Aroom 2 - WEN GBAŊKA

¹ Dila nyiŋla, ni wanyi ka suik ate fi suok a dan nye wari a kaasi, fi bo wa buusa. Fi dan nye dila, fi ta ka kaasuŋ a jam fidek jigi dii nyiŋla, wie ŋaai ate fi ayen wa nye a kaasi la, fidek a tom ka ŋala dekdega.

² Tama abe seba kama ayen ku sum magsi ka Wen ta kaasuŋ a jam baai meena ale a tom dila la jigi.

³ Alege fi dan bo baai ale a nye nyaŋa de la buusa alege fidek a tom ŋa, fi a poli ayen fi le baga chali be ate Wen kan nya fu a bo buusa?

⁴ Yaa fi zɛri Wen nye maŋ kaai ale suiduŋ dii ale wa ale ŋman ta chichiiba ale fi diila kama, fi a poli ayen wa le kasim a nye ka dila a ta a cheŋ. Fi zɛ ayen Wen nye maŋka fi jigi a sak fu kama ayen fi basi fi tuimbaataŋa tomka?

⁵ Ni tue kan wom. Ni sue be kan kaasi ale ni tuimbaataŋa. Ni a tom tuimbaata kama alege jaab kan daani ni, alege Wen suipuurumu ale wa wensie buusaŋa danni a dan paari ate wa ayen wa bo wensie buusa ale ni, wa sui le puuri ka nna yegayega ale ni ate wa te ni waalika.

⁶ Da dila danni, Wen le tuni waai meena a magsi chaab ale ka ti wanyi wanyi ale tom diila.

⁷ Baai meena ale ta chichiiba a tom tuimaŋsa a gisi zula ale nalim ale nyuvuri Wen jigi la, wa le te ba ka nyuvuri dii ale kan ta kpeglimka la.

⁸ Alege baai ale a yaali badek nyaka mwuli ale a zɛri wensie suiku vaka ale kasim a tom tuimbaata daa meena la, Wen le basi ate wa suipuurumu a jam ba zuk.

⁹ Ninam ale kumsa nna yegayega le jam baai meena ale a tom tuimbaata la jigi. Juuma le ba liŋ nya ninammu de ale kumsaŋa de ale ge ate baai mɛ ale kan daa Juuba la a nya ninammu de ale kumsaŋa de dila dekdega.

¹⁰ Baai meena ale a tom tuimaŋsa la le nya zula ale nalim a boro ale suiyɔgni. Baai ale ka Juuba la le ba liŋ nya zulaŋa de ale nalimu de ale suiyɔgni de ale ge ate baai mɛ ale kan daa Juuba la, mɛ a nya.

¹¹ Boan nyiŋŋa, Wen ta ka nyeyeŋ Juuma ale baai mɛ ale kan daa Juuba la jigi.

¹² Baai ale kan daa Juuba la, a jam ka Moosis Sinsaŋŋa ate ba jam a tom tuimbaata. Ba an jam ta Moosis Sinsaŋŋa. Ba be le kpi kama alege Wen a kan pai wa Sinsaŋŋa a bo ba buusa. Alege Juuma a jam ta Moosis Sinsaŋŋa alege ba jam a tom ka tuimbaata. Ba mɛ be le kpi kama ate Wen pai wa Sinsaŋŋa a bo ba buusa.

¹³ Nuruba dan wom ka wa Sinsaŋŋa nyiini ale kan va ŋa, ba kaasuŋku a diem bo ale ba kama, alege baai ale wom ŋa a yaa va ŋa la, wa kan ŋman nya ba kaasuŋku.

¹⁴ Baai ale kan daa Juuba la, bala an nya Moosis Sinsaŋŋa alege ba suiniimaŋa a dan basi ate ba a tom Sinsaŋŋa ale a weeni dii ayen ba va la, badek suiniima ale a te ba Sinsaŋŋa.

¹⁵ Ba nyeka a sak kama ayen Wen ŋmarisi wa Sinsaŋŋa a nyo ka ba suiniima po. Ba popolaŋa mɛ ale a bo ba buusa a weeni a sak ba ase ba kaasi yaa ba an kaasiya.

