Aroom 1 - WEN GBAŊKA

¹ Mi Pɔɔl waai ale ka Yeezu Kirisita tomteerɔ la ale a ŋmarisi gbaŋka de. Wen dek ale lueri mu a potim gaari mu ayen m chim wa tuimtomdɔ abe m weeni wa wamaŋsaŋa a sak nuruba.

² Wamaŋsaŋa de ka ŋaai ate wa puulim a biisi ŋa dipo ate wa biisiteerɔma a ŋmarisi nyo Wen gbaŋka po la.

³ Wamaŋsaŋa a biisi ka Wa Nidoabinni waai ale ka Deevid ŋaaŋbiik la wie ase nurubiik la.

⁴ A ta va Weleŋsa Chiika a mooli ale pagrim ayen wa ka Wen Nidoabili wa le yiti kum po la nyiŋ, wala ale Yeezu Kirisita ti Nyɔnɔwa.

⁵ Yeezu Kirisita nyiŋ ale Wa Yuenni nyiŋ ate Wen a te mu suiku de ate m chim wa tuimtomdɔ ayen m baga a weeni wa wie a sak tɛŋsa meena nuruba ate ba ta siaka ale wa abe ba a va wa nɔi.

⁶ Wen wi nama mɛ kama ayen Yeezu Kirisita soa ni.

⁷ Mi a puusi nama meena baai ate Wen ta yaalika ale ni a lueri ni a te wadek Aroom tɛŋka po la. Ti Kowa Wen ale ti Nyɔnɔwa Yeezu Kirisita le niak ni abe wa te ni suiyɔgni.

⁸ Mi a yaali ayen m va ka Yeezu Kirisita nyiŋ a nye Wen jiam a te ni meena, dii nyiŋla, jigi meena nuruba a biisi ni wie kama ni ale ta siaka ale Yeezu Kirisita la.

⁹ Wen dii ate m tom a te ale m suinum meena a sak nuruba Wa Nidoabinni wamaŋsaŋa wie la, ka wala ale mi seerɔ ate mi kasim a puusi a te nama daa meena. M maara puusi mɛ ayen,

¹⁰ ku dan ka wa yaalika wa le te mu suik ate m jam ni jigi yɔgyɔgla.

¹¹ Mi a yaali ka nna yegayega ayen m nya ni ate m te ni Chiika tiirim ate ni ta pagrim.

¹² M jamka le maari ka ti meena. Dii nyiŋla, mi ale ta siaka dii ale Wen la, ku le maari ka nama. Nama mɛ abe le ta siaka dii ale wa la ale maari ka mi mɛ.

¹³ M suata, mi a yaali ayen m weeni a sak ni kama ayen m kasim a yaali ayen m jam ni jigi kama, alege mi an baga a jam ya. Mi a yaali ayen ka m dan jam m nye ate nuruba ni po a pai badek a te Wen ase m le nye dii ale ni vaanchaab baai meena ale kan daa Juuba la.

¹⁴ Mi ta ka tuima ayen m tom a te nuru meena. Baai ale ka Girik dem la ale nuru baai ale kan daa Girik dem la. Baai mɛ ale seba gbaŋ ale baai ale kan seba gbaŋ la.

¹⁵ Dila ale soa ate m pii nyiŋ a yaali ayen m sak nama baai mɛ ale bo Aroom tɛŋka po la Wen wamaŋsaŋa.

¹⁶ Mi a kan chali chivie ale Wen wamaŋsaŋa. Wen pai wa pagrimu a nyo ŋa po kama. Dila ale soa ate Wen baga a vari baai meena ale ta siaka ale ŋa la a basi mɛ ba tuimbaata po. Varibasika de a liŋ a cheŋ ka Juuma jigi ale ge a cheŋ baai ale kan daa Juuba la jigi.

¹⁷ Dii nyiŋla, Wen wamaŋsaŋa a dak sak ti kama suik kuui ate Wen a nye ate ti a chim wayɔrisima nyam wa niŋ la. Wanni de abe ka siaka nyiini a ta nyini di piilimka po a ta ga paari di kpeglimka. Ase ba ale ŋmarisi Wen gbaŋka po dipo ayen, <>

¹⁸ Nuruba ale boro a ta gaasa nna yegayega a kan siak ayen wensieŋa a nyini peelim. Wen abe a sak ti kama ayen wa sui ale a puuri ale baai ale kaa va wa suiku la ale ba gaasa tuimaŋa.

