2 Timoti 4 - WEN GBAŊKA

¹ Yeezu Kirisita le bo ŋanvuta ale kpieba buusa. Wa abe le jam kama a chim naab.

² Wala ale Wen ale mi seerɔba ate mi a kaam fu ale nin muna ayen fi a sak nuruba Wen wamaŋsaŋa ale nin muna diipo meena wuu. Ku dan poom masa yaase ku tua, basi ate ba seba chak ase diipo meena ba nin kaasi wari, abe fi a kaam ba ale nin muna, abe fi a deŋsi ba kpa wie po, abe fi a sak ba ale suduŋni nalimnyiini.

³ Dii nyiŋla, di danni a cheena kama ate nuruba a kan lak tue a wom Wen wensie sinsaŋŋa, ba le jam va ka badek yaalika, abe ba a tu chaab ale sagrɔ baai ale ba jam a sak ba dii ate ba poom gomsi a kala a yaali ayen ba wom la.

⁴ Ba le jam basi Wen wensie sinsaŋŋa kama abe ba a yaali ayen ba a wom sunsuelima.

⁵ Alege fi, kpesi fidek wie meena po. A nam fi ninammu abe fi a sak nuruba Wen wamaŋsaŋa, abe fi a teeri ayen fi ka Wen wieŋa moolidɔ ate fi a tom fi tuimaŋa meena nalimnyiini a te Wen.

⁶ Alege mi diipo ate nuruba le ko mu Wen wamaŋsaŋa nyiŋla a moata kama.

⁷ M be je jiaka a nueri kama. M be chali chalaŋa a nueri kama mɛ. Alege a diem ta siaka ale Wen.

⁸ Ti Naawen a dan ŋman pilim jam ayen wa bo wensie buusa a te ti, wa le pai ka chali dɛ ka tiirimu a te mu, daa mi nyiini alege baai meena ale a yaali wa ale a limisi ayen wa ŋman pilim jam la.

⁹ Pii nyiŋ fidek a jam nwuli.

¹⁰ Dii nyiŋla, Diimas waai ale a yaali tɛŋzuk de ŋanta nna yegayega la a basi mi kama alege cheŋ Tesalonika tɛŋka. Keresens mɛ cheŋ ka Galatia tɛŋka. Titus mɛ cheŋ ka Damatiya tɛŋka.

¹¹ Ka Luuk nyiini ale bo ale mu. Te Maak a jam ale fu ase fi nin cheena. Dii nyiŋ la wa ta ka maarika yega wa ale tom a te mu.

¹² M tom ka Tikikus ate wa cheŋ Efisos.

¹³ Fi dan cheena pai m garuk jueŋku ate m jam pai basi Torowas tɛŋka po Kaapus jigi la a ta jam te mu. Tuesi ku ale m gbaŋsaŋa mɛ ale gbanaŋa dek ate ba ŋmarisi si la a ta jam te mu.

¹⁴ Chiok kuridɔwa Alezanda a jam daani mu nalimnyiini. Ti Naawen ale tuni wa a magsi chaab ale wa ale nye diila.

¹⁵ Kpesi fidek ale wa dii nyiŋla, tama ale jam bo dula la wa kasim jam a zɛri ti sinsaŋŋa kama ale pagrim.

¹⁶ Diipo ate mi jam liŋ bo buusa dɔkku po a biisi ayen m vari m dek a basi la, nuru an jam zaani mi ŋaaŋŋa. Waai meena jam chali bɛ kama ale basi mi dek m nyiini. Mi a saalim Wen ayen wa kan teeri ba ale nye mu diila.

¹⁷ Alege ka Naawen ale jam zaani m ŋaaŋ a pai wa pagrimu a te mu, ate m jam baga a biisi Wen wamaŋsaŋa a sak baai ale kan daa Juuma la. Ti Naawen mɛ a jam maa yeeri mu a ta nyini ate ba an baga a ko mu.

¹⁸ Ti Naawen mɛ le yeeri mu a ta nyini tuimba tii ate nuruba a poli ayen ba nye mu la, ate m jo wa naamu po buui ale bo wenŋmazuk la. Wa le nya zula ŋaai ale kan ta kpeglimka la. Ku be nye dila.

¹⁹ Mi a puusi Pirisila ale Akiila. M maari a puusi Onesiforus dɔkdemma.

²⁰ Erasitus a wari ka Korinti tɛŋka. Alege m basi Torofimus ka Militus tɛŋka po. Dii nyiŋla, wa jam ka nyiŋyɔgsa.

²¹ Pii nyiŋ ate fidek jam alege ate ŋoota wein paari. Yubulus ale Pudens ale Linus ale Kilɔdiya ale Kirisita bisaŋa meena ale bo dela la a puusi fu.

²² Ti Naawen a bo ale fu. Wen ŋmanteka le bo ale ni meena.