Aroom 11 - WEN GBAŊKA

¹ M yaa be le bek ni kama ayen, Wen abe zɛri wadek nuruma kama? Aaya, mi dek ka Izirali denɔ. M ka ti kokpieŋka Abrayam ŋaaŋbiik. M be ka Benjamin mɛ dɔkdemma po wanyi.

² Wen an zɛri wadek nuruma baai ate wa poom seba ba a ta nyini ku piilimka po la. Nama zɛ ba ale ŋmarisi dii Wen gbaŋka po a magsi chaab ale Wen biisiteerɔwa Elaja la? Ba ŋmarisi ayen wa jam a fɔbili kama ale Wen a weeni ayen,

³ <> (1 Nalima 19:14)

⁴ Wa ale jam a fɔbili dila ale Wen la, wa jam tulisi wa kama ayen, <> (1 Nalima 19:18)

⁵ Jinla danni ku be ka dila dekdega. Nuruba maga be tali kama. Wen be va ka wa ŋmanteka nyiŋ a lueri ba.

⁶ Wa le lueri ba la ka wa ŋmanteka nyiŋ, daa ba le tom diila nyiŋŋa. Wen luerika dan ka ba le tom diila nyiŋ wa ŋmanteka ŋman daa wensie ŋmanteka.

⁷ Ku be ka sɛ yɔgyɔgla nna? Jaabuui ate Izirali demma jam a gisi la, ba an nyaya. Ka nuru baai ate Wen jam lueri ate ba an soa diila, ale nya jaab wala. Wen nye kama ate mbala chim tukpara nyam ate ba an baga a wom wa ale a weeni ba diila.

⁸ Ase ba ale ŋmarisi la ayen, <> (Teerika 29:4)

⁹ Deevid a weeni ayen, <

¹⁰ Abe fi basi ate ba ninaŋa yi ate ba kan baga a nya, abe fi basi ate ba kasim a nam taam wuu.>> (Yiila 69:23)

¹¹ Ni be basi ate m ŋman bek ni ayen, ba be ale a gariŋ la, ba lo paari ka tɛŋ bukbuk ate ba an ŋman baga a yiri ŋmaiya? Aaya. Ba gariŋka a goanti basi kama ate varibasika jam baai ale kan daa Izirali dem la jigi ayen ku nye ate Izirali demma a de nyuri ale ba.

¹² Izirali demma gariŋka abe basi kama ate niaka dek a jam baai meena ale kan daa Izirali dem la jigi. Ku be dan ka dila, niaka a yaa be le soa ka sɛ ase Izirali demma a nin va Wen popolaŋa ale ka diila nalimnyiini?

¹³ Yɔgyɔgla de mi a biisi ale ka nama baai ale kan daa Izirali dem la. Mi nyini ka peelim ta kanjanta ale Wen ale lueri mu ayen m chim wa tuimtomdɔ a sak ni la,

¹⁴ ate m dek nuruma, chum da dii dai le de nyuri ale ni ate Wen yaa baga vari ba gela ba tuimbaataŋa po a basi.

¹⁵ Dii nyiŋla, Wen ale jam pai ba zaani nakpiak la, wa ale baai ale kan daa Izirali dem la a yaa niak ka chaab. Nama dek yaa be poli nya ase wa nin tuesi Izirali demma, ku le nye ka sɛ? Ku le nye ase ka kpilima ale yiti kum po a jo vum po la.

¹⁶ Ase boroborok zommu kauk a dan welema, ku meena a welema kama. Tiib mɛ tɛŋ naŋsaŋa a dan welema, tiimu ŋmazuk naŋsaŋa a welema kama.

¹⁷ Wen a wɛ kpaam ti maŋka naŋsaŋa gela kama, a pai kpaam ti yiok naŋ a tom du. Nama baai ale kan daa Juuba la a nye ase ka ti yeoku la a yaa maara de Juuma chiika po nyuvuri.

¹⁸ Dila nyiŋla ni kan a nak kuusa ase nama gaam Izirali demma kama la. Ku a fɛ kama ate ni teeri ayen daa tiimu naŋsaŋa ale ji tiimu kinni a ta za alege ka bu kinni ale ji bu naŋsaŋa a za.