¹⁹ Ŋanta gela boro kama a sak nuruba ate ba baga a seba Wen wie. Nuruma de abe seba ŋantaŋa de kama. Dii nyiŋla, ka Wen dek abe le nye ate ŋantaŋa de a nyini peelim ate ti ba a nya ba. Dila nyiŋ ale soa ate Wen ale namsi ba.

²⁰ A ta nyini diipo ate Wen nye wenzuk ale tɛŋ la, a ta jam paari jinla, ŋan baai meena ate wa nye basi wenzuk ale tɛŋzuk de la a maa chaab a sak nurubiik kama Wen ale ka diila. Ba seba ayen wa pagrimu a kasim boro ka dila taam wuu. Wa be sum ka Wen. Nuru abe an baga a nya wa pagrimu de ale wa ale sum ka Wen diila, alege nuruba baga a seba wieŋa de meena kama. Dila nyiŋla, bala chaab a ka suik ale biisi a vari badek a basi ale ba ale nye diila.

²¹ Ba jam seba Wen kama, alege ba an jam a siak ayen ba a nye wa jiam yaase ba a te wa zula. Ba popolaŋa ka betta popola, ŋa daa popola yɔrisima.

²² Ba a poli ayen ba ka yam nyam, alege ba chim ka betta,

²³ a yaa zuli ŋan baai ale a neensi nuruba ale nuinsa ale duŋsa ale ŋan baai meena ale a cheŋ ba lɔga nyiŋsa la, alege kan zuli Wen dii ale kasim boro taam wuu la.

²⁴ Ba ale a nye dila la ale soa ate Wen yaa pai ba basi ayen ba va badek sui po ale mariŋ diila ate ba yaa pai badek nyiŋsaŋa a tom daŋta tuim ŋaai ale kan magsi ba pai ba nyiŋsaŋa a tom la ale chaab.

²⁵ Ba yaa pai Wen wensieŋa a tagri chim venta ale a puusi ale tom a te ŋan nyeentaŋa ale basi nyeerɔwa, waai ale ta niauŋ taam wuu la. Ku be nye dila.

²⁶ Kude nyiŋ, Wen pai ba basi kama ayen ba va badek sui po ale mariŋ dii le di basi ate ba nya chivie la. Ba nipooma mɛ dek a kan yaali ayen ba a goa ale nidoaba. Ba a yaali ayen ka ba a bobi nipooba ba chaab a goa.

²⁷ Nidoama mɛ kan yaali ayen ba a goa ale nipooba. Ba kasim a yaali kama ale ba koarisa meena ayen ba a bobi nidoaba ba chaab a goa. Nidoama de ale a nye nna la a magsi ka chivie yik ba alege ba kan chali chivie. Nya kude abe basi kama ate waali kaai ale magsi ba nya la a jam ba jigi.

²⁸ Ba jam a poli kama ayen ku an magsi ate ba ta wensie popola maŋsa a magsi chaab ale Wen ya. Wen yaa pai ba basi ate ba ta popola kaasima ate ba a tom tuim ŋaai ale kan magsi ba a tom la.

²⁹ Ba suiniimaŋa kasim sueri ale ka gaasa meena wuu, ate ba a yaali chaab ŋanta ale a kisi chaab ale a de nyuri ale chaab ale a ko nuruba ale a nye kpaliŋsa ale chaab ale a paasi chaab ale a poli kaasuŋ nyiini a te nuruba ale a zu chaab ŋaaŋ

³⁰ ale a kaasi chaab yue ale kisi Wen mɛ. Ba ka nuru leerisa mɛ ale kanjanta nyam ale a yaali yue a te badek ale a gisi ayen ba nya su paalita ate ba a tom tuimbaata. Ba kan wom ba koba ale ba maba noa.

³¹ Ba be ka betta mɛ. Ba dan puulim ayen ba nye wari, ba kan nye. Ba poom ka yaalika ba suiniima po. Ba ka jiirim ale waai ya.

³² Ba be seba ayen Wen weeni kama ayen ku magsi ka nuru baai meena ale a tom nna la, kpi, alege ba diem a tom ka dila ale poom a weeni mɛ ayen baai ale a tom tuim ŋala chaab la, a tom ka tuimaŋsa.