Aroom 15 - WEN GBAŊKA

¹ Tama baai siaka ale pagra la, ku magsi ka ti va baai siaka ale kan pagra la maga maga abe ti kan a nye wie ŋaai le basi ate tama dek sue a peenti la.

² Ku magsi ka ti wanyi wanyi a nye ate ti Kirisita bisa chaama sue a peenti ate ku ta maarika jam ba jigi a zak ba a zaani.

³ Diila Yeezu Kirisita an jam a yaali ayen wa te wadek suipeentiga ase ba ale ŋmarisi Wen gbaŋka po ate ku magsi chaab ale Yeezu Kirisita diila ayen, <> (Yiila 69:9)

⁴ Diila ba ale ŋmarisi wie ŋaai meena Wen gbaŋka dipo la, ba ŋmarisi kama ayen ŋa sak ti ayen ti ta yiila. Be ka chichiiba ale Wen gbaŋka wieŋa ale a te ti nyiŋbiiri ate ti baga a ta yiilaŋa de.

⁵ Wen dii ale a te nuruba chichiiba ale a te ba nyiŋbiiri mɛ wie po la, le basi ate nama baai ale a va Yeezu Kirisita la a boro ale nɔiyeŋ ale chaab a tomsi a nye wa nyeka

⁶ ate ni meena pai nɔiyeŋ a te ti Nyɔnɔwa Yeezu Kirisita Wenni ale wa Kowa zula.

⁷ Dila nyiŋla, ase Kirisita ale tuesi nama mɛ diila, nama mɛ ni wanyi wanyi a tuesi chaab ate ku ta pimpauk a jam Wen jigi.

⁸ Ni basi ate m weeni sak ni ayen Kirisita a chim ka Juuma tomteerɔ ayen ku sak ba ayen Wen wensieŋa ale wa ale jam puulim dii dipo wa ale ba kokpieŋsaŋa la, a sum jam chim ka wensie,

⁹ abe ku basi mɛ ate baai ale kan daa Juuba la a te Wen pimpauk wa jiirimu nyiŋ ase ti ale karim Wen gbaŋka po dii ayen, <> (2 Samuel 22:50)

¹⁰ Ti ŋman pilim karim ka po ayen, <> (Teerika 32:43)

¹¹ Ti ŋman pilim karim ka po ayen, <> (Yiila 117:1)

¹² Azaya mɛ ŋmarisi ayen, <> (Azaya 11:10)

¹³ Wen dii nyiŋ ate ni ta yiila la, le va ni siaka ale wa nyiŋ a basi ate ni boro ale suipeentik nalimnyiini ale suiyɔgni ate yiila ŋaai ate ni ta wa jigi la, le va Wen Chiika pagrimu nyiŋ a chim a nyoro.

¹⁴ Mi dek abe seba chak kama, m suata, ayen nama dek ka tuimaŋsa tomka nyiini. Ni be ta sebika nalimnyiini kama a baga a te chaab sinsaga.

¹⁵ Alege gbaŋka de m nyini ka peelim a weeni ni wie ŋa gela nna ase mi a teeri ni ŋa wie kama ŋmani la. Dii nyiŋla, ka Wen ale te mu ŋmante kaai ate mi an magsi ayen wa te mu

¹⁶ ate m chim Kirisita tomteerɔ a tom a te nuru baai ale kan daa Juuba la. Ku a nye ase m ka Wen yenni kpaŋŋa la a yaa a sak nuru baai ale kan daa Juuba la Wen wamaŋsaŋa ate Wen Chiika nye ate ba welema ate m yaa pai ba ase kaab ka la a te Wen ate wa yaa siak a tuesi ba.

¹⁷ Be ka Yeezu Kirisita ale mi ale chim bunyiwa la nyiŋ ate mi ta kanjanta ale m le tom dii te Wen la.

