Aroom 7 - WEN GBAŊKA

¹ M suata, nama baai ale seba sinsaŋŋa la, ni basi ate m bek ni wanni de ayen, nuru waai ale kpi la sinsaŋŋa a diem soa wa kama? Aaya. Ŋa an ŋman soa wa.

² Sinsaŋŋa a weeni kama ayen nipok dan yali chora, ku a fɛ kama ayen wa ale wa chorɔwa a boro ale chaab. Alege wa chorɔwa dan kpi wa yaa ta suik kama a yali chora wa choa.

³ Wa chorɔwa dan boro ale ge ate wa ŋman goa ale nidoa wa choa, nuruba le wi wa ayen wa ka kaboŋ nyeerik. Wa chorɔwa be dan kpi, sinsaŋŋa ŋman ka pagrim wa jigiya. Wa dan yali chora wa choa, wa daa kaboŋ nyeeriga.

⁴ M suata, ase nipowa chorɔwa ale kpi ate wa ta suik a yali nidoa wa choa la, dila dekdega mɛ Sinsaŋŋa jigi, ni yaa kpi kama ate ni yaa gum chaab ale Yeezu. Sinsaŋŋa an ŋman soa ni. Yɔgyɔgla de, Yeezu Kirisita waai ate Wen nak wa yiti kum po la, ale soa ti. Wen nye dila kama ayen ti a tom tuimaŋsa a te wa.

⁵ Diipo ate ti jam boro a va tidek suiku la, Sinsaŋŋa kasim jam basi kama ate ti nyiŋsaŋa kabta tɔgatɔgaka ale a yaali diila a jam bo ti nyiŋsaŋa po ayen ti a tom tuim ŋaai le ŋa basi ate ti kpi la.

⁶ Alege yɔgyɔgla de, Moosis Sinsaŋŋa ŋaai ale jam yik ti a ta nna giŋgiŋ la, an ŋman soa ti. Dii nyiŋla, Sinsaŋŋa jigi tama kpi kama. Ŋa an ŋman soa ti. Dila nyiŋla, yɔgyɔgla de, ti kan ŋman a va Sinsaŋŋa su kpakka ale a weeni ti diila a tom a te Wen ya, alege ti a va ka Wen Chiika su paalukku ale a weeni diila a tom a te Wen.

⁷ Ku be dan ka dila ti be le weeni ka boa? Ti baga a weeni ayen Moosis Sinsaŋŋa an nala? Aaya. Alege Moosis Sinsaŋŋa a daam dan kan jam ya, m daam ate an baga a miŋ ayen m jam a tom ka wabaata. Basi ate m pai m dek a magsi ayen, Sinsaŋŋa a daam dan kan sak mu ayen m kan a yaali m vaanchoa jaaboa, m te an baga a miŋ dila.

⁸ Biem a yaa be va ka sinsak ŋaai nyiŋ ate m weeni la a nya suik a basi ate ŋan yaalik popola meena tɔgatɔga a yaa jam mi jigi. Boan nyiŋŋa, sinsaŋŋa a daam dan kan karo biem a nye ase ka jakpiuk la.

⁹ Diipo ate mi jam zɛ sinsaŋŋa wensieŋa chak la, dipo m vua kama. Alege sinsaŋŋa ale jan jam la ate biem yaa yiri vua,

¹⁰ ate mi yaa kpi. Sinsaŋŋa dekdega ŋaai ale ayen ŋa le te mu vum la ŋala dekdega abe ale ta kum a jam mi jigi.

¹¹ Boan nyiŋŋa, biem va ka sinsak ŋala nyiŋ a nya suik a paasi mi a yaa ko.

¹² Dila nyiŋla, Sinsaŋŋa meena welema kama. Ŋa welema kama ale chim wayɔrisima ale ŋman chim wamaŋ mɛ a te nuruba.

¹³ Nya kude abe a sak kama ayen wa dii ale chim wamaŋ la ta ka kum a jam mi jigi ya? Aaya. Ku ka biem nyiini ale nye dila. Bu pai ka jaab maŋka a nye ate kum jam mi jigi. Suik kula po, biem abe va ka sinsaŋŋa po ayen ŋa sak ayen biem a sum ka biem.

¹⁴ Ti seba ayen Sinsaŋŋa va ka Wen Chiika ale a yaali diila, alege mi kasim va ka m dek nyiŋka ale a yaali diila. Mi ka biem yɔma.

¹⁵ Mi zɛ mi dek ale a tom diila. Mi an baga a nye wa dii ate mi a yaali ayen m nye la, alege m goanti a nye ka wa dii ate mi kisa a kan yaali di nyeka la.

¹⁶ Dila nyiŋla, yɔgyɔgla de, m be dan a nye dii ate m kan yaali ayen m nye la, m siak kama ayen Sinsaŋŋa ka wamaŋsa.

¹⁷ Dila nyiŋla, ku a sak ase daa mi ale nye wa dila la, alege ka biem buui ale bo m po la ale a nye dila.

¹⁸ Mi seba kama ayen wamaŋ ka mi nyiŋka po. Boan nyiŋŋa, m kasim a yaali kama ayen mi a tom wamaŋsa alege mi an baga a nye.

¹⁹ Mi kan nye wamaŋ kaai ate mi a yaali ayen m nye la, m goanti a nye ka wabiok kuui ate mi kan yaali ayen m nye la.

²⁰ M be dan a tom dii ate m kan yaali ayen m tom la, ku a sak ase daa mi ale a tom dila la, alege ka biem buui ale bo m nyiŋka po la ale a tom dila.

²¹ Dila nyiŋla, ku a nye ase nyeka de a yaa ale a tom tuima mi nyiŋka po la. Mi dan a yaali ayen m nye wamaŋ, wabiok nyiini ate mi a nye.

²² Mi popola po, ku a te mu ka popeentik ayen mi a tom sinsaŋŋa ale a weeni diila.

²³ Alege m nya ale ka nye ka choa ale boro a tom m nyiŋka po. Nyeka de ka biem nye kaai ale a nye kpaliŋ ale nye kaai ate mi popolaŋa a yaali la, a yaa basi ate m chim ŋa yɔma.

²⁴ Oo, ka boan jaab chivie ale a de mu nna! Ka wana ale wa vari mu a ta nyini nyiŋka de ale basi ate mi a kpi la po?

²⁵ M va Yeezu Kirisita ti Nyɔnɔwa nyiŋ a nye Wen jiam. Ku abe ale ka diila ale la. Mi dek jigi, m popola po, mi a tom sinsaŋŋa ale a weeni diila kama, alege mi nyiŋka a tom ka biem sinsaŋŋa ale a weeni diila.