3 Jɔɔn 1 - WEN GBAŊKA

¹ Mi, nisɔmawa nna, ale a ŋmarisi gbaŋka de a te m dek doawa Gayus ate m sum a yaali wa nna yegayega la.

² M dek doa, mi a saalim kama ayen Wen a te fu nyiŋyɔgsa, ate fi a tom fi tuimaŋa nalimnyiini. M seba ayen fi a va Wen ka nalimnyiini.

³ Yeezu ŋaaŋviirɔma ba gela ale jam a weeni mi ayen fi sum a va Wen wensie suiku kama ale fi suinum meena. Mi le ga wom dila la, ku yaa deri peenti m sui nna yegayega.

⁴ Mi nyiem ale wom ayen m bisaŋa a va Wen wensie suiku kama la, m suinum a nyiem a kasim a yɔk ka nna yegayega a gaam jabuui meena.

⁵ M dek doa, ku nala kama ale fi ale tuesi Yeezu ŋaaŋviirɔma ale a maari ba diila. Ba ka nicham ate fi zɛ ba alege, fi diema a tuesi ba.

⁶ Ba biisi fi wie kama ale Kirisita bisaŋa ale a tu chaab a bo dela la, ale pak fu fi ale a yaali ba diila. Mi a saalim fu kama ayen ba nyiem a dan boro a gomsi ayen ba basi fu abe ba nyiem, te ba maari kaai ale ka peenti Wen sui la ate ba nyiem.

⁷ Dii nyiŋla, ba a sak ka nuruba Yeezu wie. Ba be kan tuesi baai ale kan daa Kirisita bisa la jaaboa.

⁸ Dila nyiŋla, ku nala kama ayen tama Kirisita bisaŋa a maari bala chaab ate ti maa chaab a tom ate ti va wensieŋa.

⁹ Mi ŋmarisi ka gbaŋ a te Kirisita bisaŋa ale a tu chaab a bo fi tɛŋka po la, alege Diyɔtifiz ale a yaali ayen wa chim ba kpagi la, a zɛri dii ate mi a ŋmarisi m gbaŋka po la vaka kama.

¹⁰ Dila nyiŋla, m dan jam ni jigi, ti le kali tɛŋ a biisi ale chaab ate nuruba wom wie ŋaai meena ate wa nye la, ale wa ale kasim a velim a te mi diila. Wa dii dek ale ŋmasi gaam taam ate wa a nye la ale, wa kan tuesi Yeezu ŋaaŋviirɔma baai ale nyiem a jam wa yenni la. Wa be kan basi mɛ ate wa doama a tuesi ba a ta a jo ba yeeŋa po. Ase ba dan tuesi ba ayen ba ta jo, wa nyiem a yaali kama ayen wa yiak ba ate ba nyini Yeezu ŋaaŋviirɔma po a nyini.

¹¹ M dek doa, kan tomsi maara nye wie ŋaai ale kan nala la, alege tomsi a tom wie ŋaai ale nala la. Waai abe ale tom wamaŋsa la, Wen soa ka wala. Waai mɛ abe ale a tom wakaasima yaase wabaata la, Wen an soa wala choawa.

¹² Waai meena a pak Dimetirus kama. Wa wensieŋa mɛ dek a sak wa nyemagsika kama. Tama dek a weeni a gum du ate nama mɛ seba ayen ti ale a weeni diila ka wensie.

¹³ M ta ka wie nna yegayega ayen m weeni a sak fu alege m kan yaali ayen m ŋmarisi ŋa dueni.

¹⁴ Mi a poli ayen ku kan beni alege ate m nya fu. Ti dan tu chaab, ti le biisi wieŋa de meena ale chaab.

¹⁵ Wen le te fu suiyɔgni. Fi doama baai meena ale bo dela la, a puusi fu. Be puusi ti doama baai ale bo ale fu la, a te ti.