Aroom 9 - WEN GBAŊKA

¹ Yeezu Kirisita ale soa mu. Dila nyiŋla m kan velimu. M popolaŋa ate Wen Chiika soa la mɛ a weeni mu kama ayen m le a biisi diila ka wensie ase,

² m nin weeni ayen m sui kaasi ka nna yegayega ate ku a nye nna ase nyiŋdomma ate m ta ate ŋa kan basi mu la.

³ Dii nyiŋ ale soa ate m suinni kaasi la ale m dek nuruma baai ale ka m dek mabisa la. Bala nyiŋ ate mi a poli ayen ase Wen daam ate ka te ka mi a poori mi ale Yeezu Kirisita a zaani tɔgatɔga.

⁴ Ba ka Izirali dem baai ate Wen yeeri te wadek la. Poli nya Wen ale nye dii a te Izirali demma la. Wa te ba ka suik ayen ba chim wa nidoabilisa, wa pai wadek a sak ba, wa ale ba a maa chaab puulim nye ka nɔiyeŋ, wa pai wa Sinsaŋŋa te ba, wa sak ba wensie suiku ate ba le va a puusi wa la, ba nya Wen ale puulim ayen wa nye dii a te ba la kama.

⁵ Bala ale soa ti kokpieŋsaŋa. Nurubiik biam jigi ka bala ale biak Yeezu Kirisita. Wen dii ale soa ŋanta meena la a kasim a nya pimpauk taam wuu. Ku be nye dila.

⁶ M be kan weeni kama ayen Wen ale pɛ ayen wa le nye diila wa an nyeya. Wa nye kama. Dii nyiŋla, ba meena ka Izirali dem alege daa ba meena ale chim Wen bisa.

⁷ Ba meena ka Abrayam ŋaaŋbisa alege daa ba meena ale chim Wen bisa. Boan nyiŋŋa, Wen weeni Abrayam kama ayen, <>

⁸ Nya kude abe a sak kama ayen daa nidoa ale nipok ale biak bi sii la ale basi ate ku a sak waai ale waai ale ka Wen bisa la. Alege ka bi sii ate Wen puulim ale Abrayam ate ba biak ba la ale sum chim wensie bisa.

⁹ Boan nyiŋŋa, Wen ale puulim ale Abrayam weeni diila ale nna ayen, <> (Piilimka 18:10)

¹⁰ Be daa ku meena ale nna. Dii nyiŋla, Aribeka nidoabilisaŋa bayewa a jam ka ti kokpieŋka Aizik bisa.

¹¹ Diipo ate ba an diem jam biak yibisaŋa la, ate ba an nye wamaŋ yaase wakaasuŋ la, ate Wen ale poli a lueri diila a nye, daa tuima nyiŋŋa alege ka wa waai ale wi la.

¹² Wa jam weeni wa kama ayen, <> (Piilimka 25:23)

¹³ Ase wa ale weeni wa gbaŋka po dii ayen, <> (Malakai 1:2-3)

¹⁴ Ti be le weeni ayen ka boa? Ti baga a weeni ayen Wen a kan nye a magsi? Aaya.

¹⁵ Dii nyiŋla wa weeni Moosis ayen, <> (Nyinika 33:19)

¹⁶ Nya kude abe a sak kama ayen Wen dan lueri nuru, ku daa nuruwa dek yaalika yaase wa nyeka alege ku meena a magsi chaab ale ka Wen ale ta jiirim diila.

¹⁷ Ba ŋmarisi Wen gbaŋka po ayen Wen weeni Faaro ayen, <> (Nyinika 9:16)

¹⁸ Dila nyiŋla, m baga a weeni kama ayen Wen daa yaali ayen wa ta jiirim ale nuru waai, wa a ta kama, wa be daa yaali ayen wa nye ate nuru ta tukpari a kan maari a wom sinsaga wa a nye kama ate nuru a chim dila.

¹⁹ Ni le bek mu ayen, <>

²⁰ Mi mɛ abe le bek ni ayen, ka boan suik ate fi nurubiik mɛ a tara ate fi le baga bek Wen dila? Samɔniŋ ka suik a bek ka mɛɛrɔ ayen, <>

²¹ Nama dek abe seba chak kama ayen samɔniŋ mɛɛrɔ a baga kama pai yakka a mɛ wa ale a yaali jabuui la. Wa baga kama a pai yak yeŋ kala a mɛ samɔnsa siye a pai kanyi a tom tigi kpiema tuima, ale pai kanyi wa a tom daa meena tuima.

²² Wen abe ale ka diila ale la. Wa jam a yaali kama ayen wa sak nuruba wa suipuurumu ale wa pagrimu ale ka diila. Alege wa yik ka wadek ale chichiiba nalimnyiini ale baai ate wa suinni a puuri a magsi wa ti kaasi ba.

²³ Wa ta chichiiba ale ba kama ayen ku sak zula ŋaai ale zuak nna yegayega dii ate wa le pai te baai ate wa le ta jiirim ale ba la. Wa gomsi ba kama dipo a magsi ayen ba nya zula ŋala.

²⁴ Nuru baai ate mi a weeni ayen wa gomsi ba a magsi la ale nama ale mi baai ate wa wi la. Wa an wi ti a ta nyini ka Juuma nyiini po alege wa wi ka baai mɛ ale kan daa Juuba la.

²⁵ Dii nyiŋla wa weeni ta nyini Yosea gbaŋka po ayen, < Tɛŋ kaai ate mi jam ka yaalika ale ka la, mi ale ayen, (Yosea 2:23)

²⁶ Juijui dek ate nuruba weeni ba ayen, , dula jigini dek ate nuruba le wi ba ayen ba ka Wen dii ale vua la nidoabilisa.>> (Yosea 1:10)

²⁷ Azaya mɛ weeni ka dila dekdega a magsi chaab ale Izirali ayen, <

²⁸ boan nyiŋŋa, Naawen le bo tɛŋzuk de meena ka buusa pagrisa nna mwuli.>> (Azaya 10:22-23)

²⁹ Ku a nye ase ka Azaya ale poom liŋ weeni dii mɛ la ayen, <> (Azaya 1:9)

³⁰ Ti be le weeni ayen ka boa? Ti baga a weeni kama ayen baai ale kan daa Juuba la, an jam pii nyiŋ badek ayen ba chim wayɔrisima nyama, alege ka ba siaka nyiŋ ate ba chim wayɔrisima nyam.

³¹ Alege Izirali demma pii nyiŋ kama ayen ba nye sinsaŋŋa ale a weeni diila ate ba chim wayɔrisima nyam, alege ba an baga a va sinsaŋŋa ale a weeni diila ate ba chim wayɔrisima nyama.

³² Be ka boan nyiŋ ale soa ate ba an baga a va ŋa? Dii nyiŋla, ba jam pii ka nyiŋ badek a nye alege ka siaka. Ba goanti jam va ka tuimaŋsa tomka nyiini nyiŋ alege daa siaka. Ba a gariŋ ka tintain dii ate Wen pai dueni suiku niŋ la.

³³ Tain dii ate Wen gbaŋka a biisi di wari ayen, <> (Azaya 8:14)