¹⁸ M be nyini ka peelim a biisi wie ŋaai nyiini ate Kirisita pai mi tom la. Wa pai ka mi nye ate baai ale kan daa Juuba la yegayega yaa siak va Wen nɔi. Wa pai ka biik ale wie nyeka a te mi ate dila nye.

¹⁹ Wa basi kama mɛ ate m nye wakperikaliik pagrisa ayen ku sak ayen m pagrimu nyini ka wala jigi. Be ka Wen Chiika pagrimu nyiŋ ate nyaŋa de meena nye. Dila nyiŋla, zaani Jerusalem a nyiem a jam paari Ilirikum tɛŋka, mi sak Wen wamaŋsaŋa meena a magsi chaab ale Kirisita ate ŋa tagli ka jigi meena.

²⁰ Mi kasim pii ka nyiŋ a poli ayen m sak Wen wamaŋsaŋa juijui ate nuru an diem wom Yeezu Kirisita wie la. Boan nyiŋŋa, mi kan yaali ayen m deri zaani juijui ate nuru wa choa liŋ tom la a yaa deri piilim tom a cheŋ.

²¹ Ase ba ale ŋmarisi Wen gbaŋka po ayen, <> (Azaya 52:15)

²² Mi ale boro a tom tuini de la nyiŋ ale soa ate mi an baga a jam ni jigi ya.

²³ M poom kasim pii ka nyiŋ ayen m jam alege nye kpeeri. Alege yɔgyɔgla de ate jigi a ŋman ka jigini de po ate mi a tom la, ale m kasim a yaali nna yegayega ate ku paari bena dii choa ayen m jam nya ni la,

²⁴ mi a poli ayen m le jam yɔgyɔgla de. Mi a yaali kama ayen m dan a cheŋ Supeeni tɛŋka m mobi a nya ni abe mi a taam. M dan goa ale ni maga dega ate ku masa, ni maa maari mu ate m baga cheŋ dula.

²⁵ Yɔgyɔgla de m bo suiku po a cheŋ ka Jerusalem ayen m te Kirisita tigini demma ale bo dula la tiirim.

²⁶ Boan nyiŋŋa, Kirisita tigini demma baai ale bo Masidoniya ale Akaaya la a poli kama nya ale ku nala ate ba yaa maa chaab a cheesi tiirim ayen m ta ga te Kirisita tigini demma baai ale ka niwoba a bo Jerusalem la.

²⁷ Ka badek ale poli ayen ba nye dila. Alege ku dan ka ku wensieŋa jigini, ku be a nye ase ka pami ate ku a fɛ ayen ba tuni ba la. Nuru baai abe le kan daa Juuba la, a nin maa nya Wen Chiika boka po wieŋa ate Wen a te Juuma la, ku a fɛ kama mɛ ayen baai ale kan daa Juuba a maari baai ale ka Juuba.

²⁸ Tuini de ate mi ta ayen m te ba ligraŋa la, m dan te ba a ga nueri, m le mobi nya ni diipo ate mi a taam Supeeni la.

²⁹ M dan jam ni jigi, m seba chak kama ayen m le jam ale ka wamaŋsa nna yegayega a nyini Yeezu Kirisita jigi.

³⁰ Mi a saalim ni m suata Yeezu Kirisita ti Nyɔnɔwa nyiŋ ale yaali kaai ate Wen Chiika a te la nyiŋ ayen, ni maa je m jiaka a te mu ale Wen puusika.

³¹ Ni a puusi ayen baai ale bo Judia tɛŋka ate ba ka siaka ale Yeezu la ayen ba kan nye wabiok m jigiya. Ni maa a puusi mɛ ayen tuin dii ate m le tom te Jerusalem tɛŋka Kirisita bisaŋa la, ba le tuesi di nalimnyiini ale suipeentik.

³² Ate Wen dan maari abe m jam ni jigi ale suipeentik nalimnyiini a goa ale ni a nya masim.

³³ Wen dii ale a basi ate nuruba a boro ale suiyɔgni la le bo ale ni meena. Ku be nye dila.