Aroom 4 - WEN GBAŊKA

¹ Ku be dan ka dila, ti ta ka boan wari ayen ti weeni a magsi chaab ale ti kokpieŋka Abrayam?

² Wen daam a dan nya ka Abrayam tuim maŋsaŋa nyiini a yaa weeni ayen wa ka wayɔrisima nyɔnɔ, ŋala nyiŋ, Abrayam daam ate te wadek ka pimpauk. Alege wa an jam baga a zaani Wen niŋ a pak wa dega.

³ Boan nyiŋŋa, ba ŋmarisi wa wie kama Wen gbaŋka po ayen, <> (Piilimka 15:6) Nya kude ka tiirim, ku daa wari ate wa nye.

⁴ Nuru dan pai nuru ayen wa tom a te wa ale ge ate wa tuni wa, nuruwa a tuni wa kama tutuna ŋaai ate wa a tuni wa la. Tutunaŋa de daa tiirimoa.

⁵ Suik kula po, waai a dan pai wa tuim maŋsaŋa a ta jam Wen jigi ayen ŋala nyiŋ Wen nye ate wa chim wayɔrisima nyɔnɔ, Wen kan nye dila ase tutuna la a te wa. Ku ka tiirim. Suik kuui nyiini ate Wen a nye ate nuru a chim wayɔrisima nyɔnɔ la ale siaka nyiini ale wa. Dii nyiŋla, wa ka waai ale a nye ate wabaata nyam a chim wayɔrisima nyam ba siaka ale wa nyiŋ.

⁶ Deevid ale jam weeni diila kiri ale la mɛ ayen nuru waai ate Wen a kan nya wa tuima alege a nye ate wa a chim wayɔrisima nyɔnɔ la, kula nyɔnɔwa sui abe le peenti ka nna yegayega.

⁷ Wa ale weeni dii Wen gbaŋka po la ale nna ayen, <

⁸ Nuru waai ate Wen a kan ta wa wabaataŋa la, a ta suipeentik kama.>> (Yiila 32:1, 2)

⁹ Be ka baai ale a gebi ba yoaŋa la nyiini ale ta suipeentiga? Yaa baai mɛ ale kan a gebi la ta suipeentik kama? Aaya. Ba meena ta suipeentik kama. M poom liŋ weeni sak ni kama a ta nyini Wen gbaŋka po a magsi chaab ale Abrayam ale ta siaka dii ale Wen la. Ka siaka de nyiŋ ale soa ate Wen nye ate wa chim wayɔrisima nyɔnɔ.

¹⁰ Ka dimpo ate Wen wi Abrayam ayen wa yaa ka wayɔrisima nyɔnɔ? Ka diipo ate wa gebi wa yoanni la yaa ka diipo ate wa an diem gebi la? Wen jam nye ate wa chim ka wayɔrisima nyɔnɔ ale ge ate wa gebi wa yoanni.

¹¹ Gebika de abe jam a sak kama ayen ka wa siaka ale Wen nyiŋ ale soa ate wa wi wa ayen wayɔrisima nyɔnɔ ale ge ate wa yaa gebi wa yoanni. Dila abe ale soa ate baai meena ale ta siaka ale Wen alege an gebi ba yoaŋa, ate Wen nye ate ba chim wayɔrisima nyam la, a baga a wi Abrayam ayen ba ko.

¹² Baai mɛ ale gebi ba yoaŋa la a wi Abrayam ayen ba ko ase ba a nin ta siaka ale Wen ase Abrayam la, alege ate wa yaa gebi wa yoanni la.

¹³ Wen jam puulim kama ayen Abrayam ale wa ŋaaŋbisaŋa le jam soa ka tɛŋka meena. Ku be jam daa Abrayam ale jam va Moosis Sinsaŋŋa la nyiŋŋa. Ku jam ka Abrayam ale ta siaka ale Wen ate wa nye ate wa chim wayɔrisima nyɔnɔ la nyiŋ ale soa ate wa jam puulim dila.

¹⁴ Ku be dan ka nuru baai ale a va Moosis Sinsaŋŋa la le ba soa tɛŋka, nurubiik siaka ale Wen ka kiri ya ate Wen puulim ka a chim kinla nyiŋ.

¹⁵ Wen ta suipuurum kama ale baai ale kaa va wa sinsaŋŋa la. Wa be le te ba ka waalika. Sinsaŋŋa abe dan kan karo, nuruba ate an baga le zɛri ŋa.

¹⁶ Ka boan ale soa ate Wen le nye ate ti chim wayɔrisima nyam ti siaka nyiŋŋa? Dii nyiŋ ale soa ate wa le nye dila la ale wa ale puulim ayen wa le niak ti wa niaka nyiŋla. Dii abe le pai a saŋ la ale, pumpuulimaŋa de le sum chim ka wensie a te Abrayam ŋaaŋbisaŋa meena baai ale ta siaka ase Abrayam dek la. Baai ale va Sinsaŋŋa ale baai ale kan va ŋa la. Dii nyiŋla, Abrayam ka tama meena ko

¹⁷ ase ba ale ŋmarisi Wen gbaŋka po dii ayen Wen weeni Abrayam ayen, <> (Piilimka 17:5) Dila nyiŋla, Wen jigi, wa ka tama ko. Abrayam dek abe jam ta siaka kama ale Wenni de waai ale a nak kpilima a yiti kum po a te ba vum la. Wa be ka waai ale a basi ate jabuui ale kan boro la a boro.

¹⁸ Ase Wen ale weeni Abrayam ayen wa le basi ate wa biak nidoabinni a yaa ta ŋaaŋbisa yegayega la, Abrayam jam ta siaka ale yiila Wen jigi kama alege ku an poom jam magsi ayen wa ta siaka ale yiila dila po. Alege ku sum jam chim ka wensie ate Abrayam chim tɛŋsa yega ko ase ba ale ŋmarisi Wen gbaŋka po dii ayen Wen weeni Abrayam ayen <> (Piilimka 15:5)

¹⁹ Dila powa, Abrayam jam boro a moata ka bena kook, alege wa powa Saara an diem jam biaya. Abrayam jam poli wadek jigi kama a yaa weeni wadek ayen, <> alege Abrayam siaka ale Wen an diem jam baliŋya.

²⁰ Wa jam ka chichama ale Wen pumpuulimaŋa. Wa siaka jam te wa ka pagrim ate wa a te Wen zula.

²¹ Wa jam seba chak kama ayen Wen baga a nye wa ale puulim ayen wa nye diila kama.

²² Wa siaka nyiŋ ale soa ate Wen nye ate wa chim wayɔrisima nyɔnɔ. (Piilimka 15:6)

²³ Ba ale ŋmarisi dii Wen gbaŋka po ayen m nye ate Abrayam chim wayɔrisima nyɔnɔ la, ba an ŋmarisi kama a te wadek wa nyiini,

²⁴ alege tama mɛ nyiŋ, ate ku le gum du te ti la, ase baai ale ta siaka ale wa la, waai ale nak Yeezu ti Naawenni a yiti kum po la,

²⁵ Waai ate wa pai wa a te ti tom kaasika nyiŋ la, ale nak wa yiti kum po ti nyemagsika nyiŋ la.