¹⁶ Da dii danni ate Wen le bo ba buusa la, le nye ka dila. Wa le pai nuru meena wasusuŋŋa a ta ŋa nyini peelim niŋ ate Yeezu Kirisita bo ba buusa. Wen wamaŋsaŋa ate mi a sak nuruba ale a sak ti diila ale la.

¹⁷ Nama baai ate mi a biisi ale ni la, a wi nidek ayen ka Juuba. Ni kasim a poli kama a weeni nidek ayen, <> Ni a nak ka kuusa ale ni ale ka dii ale Wen la.

¹⁸ Nama dek abe seba Wen ale a yaali ayen ni a tom tuimaŋsa diila kama, dii nyiŋla ni zamsi Sinsaŋŋa po ayen fi lueri dii ale nala la a tom.

¹⁹ Fi seba chak ayen, fi baga a chim nuru waai ale cheŋ be Wen suiku po la kpagi kama. Fi a nye ase ka bolim la a te baai ale bo legini po la.

²⁰ Fi a weeni ayen fi baga nuru baai ale ka betta ale bi paaluk la a sak kama. Fi be seba fi popo a chak ayen, fi ale ta Wen Sinsaŋŋa la, fi ta yam meena ale wensie meena kama.

²¹ Nyaŋa de meena abe dan ka wensie ale fi waai ale a sak nuruba la, ka boa ate fi kan sak fi dega? Ti a sak nuruba a weeni ayen, <>, alege fidek a zu?

²² Fi a sak nuruba a weeni ayen, <> Alege mi le bek fu ayen fidek a nye yaa fi kan nye? Fi kisi bɔgta kama alege mi ale bek fu ayen, <

²³ Fi ta zupagruk kama ale Wen Sinsaŋŋa, alege a kaasi ŋa. Kaasika de a basi ate Wen a nya chivie yaa wa kan nya?>>

²⁴ Ba be ŋmarisi Wen gbaŋka po kama ayen, << Baai ale kan daa Juuba la, a kaasi Wen yuei kama nama Juuma nyiŋ.>>

²⁵ Nama Juuma dan gebi ni yoaŋa ale a va Moosis Sinsaŋŋa, ni yoaŋa gebika ta kiri kama. Alege ni dan a kaasi wa Sinsaŋŋa ni a nye ase ni an gebi ni yoaŋa kama la.

²⁶ Nuruba abe dan kan gebi ba yoa ale ge a va dii ate Moosis Sinsaŋŋa a weeni ayen nuruba a nye la, Wen le nya ba ase ba gebi ba yoaŋa kama la.

²⁷ Nama ta Moosis Sinsaŋŋa kama ate ŋa ŋmarisi dua. Ni be a gebi ni yoaŋa mɛ kama. Alege Sinsaŋŋa ate ni ta la ale ni ale a gebi ni yoaŋa la, ni kan diem a va Moosis Sinsaŋŋa ale a weeni diila. Alege baai ale kan gebi ba yoaŋa la, bala gela a va Moosis Sinsaŋŋa ale a weeni diila kama alege ba ka ŋa. Ba be ale a nye nna la a basi kama ate ba biisi a gaam nama Juuma.

²⁸ Basi ate m bek ni beŋŋa de ayen, ka wana dek ale potim ka Juu? Ka waai ale gebi wa yoari la ale Juu? Nuru peelim nyeka nyiini a kan sak kama ayen nuru wala a sum ale Juu. Ku be daa fi nin gebi fi yoari ale a sak ayen fi sum ka Juu.

²⁹ Alege waai ale sum ka Juu la ale waai ale va Sinsaŋŋa a ta nyini wa suinum po la. Ku kiri mɛ ale fi an gebi ka fi yoanni nyiini ayen ku sak ayen fi sum ka Juu alege ku kiri ale, fi pai ka fi suinummu a te Wen. Gebika abe ka gebi kaai ate Wen Chiika a gebi fi suinummu la, daa fi nyiŋka wari ya. Nuruwa de choa abe kan nya pimpauk nuruba jigi, alege ka Wen pimpauk nyiini ate wa a nya.