Aroom 14 - WEN GBAŊKA

¹ Nama po wanyi siaka a dan kan pagra yegayega, ni kan a nak nanpaga ale wa dii ale nala ale dii ale kan nala a magsi nyeka la. Ni basi ate nuru wala choa a maa gum ni po.

² Waai boro kama a baga a weeni ayen wa ta siaka a baga a de jaab meena. Alege waai mɛ siaka ale kan pagra la, a de ka jenvaata nyiini. Wa kan ŋɔbi lammoa.

³ Nuru waai abe ale baga a de jaab meena la, ku an magsi ayen wa nya wala choa nueri. Waai mɛ abe ale a de jenvaata nyiini alege kan de jaab meena la, ku an magsi ayen wa mɛ biisi nwala jigi ase wa a bo wa ka buusa la. Boan nyiŋŋa, Wen tuesi kula nyɔnɔwa kama.

⁴ Suik karo ate ni baga a bo nuru tomteerɔ buusa. Ku ka tomteerɔwa nyɔnɔwa ale ta suik a weeni ayen wa tomteerɔwa ale tom diila ku nala yaase ku an nala. Wa be le baga a tom nueri kama nalimnyiini, dii nyiŋla, ti Nyɔnɔwa Yeezu Kirisita baga a nye kama ate wa a tom a nueri nalimnyiini.

⁵ Nuru le weeni ayen danni de yaase danni de a chim da maŋ a gaam daaŋa meena kama. Wa choa mɛ le weeni ayen daaŋa meena ka bunyi. Ku a fɛ kama ayen waai meena a seba chak wa popola po ayen wa dii ate wa a nye la ka wamaŋ.

⁶ Waai abe dan pai dai yeŋ a chim da kpienni, wa tanla wa danni ate ku te Naawen zula. Waai mɛ abe ale a de jaab meena la, wa a nye dila mɛ ate ku a ta zula a jam ti Naawenni jigi, dii nyiŋla, wa dan yaa wade wa nyiem a te Wen jiam jabuui ate wa a de la. Waai mɛ abe ale a zɛri ayen wa kan de ŋandiin tintila yaase ntila la, wa zɛri a ta ka zula a jam Wen jigi. Wa be a pak ti Naawenni kama.

⁷ Ti wanyi mɛ la an boro ka tidek nyiŋŋa. Ti wanyi mɛ la abe kan kpi ka tidek nyiŋŋa.

⁸ Ti dan vua, ti vua kama a zuli te Naawen, ti be dan kpi mɛ ka ti Naawenni ate ti a zuli. Dii nyiŋla, ti vua yoo ti an vua yoo, ka wala ale soa ti.

⁹ Dila nyiŋ ale soa ate Kirisita kpi a ŋman yiti kum po a vua la ayen wa chim ŋanvuta ale kpilima Naawen.

¹⁰ Be ka boa ale soa ate nama baai ale a de jenvaata nyiini la a bo ni suataŋa baai ale a de jaab meena la buusa? Yaase be ka boa ale soa ate nama baai ale a de jaab meena la a nya ni suataŋa ale a de jenvaata nyiini la, a nueri? Ti meena le zaani ka Wen niŋ ate wa bo ti buusa.

¹¹ Ase ku ale ŋmarisi ayen, <> (Azaya 45:23)

¹² Dila nyiŋla, ti meena ti wanyi wanyi le zaani ka Wen niŋ a weeni sak wa wie ŋaai meena ate ti nye la ale dii nyiŋ ale soa ate ti nye ŋa la.

¹³ Dila nyiŋla, ku a fɛ kama ayen ti basi chaab buusa boka. Alege ku ale magsi ayen ti ta popola ŋaai chaama la, ale nna: Ti kan nye wa dii le di basi ate ti Kirisita biik choa a tom tuimbaata la.

¹⁴ Mi popolaŋa ale Yeezu ti Naawenni ale ka bunyi diila a basi kama ate m seba chak nalimnyiini ayen jadiim meena tidek a chim ka jaab weleŋ. Alege waai dan poli ayen ba an welema, ba an sum welema a te wa.

¹⁵ Ni dan a de jaab ate ku a te ni Kirisita biik choa daanika, ni ale a nye diila kan sak ayen ni ta yaalika ale wa. Kan basi ate ŋandiin tii ate fi a de la, a kaasi nuru waai ate Kirisita kpi te la siaka.

¹⁶ Kan basi ate jabuui ate ni a poli ayen wa nala la a nya yuei kaasuŋŋoa.

¹⁷ Boan nyiŋŋa, ku daa ni ale a de jabuui la, yaase ni ale a nyu jabuui la ale Wen naamu wie. Alege bu ka wayɔrisima nyeka, suiyɔgni boka ale suipeentik. Nyaŋa de meena abe a nyini ka Wen Chiika jigi.

¹⁸ Waai abe ale va suiku de po a tom a te Kirisita la, ku a basi kama ate Wen ale nuruba sue a peenti ale wa.

¹⁹ Dila nyiŋla, ku a fɛ kama ayen ti nyiem kasim ta ku ti popola po ate ti a nye wie ŋaai le ŋa ta suiyɔgni a jam la, abe ti a te chaab nyiŋbiiri wie po.

²⁰ Ni kan va ŋandiinta nyiŋŋa a kaasi Wen ale a nye diila. Ti baga a de ŋandiinta meena kama alege ku an magsi ayen nuru de jabuui le wa basi ate wa Kirisita biik choa tom wabiok la.

²¹ Ku a magsi kama ayen ti kan a ŋɔbi lanta yaase ti a nyu daamoa, yaase ti nye wa dii le di basi ate nuru waai mɛ ale ta siaka la a tom wabiowa.

²² Siak kaai ate fi ta magsi chaab ale wieŋa de la, basi ate ka bo fidek ale Wen suŋsuŋ po. Suipeentik bo ka waai ale weeni wadek ayen wa an nya kaasuŋŋoa ale wa dii ate wa poli ayen di nala a magsi wa nye di la.

²³ Alege waai dan ta chichama a magsi chaab ale jabuui ate wa a de la, Wen le weeni wa kama ayen wa kaasi ya, dii nyiŋla, ku daa wa siaka ale te wa suik ayen wa nye dila. Boan nyiŋŋa, wa dii meena ate nuru a nye alege ku kan nyini wa siaka jigi la, wa dila abe ka wabiok ate wa a nye.