¹⁵ Liak ale baga a zak ka dek a gaam waai ale a zak ka la? Yaase gebik nyina a kuulim ale waai ale pai ka a tom la? Nna se tachek an poom yik waai ale a zak ka la, yaase doari a baga a yulum waai ale kan daa diok la!

¹⁶ Dila nyiŋla, Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale basi ate nyiŋtuila a jam ba tugurik tɔŋdɔma zuk. Wa ale za wa pai jabuui a lɔnsi ba po la ale chɔgsi ase ka bolim ŋiak la a dɛ ba.

¹⁷ Naawen dii ale ka Izirali bolim buui ale nyaksi la ale chim ka bolim buui ale za bu a dɛ. Waai ale Welema a bo Izirali la ale nye ase ka bolim ŋiak. Wa ale pa ka dai yeŋ a ju wa muŋsaŋa ale muŋkangɔtisaŋa meena.

¹⁸ Wa gɔnni nalimu ale laŋ sii ale ta poosuk la ale kaasi meena, ase yɔgnyieŋ ale kpeeri a bɛ diila.

¹⁹ Ate wa ti sii ale tali gɔnni po la ale soa ka nna fii fiiga ate biik ale poom a ŋmarisi dueni.

²⁰ Dai dila danni Izirali dem baai ale tali la, Jekob dɔkdem baai ale vuuk la, a kan ŋman pai ba yiila a nyo waai ale jam a kaasi wa la po, alege ba ale ta siaka ale ka Naawen, Waai ale Welema a bo Izirali la.

²¹ Nuru baai maga ale vuuk la ale pilim ŋmani, Jekob nuru baai maga ale vuuk la ale pilim ŋmani Wen Tanjaŋini jigi.

²² Izirali nuruma a dan poom piisi ase tintain busuŋku ale bo nyakpiemu nɔi la, ku ale chim ka nuruba maga ale za ba ŋman pilim jam. Kaasuŋ a gomsi kama dua ale diirika ale nyemagsika.

²³ Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale za wa basi ate kaasuŋku a paari tɛŋka meena.

²⁴ Dila nyiŋ, Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni diila ale nna, <

²⁵ Ku a kan beni, m kan ŋman ta suipuurum ale ni, m suinni a yaa ale bo ale ka bala ate m za m kaasi ba.>>

²⁶ Naawen Dii Ale A Dɛ Tugurik Tɔŋdɔma Niŋ La ale miiri ba kama ale fiŋ ase wa ale jam nak Midian ale bo Oreb piuŋku zuk la. Ate wa ale zak wa tachekka nyaataŋa zuk ase wa ale jam nye dii Ejipiti po la.

²⁷ Da dila danni, ba jiptaŋa ale zak ni ŋmankpalaŋa zuk, ba niiga diokku ni ŋieŋa zuk. Niiga diokku ale wɛ dii nyiŋla ni biigi kama.

²⁸ Ba jo Aiat tɛŋka po. Ba jam va Migron tɛŋka po a taam, a yaa pai ba ŋantaŋa a dueni Mikmas tɛŋka po.

²⁹ Ba va ka guutaŋa zuk a taam, ale a weeni ayen, <> Ate Arama demma kpaziita a yaa a nak. Gibea ale ka Sɔɔl tɛŋ dem la a yiti chali.

³⁰ Gallim liewa abe kaari ate kaarika a chim kaamka a te Laisa. Anatot demma ka niniga!

³¹ Madmena demma a yiti chali bɛ kama ate Gebim demma mɛ a chali suk.

³² Danni de po ba ale bo ka Nob tɛŋka po. Ba ale gurum ka ba nisa a basi Zayon nuruma ale bo Jerusalem guuku zuk la.

³³ Ni nya, Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale gebi naŋ kpieŋsaŋa ale wa pagrim kpiemu. Ti sii ale wɔŋa nna yegayega la wa ale che lɔnsi, ate wa ale basi ate sii ale wɔŋa mɛ la a siŋ tɛŋ.

³⁴ Wa ale che gɔnni tikima ale liak a lɔnsi. Lebanon ale ti kpieŋsaŋa ale lo.