Aroom 16 - WEN GBAŊKA

¹ Mi a yaali ayen m weeni a sak ni ka Fiibi ale ka waai la. Wa ka ti toa Yeezu yuenni nyiŋ. Wa ka Kenkrea Kirisita tigini demma maarɔ.

² Ni ŋmasi yik wa a ta nalimnyiini ale ka ti Naawenni ale soa wa. Ku ale magsi ayen Kirisita tigini demma a nye diila ale nna. Ni a te wa maari kaai meena wuu ate wa a yaali ni jigi la. Boan nyiŋŋa, wa mɛ dek maa maari nuruba ka nna yegayega. Wa maa maari mi mɛ kama.

³ Mi a puusi Pirisila ale Akiila. Bala ale mi ale jam maa chaab a tom a te Yeezu Kirisita.

⁴ Ba poom kasim jam gomsi ka badek a magsi ayen ba tagri mi zuk a kpi. Mi a nye ba jiam. Daa mi nyiini ale a nye ba jiamoa. Kirisita bisaŋa baai meena ale kan daa Juuba la mɛ a nye ba jiam.

⁵ Puusi Kirisita tigini demma baai ale a nye tuka ba yenni po la. Puusi m dek doa maŋka Epanetus. Ka wala ale dɛ niŋ a ta siaka ale Kirisita Asia po.

⁶ Puusi Mɛɛri, waai ale jam a tom nna yegayega a te ni la.

⁷ Puusi m Juu chaama Andironikus ale Junias baai ale jam maa bo likka dɔkku po ale mu la. Tuimtomdɔma seba ba kama nalimnyiini. Bade niŋ a chim Kirisita bisa kama ale ge mi.

⁸ Puusi Ampiliyatus waai ate m ta yaalika ale wa la, dii nyiŋla wa ka Kirisita biik.

⁹ Puusi Yurubanus waai ate ti jam a tom Kirisita tuimaŋa ale chaab la. Mi a puusi m dek doa maŋka Sitakus.

¹⁰ Puusi Apeles waai ale sum va Yeezu Kirisita la. Puusi Arisitobulus dɔkdemma a te mu.

¹¹ Puusi Ayerodiyan m Juu choawa. Mi a puusi baai ale chim Kirisita bisa a bo Naasisus yenni po la.

¹² Puusi nipooma de, Turufina ale Turufosa baai ale a tom nna yegayega a te Naawen la. Mi a puusi tidek toawa Perisis waai mɛ ale jam a tom tuima nna yegayega a te Naawen la.

¹³ Puusi Arufusi waai ale kan ta choa ale wa ale a tom dii a te Naawen la. Puusi wa mawa waai ale a nye mi jigi ase m ka wadek biik la.

¹⁴ Puusi Asinkiritus ale Filegon ale Yemes ale Paturobasi ale Yemas ale Kirisita bisaŋa ale boro ale ba la.

¹⁵ Puusi Filologus ale Juliya ale Neriyas ale wa toawa ale Olimpas ale Kirisita be sii meena ale boro ale ba la.

¹⁶ Ni puusi chaab nalimnyiini. Kirisita Tiŋŋa meena demma dela jigini a puusi ni.

¹⁷ Mi a yaali ayen m weeni ni m suata ayen, ni kpesi nidek a ŋmasi a nya ate ni nya nuru baai ale a nye ate nuru boari a poori chaab tɔgatɔga ale a basi ba siaka la. Nuru bala chaab mɛ a sak ka sinsak ŋaai ale kan a va sinsak ŋaai ate nama poom zamsi la. Ni kan pai nidek a gum ba po.

¹⁸ Dii nyiŋla, nuru bala chaab a kan tom a te ka Kirisita ti Naawenni, alege ba a tom ka tuim ŋaai ate ba le nya dɛka ku po la. Ba pai ka nɔikpaam a biisi a paasi nuru baai ale poom kan maa seba wie nɔi po la.

¹⁹ Waai meena seba kama ayen ni siak a te ka Wen wamaŋsaŋa ale a biisi diila. Nya kude abe basi kama ate m sui peenti ale ni. Mi a yaali kama mɛ ayen ni ta yam ale wie ŋaai ale nala la, alege ni kan poom maa seba wie ŋaai ale ka wabaata la, nɔi po.

²⁰ Wen dii ale a basi ate nuruba a boro ale suiyɔgni la, le kaasi Sitaana pagrimu yɔgyɔgla de ate ni va wa zuk a taam. Yeezu Kirisita ti Nyɔnɔwa niaka bo ale ni.

²¹ Timoti, waai ale mi ale a tom ale chaab la, a puusi ni. Lusiyas ale Jeesin ale Sosipeeta m Juu chaama a puusi ni.

²² Mi Tetiyas waai mɛ ale ka Kirisita biik ate Pɔɔl yik ŋmarisi gbaŋka de la a puusi Naawen yuenni nyiŋ.

²³ Gayus, a puusi ni. Mi Pɔɔl a goa ka wala yenni. Kirisita tigini demma abe a nye tuka ka wala yenni. Erasitus waai ale a nya tɛŋka ligraŋa zuk la a puusi ni. Ti suoku Kuwaritos mɛ a puusi ni.

²⁴ Yeezu Kirisita ti Nyɔnɔwa ŋmanteka bo ale ni meena. Ku be nye dila.

²⁵ Ku a fɛ kama ayen ti te Wen pimpauk boan nyiŋŋa, wa a te ni ka pagrim, ase mi ale nuruba ba chaab sinsaŋŋa po ate ti nyiem a sak nuruba Yeezu Kirisita wie ayen wa te ti pagrim diila. Sinsaŋŋa de a liŋ jam suk kama.

²⁶ Alege yɔgyɔgla de, ŋa nyini ka peelim. Wen ale jam basi ate ŋa suk beni nna yegayega. Alege yɔgyɔgla de wa, waai ale boro taam wuu la, weeni ka nuruba ayen ba tɔk lagri wa biisiteerɔma ale ŋmarisi diila kiri. Wa basi kama ayen tɛŋzuk de meena a seba ŋa ate ba ta siaka ale Yeezu abe ba va wa nɔi.

²⁷ Wen dii nyiini ale ka yam nyɔnɔ wie meena po la, ti a te wa pimpauk Yeezu Kirisita nyiŋ daa meena wuu. Ku be nye dila.