Aroom 6 - WEN GBAŊKA

¹ Ku be dan ka dila, ti le weeni ka boa? Ku magsi ayen ti kasim a tom tuimbaata taam wuu ate Wen kasim ta wa ŋmanteka ale ti a gum du?

² Aaya. Dii nyiŋla, biem jigi, ti kpi kama. Dila nyiŋla, ku an magsi ayen ti ŋman a nye ase biem jigi ti vua kama la.

³ Mi a yaali kama ayen ni seba ayen ba ale te ti soka ayen tama ale Yeezu Kirisita chim bunyi la, ku a nye ase tama ale wa maa chaab a kpi kama la.

⁴ Ba ale te ti soka la, ku a nye ase ba gu tama ale wa a gum ka chaab la. Alege Wen ti kowa a nak Kirisita a yiti kum po kama ale Kowa zulaŋa. Tama mɛ abe yiti kum po kama ayen tama mɛ ta nyuvuri paali. Ti ŋman ka ti nye kpakka.

⁵ Ti be dan siak ayen tama ale wa maa chaab kpi kama, ti baga a siak kama mɛ ayen Wen le nak ti kama a yiti kum po ase wa ale nak wa a yiti kum po diila.

⁶ Tama be seba kama ayen ti nye kpakka a maa chaab a kpi kama ale Yeezu wa jabarimu nyiŋ ayen pagrim buui ale soa ate ti nye kpakka de a tom biem tuima la a yaa kaasi ate ti kan ŋman chim biem yɔmma.

⁷ Diila waai ale kpi la, biem a ka pagrim wa zuwa.

⁸ Tama ale Kirisita abe ale maa chaab kpi la, ti ta siaka kama ayen wa ale vua la, tama mɛ vua kama.

⁹ Wen ale nak Kirisita yiti kum po. Tama mɛ abe seba kama ayen Yeezu abe kan ŋman kpi. Kum be ŋman ka pagrim wa zuwa.

¹⁰ Wa kpi ka bunyi dekki. Wa be kpi kama ayen biem kan ŋman ta pagrim. Yɔgyɔgla de, wa vua kama ate Wen soa wa.

¹¹ Suik kula po, ni ta ku ni zuima po ayen biem jigi, ni kpi kama. Wen jigi mɛ, ni vua kama Yeezu Kirisita nyiŋ.

¹² Ni kan basi ate biem soa ni, bu le nye kama ate ni a nye ni nyiŋsaŋa ale a yaali waba tii la.

¹³ Ni be kan pai ni nyiŋsaŋa juijui ya a te biem ate bu nye ate nyiŋka kabta a tom tuimbaata. Alege, ku a fɛ kama ayen ni pai nidek a te Wen ase nuru baai ale nyini kum po a nyini vum po diila, a pai ni nyiŋka kabta a te Wen ate wa pai ni a tom wayɔrisima tuima.

¹⁴ Boan nyiŋŋa, biem a kan ŋman chim ni nyɔnɔ a soa ni dii nyiŋla, ni an boro ka Moosis Sinsaŋŋa ale a weeni ni ayen ni a nye diila nyiŋŋa, alege, ni boro ka Wen ale va wa ŋmanteka nyiŋ a nye jabuui a te ni la nyiŋ.

¹⁵ Ku be dan ka wensie ayen ti an boro ka Moosis Sinsaŋŋa ale a weeni ti ayen ti nye diila, ku be nala kama ate ti kasim a tom tuimbaata ale ge a poli ayen ti boro ka Wen ŋmanteka nyiŋŋa? Aaya.

¹⁶ Nama zɛ ayen fi dan pai fidek a te nuru ayen fi a siak wa nɔi, fi a chim ka kula nyɔnɔwa yɔma? Nama be dan pai nidek a te biem tuima ni a chim ka biem yɔm. Dila be a basi ate ni a kpi kama. Alege ni dan pai nidek a te Wen a va wa nɔi, ni a chim ka wa yɔm ate dila basi ate ni chim wayɔrisima nyam.

¹⁷ Ni jam ka biem yɔm, alege yɔgyɔgla de, mi a nye Wen jiam nalimnyiini boan nyiŋŋa, ni siak kama ale ni suiniima meena a te wensie sinsak ŋaai ate ni nya la.

¹⁸ Wen vari ni kama biem nisa po a basi ale ge ate ni yaa chim wayɔrisima yɔm.

¹⁹ Mi a biisi ase ka nurubiik la, dii nyiŋla ni wobsa kama nyiŋka po. Dila ale soa ate m pai yɔmawa ale wa nyɔnɔwa a magsi a sak ni la. Ni nya de, dipo, ni jam pai ka nidek meena ase yɔm la a te tuimbaata ale gaasa tuima. Suik kula po dekdega, ku a fɛ kama yɔgyɔgla de ayen ni pai nidek meena ase yɔm la a te wayɔrisima tuima ate ni sum chim nuru weleŋsa.

²⁰ Ni ale jam ka biem yɔm la, wayɔrisima an jam soa ni.

²¹ Ku be ale jam ka dii ni jigi la, be ka boan jaab nyuenta ate ni jam nya? Ni jam nya ka chivie nyiini. Wieŋa de ŋaai abe ale basi ate ni yaa ta chivie la, wa ŋala abe le ŋa basi ate ni kpi ase ni nin diem a tom ŋa.

²² Alege yɔgyɔgla de, Wen vari ni a ta nyini biem po a nyini kama. Ni ka wala yɔm yɔgla. Ni nyuentaŋa abe le boa? Nyuentaŋa ale, ni yaa sum chim ka wa yɔm baai ale welema la. Ni be le nya ka nyuvuri dii ale kan ta kpeglimka la.

²³ Boan nyiŋŋa, biem tutuna ale kum. Alege Wen tiirimu ale nyuvuri dii ale kan ta kpeglimka la Yeezu Kirisita ti Naawenni nyiŋ.