Aroom 13 - WEN GBAŊKA

¹ Ku a fɛ kama ayen waai meena siak baai ale ka tɛŋka kpaga la noa, dii nyiŋla, Wen dan kan te suiwa, nuru karo a baga a chim kpagiya. Dila nyiŋla, kpaga ŋaai ale boro yɔgyɔgla de nna la, ka Wen ale pai ba basi du.

² Waai abe dan zɛri kpaŋŋa de noa, kula nyɔnɔwa a zɛri ka baai ate Wen lueri zaan du la noa. Ku be a fɛ kama ayen nuru wala choa nya waalika.

³ Nuru baai ale kan daa tuim kaasima nyam la a kan chali yɔgsum ale kpaga. Ka baai ale ka tuim kaasima nyam la ale a chali yɔgsum ale kpaga. Suik kula po, ni a yaali ayen ni kan a chali baai ale ka kpaga a ta pagrim la? Ni be dan a yaali ayen ni kan a chali ba ni be a tom tuimaŋsa ate ba te ni pimpauk.

⁴ Ba ka Wen tomteerɔba a tom ayen nalim jam ni jigi. Alege ni dan nye wari kaasi, ni basi ate yɔgsum yik ni boan nyiŋŋa, ku daa kinla nyiŋŋa ate ba ta ba pagrimu. Ba ka Wen tomteerɔba a tagri Wen zuk a te baai ale a tom tuim kaasima la waalika dii nyiŋla, kaasuŋku a te Wen ka suipuurum.

⁵ Ku a fɛ kama ayen ni a zuli kpaŋŋa noa. Ku daa Wen suipuurum waalika nyiini nyiŋŋa, alege ku ka wa dii ate nama dek popola a weeni ni mɛ la.

⁶ Dila nyiŋ ale soa ate ni a tuni lampoo, dii nyiŋla, kpaŋŋa ka Wen tomteerɔba a tom ba tuimaŋa.

⁷ Dila nyiŋla, ni dan ta waai pami ni tuni wa. Ni dan ta ka lampoo pami ni tuni. Te nuru baai ale magsi ni te ba zula la.

⁸ Kan ta waai pamiya. Pami dii nyiini ate ku a fɛ ayen ni ta la ale, ni ta yaalika ale chaab. Nuru waai ale ta yaalika ale wa vaanchoa la, a va Moosis Sinsaŋŋa ale a weeni diila kama nalimnyiini.

⁹ Ni teeri Moosis Sinsaŋŋa ale a weeni diila ayen, <> (Nyinika 20:13-17) alege sinsaŋŋa de ale ŋa chaama meena a gum chaab a bo ka wa yeŋ po. Wanni de ale, <> (Kaabka 19:18)

¹⁰ Nuru waai ale ta yaalika ale wa vaanchoa la, a kan nye wa a kaasi. Dila nyiŋla, waai a dan ta yaalika wa va Sinsaŋŋa meena kama.

¹¹ Ni a nye wieŋa de meena dii nyiŋla, nama dek seba ku ale ka dii yɔgyɔgla de la kama. Vanni veenti kama ate ku a fɛ ayen ni yiti ni goomu po yɔgyɔgla de a zaani ŋmai. Dii nyiŋla, diipo ate ti le nya varibasika la a poom moata kama a gaam diipo ate ti liŋ jam ta siaka la.

¹² Ku a nye ase yokku a boro a taam kama ale ge ayen vari veenti la. Ni basi ate ti basi legi po tuimaŋa tomka abe ti gomsi tidek ale tuimaŋsa tomka ate ti nak legi po tuimaŋa a yiak basi.

¹³ Ni basi ate ti boka a magsi ate ku a sak nuruba ayen ti ka daa legi po. Ti kaa nyu daata bugi a yibi, ti kan chim nipok yaalisa, yaase daŋta tuima, ti kaa nye kpaliŋsa, abe ti kaa de nyuri ale nuruba.

¹⁴ Ni basi ate Yeezu Kirisita ti Nyɔnɔwa nyeboka choawa a soa ni nalimnyiini abe ni kan nye wa dii le di te nyiŋka koarisa suiwa.