2 Timoti 2 - WEN GBAŊKA

¹ M nidoabiliga, ku ka Wen ŋmanteka nyiŋ ate tama ale Yeezu Kirisita a chim bunyi. Dila nyiŋla, be ta pagrim.

² Sinsak ŋaai ate mi a pai sak fu nuru boari suŋsuŋ la ba wom kama. Fi mɛ pai sinsak ŋala dek a sak nuru baai ale ka wensie nyam ate ba mɛ baga a pai ŋa a sak ba vaanchaab ate ku tagli a cheŋ.

³ Tuesi fi ninammu ase tugurik tɔŋdɔ waai ale a tom wa tuimaŋa nalimnyiini la, dii nyiŋla, fi ka Yeezu Kirisita tugurik tɔŋdɔ.

⁴ Tugurik tɔŋdɔba a dan boro a tom ba tugurik tɔŋdɔba tuimaŋa, wa kan tom tuim ŋaai ate nuru waai ale kan daa tugurik tɔŋdɔ a tom la. Wa nyiem a yaali kama ayen wa tuimaŋa a te wa tugurik tɔŋdɔba kpagni suipeentik.

⁵ Chalidɔ a dan kan va chalaŋa vuuk tii ate ba dueni la, wa kan nya wa naam zutɔkka.

⁶ Yaase kpaarɔ waai ale a tom nalimnyiini wa talim po la, wala ale soa bie ŋaai ale liŋ a abe la alege ate cheka a yaa paari.

⁷ A poli m le a weeni fu nna la. M seba chak kama ayen ti Naawenni le wa a maari fu ate fi miŋ m wieŋa a chak.

⁸ A teeri Yeezu Kirisita waai ale jam ka Deevid ŋaaŋbiik la wie ayen wa yiti kum po kama. Wamaŋsaŋa de ate mi kasim a weeni a sak nuruba diipo meena ate mi a sak nuruba la.

⁹ Wen wamaŋsaŋa nyiŋ ate ba yik mi a pai chɔrima a bobi mu ayen m nam ase tuim kaasima nyɔnɔ la. Alege ba an baga a bobi wa wanni.

¹⁰ Dila ale soa ate m ta suinum pagrik ale m ninammu, ayen nuru baai ate Wen a lueri la a nya varibasika. Varibasika de a basi kama ate bala ale tama meena ale Yeezu Kirisita a chim bunyi ate ti yaa a nya zula ŋaai ale kan ta kpeglimka la.

¹¹ Ba weeni ka wensie ayen, <

¹² Ti dan siak a te ti ninammu ale ti suiniima meena, dai yeŋ tama ale wa le chim nalima. Ti be dan pagsi ayen ti zɛ wa, wa mɛ le pagsi ayen wa zɛ ti.

¹³ Tama dan kan daa wensie nyama, wa kasim ka wensie nyɔnɔ diipo meena. Wa kan maari a chim nɔi buye nyɔnɔ.>>

¹⁴ Teeri fi nuruma wieŋa de meena abe fi kaam ba ale nin muna Wen niŋ ayen ba kan a nak nanpaga kayaata ale wamaŋ a kan nyini nanpaga kayaataŋa de chaab po a nyini, ŋa goanti a kaasi ka nuru baai ale a wom la popola.

¹⁵ Pii nyiŋ a tom Wen tuimaŋa nalimnyiini, ate wa pak fu ate fi kan chim tomteerɔ waai le wa nya chivie la, alege waai ale a sak wensie wamaŋsaŋa ate ku a magsi la.

¹⁶ Ase mi ale poom weeni fu diila, kan pai fidek a gum chaab ale baai ale a biisi betta biisa ale chaab la, dii nyiŋla baai ale a biisi dila la, a yiak ka nuruba ate ba kan va Wen ya.

¹⁷ Ba ale kasim a biisi diila, ku a nye ase ka naworuk ale bo nuru nyiŋ a dɛ wa la. Yimeniyus ale Filitus a maa ka ba po.

¹⁸ Nuruba bayewa de a basi Wen wensie suiku kama ate nuruba gela mɛ ale ta siaka ale Kirisita va ka la a basi wa va ka, dii nyiŋla ba a sak kama ayen diipo ate nuruba le yiti kum po la, taam kama.

¹⁹ Alege nyubi dii ate Wen a nyubi la, di pagra ka nna yegayega, a kan choa. Wa ŋmarisi dueni di nyiŋ ayen, <> (Chiinika 16:5) ale <>

²⁰ Taasa ale ŋanta tɔgatɔga yegayega ale bo yeri po la, ba pai ka ŋan baai ale a nyaksi a nye, ŋa gela ba pai ligmɔniŋ a nye, gela ba pai daata a nye, gela ba pai yak a mɛ. Ba gela ba pai zaani magsi ka nicham ŋanta nye teka, ba gela badek daa meena pai tomka.

²¹ Waai a dan kan ta daŋta ale tuimbaataŋa de meena ate m liŋ weeni la, ase taasaŋa nyɔnɔwa ale pai taasi maŋsaŋa a nye nicham ŋanta la, Wen mɛ abe le pai nuru wala choa mɛ a tom ka tuimaŋsa meena.

²² Dila nyiŋla, kan va fidek ale a yaali ŋan baai ase bimbaansa ale a yaali ŋan baai la, alege ta ku fi suinum po ate fi a tom tuimaŋsa yegayega a te wa, abe fi ta siaka ale yaalika, abe fi boro ale suiyɔgni ale baai ale a wi Naawen ale suinum weleŋsa a yaali maarika la.

²³ Ka a tu chaab ale nuru betta baai ale kasim a nak nanpaga ale ŋan baai ate ba kan miŋ a chak la. Fi seba ayen ba nampaŋŋa nakka a ta ba cheena ka kpaliŋ jigi.

²⁴ Ku a fɛ ayen ti Naawenni tomteerɔ kan a nye kpaliŋŋa. Ku a fɛ ate wa a te nuruba zula, abe wa chim sagrɔ maŋ waai ale ta suduŋni la.

²⁵ Nuruba a dan a zɛri wa sinsaŋŋa alege wa a yaali ayen wa sak ba, ku a fɛ ayen wa yik wadek. Da dii dai, Wen le te ba suik ate ba tulim a va wa abe ba seba wa wensieŋa.

²⁶ Ba dan nye dila, ba le baga a pilim a jam nya yam ate ba baga chali bɛ jabioku jigi waai ale jam bari yik ba a ta la ate ba yaa va Wen nɔi.