¹⁹ Alege ni baga a weeni kama ayen, <>

²⁰ Ku sum ka wensie. Izirali demma ni le jam kan ta siaka la ale soa ate wa nye dila. Nama ale ta siaka la ale soa ate ni nya jigi naŋka nyiŋ ate ni an wɛ kpaam ti maŋka nyiŋ a loya. Dila nyiŋla, ni kan basi ate nya kude a basi ate ni deri ta kanjanta popola. Ni basi ate ni kpaziim a nak.

²¹ Wen daam abe dan kan zɛri ayen wa kan wɛ Izirali demma baai ale ka ŋmazuk naŋ sii a poom liŋ boro la, nama a poli ayen wa le basi nama mɛ wɛka?

²² Nya kude abe a sak ti kama ayen ti a nya Wen ale ta zula ale ninpagra diila. Wa ta ninpagra ale ka baai ale lo la alege ta zula ale nama ase ni nyeka a nin kasim va a magsi chaab ale wa zulaŋa ate wa ta ale ni la. Alege ni dan kan nye dila, Wen le che nama mɛ a basi kama.

²³ Mbala mɛ abe dan kan piilim ta siaka ale Wen ya, wa le ŋman pilim pai ba a tom maŋ tiimu kama boan nyiŋŋa, Wen ta pagrim a nye dila kama.

²⁴ Nama be a nye ase ka naŋ kaai ate Wen che kpaam ti yiok nyiŋ a yaa pai ka tom maŋ kpaam tiimu buui ate ba potim vuk la nyiŋ. Naŋka be an nyini daa tiimu nyiŋŋa ku be an bola tua ate Wen pai naŋsaŋa de sii ate wa wɛ la a ŋman tom maŋ ti buui nyiŋ ate si nyini la.

²⁵ Wasusugi ale boro, m suata ate mi a yaali ayen nama mɛ seba. Ku be le basi kama ate ni kan poli ayen ni ta yammoa. Wasusugi dii ate mi a yaali ayen m weeni la ale nna: Wen ale nye ate Izirali demma ba gela a ta tukpara. Ku be le kasim ka dila ate ku ga paari diipo ate nuru baai ale kan daa Izirali dem la a nin paari nuruba dii ale magsi la a jam Wen jigi.

²⁶ Izirali demma meena abe le ba va dii nyiŋ nya varibasika la ale la ase Wen gbaŋka ale weeni dii ayen, <

²⁷ Mi ale ba le maa ka chaab a nye nɔiyeŋ ase m nin duisi ba wabaataŋa a basi.>> (Azaya 59:21)

²⁸ Wen wamaŋsaŋa jigi, Izirali demma ka Wen dachaasa ayen nama nya nyuenta dila nyiŋ. Wen luerika jigi, ba ka wa doaba wa ale jam puulim dii ale ba kokpieŋsaŋa la nyiŋ.

²⁹ Dii nyiŋla, Wen kan maari a tagri wa popolaŋa diipo, diipo ale wa ale lueri waai la yaase wa ale a niak waai la.

³⁰ Nama zɛri Wen nɔi kama a ta nyini dipo. Alege yɔgyɔgla de, Izirali demma ale zɛri Wen nɔi la nyiŋ ale soa ate wa ta jiirim ale ni.

³¹ Suik kula po, yɔgyɔgla de Izirali demma mɛ zɛri Wen nɔi kama ayen jiirim buui ate wa ta ale ni la a basi ate ba mɛ nya jiirim wa jigi.

³² Boan nyiŋŋa, Wen weeni kama ale ninmuna ayen Nurubiik meena, Izirali dem ale baai ale kan daa Izirali dem la zɛri wa nɔi kama ate wa lik ba a basi ba biemu po. Wa nye dila kama ayen wa baga ta jiirim ale nurubiik meena.

³³ Wen jigsi ka nna yegayega ale yam ale sebika. Ka wana le baga a miŋ wa popolaŋa ale ka diila? Ka wana le baga a miŋ dii nyiŋ ale soa ate wa a nye dii meena ate wa a poli ayen wa nye la?

³⁴ Ase Wen gbaŋka ale weeni dii ayen, <

³⁵ Ka wana ale diem pai jaab a te Naawen ale weeni ayen wa tuni wa?>> (Job 41:11)

³⁶ Boan nyiŋŋa, ka wa Wen ale nye ŋanta meena tɛŋzuk de. Ŋanta meena abe kasim boro ka wa pagrimu nyiŋ. Ba boro kama ayen ba a te wa masim. Ku a fɛ kama ayen ti a te Wen pimpauk diipo meena wuu. Ku be nye dila.